ಮಟ್ಟಿಕಲ್ಲು ಶ್ರೀ ಗಣೇಶ ಮಹಾರಾಜ್‌ಗೆ ಸಂಭ್ರಮದ ವಿದಾಯ
ಸಾರಾಂಶ
ದಾವಣಗೆರೆ ನಗರದ ಮಟ್ಟಿಕಲ್ಲು ಪ್ರದೇಶದ ಶ್ರೀ ಗಣೇಶ ವಿಸರ್ಜನಾ ಮೆರವಣಿಗೆ, ಬೃಹತ್ ಶೋಭಾಯಾತ್ರೆಯು ಸೋಮವಾರ ಬಿಗಿ ಪೊಲೀಸ್ ಭದ್ರತೆ ನಡುವೆ ಶಾಂತಿ, ಸುವ್ಯವಸ್ಥಿತವಾಗಿ ನಡೆಯಿತು.
- ಶ್ರದ್ಧಾಭಕ್ತಿಯಿಂದ ಜಯಘೋಷ ಮೊಳಗಿಸಿದ ಭಕ್ತರು । ಪೊಲೀಸ್ ಬಿಗಿ ಭದ್ರತೆಯಲ್ಲಿ ಶೋಭಾಯಾತ್ರೆ: ಭಕ್ತರ ಹರ್ಷೋದ್ಗಾರ
ಕನ್ನಡಪ್ರಭ ವಾರ್ತೆ ದಾವಣಗೆರೆ
ನಗರದ ಮಟ್ಟಿಕಲ್ಲು ಪ್ರದೇಶದ ಶ್ರೀ ಗಣೇಶ ವಿಸರ್ಜನಾ ಮೆರವಣಿಗೆ, ಬೃಹತ್ ಶೋಭಾಯಾತ್ರೆಯು ಸೋಮವಾರ ಬಿಗಿ ಪೊಲೀಸ್ ಭದ್ರತೆ ನಡುವೆ ಶಾಂತಿ, ಸುವ್ಯವಸ್ಥಿತವಾಗಿ ನಡೆಯಿತು.ನಗರದ ಮಟ್ಟಿಕಲ್ಲು ಪ್ರದೇಶದ ಶ್ರೀ ಗಣೇಶ ಪ್ರತಿಷ್ಠಾಪನಾ ಸ್ಥಳದಿಂದ ಪೊಲೀಸ್ ಭದ್ರತೆಯಲ್ಲಿ ಆರಂಭವಾದ ಶ್ರೀ ಗಣೇಶ ವಿಸರ್ಜನಾ ಶೋಭಾಯಾತ್ರೆಯು ಶ್ರೀ ವೆಂಕಟೇಶ್ವರ ವೃತ್ತ, ಅರಳಿ ಮರ ವೃತ್ತ, ಜಗಳೂರು ಬಸ್ಸು ನಿಲ್ದಾಣ, ಬಂಬೂ ಬಜಾರ್ ರಸ್ತೆ, ಶ್ರೀ ಗಣೇಶ ಹೋಟೆಲ್‌, ಈರುಳ್ಳಿ ಮಾರುಕಟ್ಟೆ, ಹಳೇ ಪಿ.ಬಿ. ರಸ್ತೆ ಮಾರ್ಗವಾಗಿ ಬಾತಿ ಕೆರೆಯತ್ತ ಸಂಜೆ ಹೊತ್ತಿಗೆ ಸಾಗಿ, ಬಾತಿಕೆರೆ ಬಳಿ ಶ್ರೀ ಗಣೇಶನ ವಿಸರ್ಜನೆ ನೆರವೇರಿತು.
ಹರಿಹರ ಬಿಜೆಪಿ ಶಾಸಕ ಬಿ.ಪಿ.ಹರೀಶ್, ದಾವಣಗೆರೆ ಮಾಜಿ ಮೇಯರ್ ಎಸ್.ಟಿ.ವೀರೇಶ, ದೂಡಾ ಮಾಜಿ ಅಧ್ಯಕ್ಷ ರಾಜನಹಳ್ಳಿ ಶಿವಕುಮಾರ್ ಸೇರಿದಂತೆ ಹಲವು ರಾಜಕೀಯ ಮುಖಂಡರು ಶೋಭಾಯಾತ್ರೆಯಲ್ಲಿ ಪಾಲ್ಗೊಂಡಿದ್ದರು.
(ಬಾಕ್ಸ್‌)
ಗಣೇಶೋತ್ಸವದ ಈ ಹಿಂದಿನ ವರ್ಷಗಳ ಘಟನೆಗಳ ಹಿನ್ನೆಲೆಯಲ್ಲಿ ಯಾವುದೇ ಅಹಿತಕರ ಘಟನೆಗೆ ಈ ಸಲ ಅವಕಾಶ ಇಲ್ಲದಂತೆ ಜಿಲ್ಲಾ ಪೊಲೀಸ್ ಇಲಾಖೆ ಭಾರಿ ಭದ್ರತಾ ವ್ಯವಸ್ಥೆ ಕೈಗೊಂಡಿತ್ತು. ಶೋಭಾಯಾತ್ರೆಯ ಮಾರ್ಗದುದ್ದಕ್ಕೂ ಪೊಲೀಸ್ ಅಧಿಕಾರಿ, ಸಿಬ್ಬಂದಿ ನಿಯೋಜಿಸಲಾಗಿತ್ತು. ಸೂಕ್ಷ್ಮ ಪ್ರದೇಶಗಳಲ್ಲಿ ಅಧಿಕಾರಿಗಳು ಕಟ್ಟೆಚ್ಚರ ವಹಿಸಿದ್ದರು.
- - -