ಆಲಿಸು ಕಂದ ಯೋಜನೆಗೆ ಖಾದರ್‌ ಚಾಲನೆ

ಬೆಂಗಳೂರು : ‘ಶ್ರವಣ ದೋಷ ಮುಕ್ತ ಕರ್ನಾಟಕ’ ಅಭಿಯಾನದ ಅಂಗವಾಗಿ ‘ಆಲಿಸು ಕಂದ’ ಯೋಜನೆ ನಿರಂತರವಾಗಿ ಮುಂದುವರಿಯಲು ಸಾಧ್ಯವಾಗುವಂತೆ ವಿಷನ್ ಕಮಿಟಿ ರಚಿಸಲಾಗುವುದು ಎಂದು ಆರೋಗ್ಯ ಸಚಿವ ಯು.ಟಿ.ಖಾದರ್ ತಿಳಿಸಿದ್ದಾರೆ.

ಗುರುವಾರ ಆರೋಗ್ಯಸೌಧದಲ್ಲಿ ಶ್ರವಣ ದೋಷ ಮುಕ್ತ ಅಭಿಯಾನದ ‘ಆಲಿಸು ಕಂದ’ ಯೋಜನೆಯಡಿ 2026-27ನೇ ಸಾಲಿನಲ್ಲಿ 200 ಮಕ್ಕಳಿಗೆ ಕಾಕ್ಲಿಯರ್‌ ಇಂಪ್ಲ್ಯಾಂಟ್‌ ಶ್ರವಣ ಸಾಧನ ಅಳವಡಿಕೆಗೆ ಚಾಲನೆ ನೀಡಿ ಮಾತನಾಡಿದರು.

200 ಮಕ್ಕಳಲ್ಲಿ ಮೊದಲ ಹಂತದಲ್ಲಿ 75 ಮಕ್ಕಳಿಗೆ ಶ್ರವಣ ಸಾಧನ ಅಳವಡಿಕೆಗೆ ಚಾಲನೆ ನೀಡಿದ್ದು, ಒಂದೆರಡು ತಿಂಗಳಲ್ಲಿ ಪೂರ್ಣಗೊಳಿಸಲಾಗುವುದು. ಎರಡನೇ ಹಂತದಲ್ಲಿ 125 ಮಕ್ಕಳಿಗೆ 3 ತಿಂಗಳಲ್ಲಿ ಅಳವಡಿಕೆ ಮಾಡಲಾಗುವುದು ಎಂದು ತಿಳಿಸಿದರು.

ಶಸ್ತ್ರಚಿಕಿತ್ಸೆಗೆ ₹15 ಲಕ್ಷ ನೆರವು:

ರಾಜ್ಯದಲ್ಲಿ ಕಿವುಡ-ಮೂಗ ಸಮಸ್ಯೆಯಿಂದ ಯಾವ ಮಕ್ಕಳೂ ತೊಂದರೆ ಅನುಭವಿಸಬಾರದು. ಅದಕ್ಕಾಗಿ ಕಾಕ್ಲಿಯರ್ ಇಂಪ್ಲ್ಯಾಂಟ್ ಶಸ್ತ್ರಚಿಕಿತ್ಸೆಗೆ ಸರ್ಕಾರದಿಂದ ನೆರವು ನೀಡಲಾಗುತ್ತಿದೆ. 2014ರಲ್ಲಿ ಅಭಿಯಾನಕ್ಕೆ ಚಾಲನೆ ನೀಡಲಾಗಿತ್ತು. ಆಗ ಈ ಚಿಕಿತ್ಸೆಗೆ ಖಾಸಗಿ ಆಸ್ಪತ್ರೆಯಲ್ಲಿ ₹8-9 ಲಕ್ಷ ಇತ್ತು. ಈಗ ಅದು ₹15 ಲಕ್ಷಕ್ಕೆ ತಲುಪಿದೆ. ಸರ್ಕಾರ ಜಾರಿಗೊಳಿಸಿದ ಈ ಯೋಜನೆ ಆಗಾಗ ತಾಂತ್ರಿಕ ಕಾರಣದಿಂದ ಸ್ಥಗಿತಗೊಂಡು ತೊಂದರೆ ಆಗುತ್ತಿದೆ. ಈ ಅಡೆತಡೆ ನಿವಾರಣೆಗೆ ವಿಷನ್ ಸಮಿತಿ ರಚಿಸಿ ಯೋಜನೆ ಉತ್ತಮವಾಗಿ ಮುಂದುವರಿಯುವಂತೆ ನೋಡಿಕೊಳ್ಳಲಾಗುವುದು ಎಂದು ತಿಳಿಸಿದರು.

ಕಿವುಡು ಸಮಸ್ಯೆಯೇ ಮೂಲ ಕಾರಣ:

ಹಲವು ಮಕ್ಕಳು ಮಾತು ಬಾರದೆ ಮೂಗರಾಗಿರಲು ಕಿವುಡು ಸಮಸ್ಯೆ ಮೂಲ ಕಾರಣದೆ. ಮುಂದಿನ 5-10 ವರ್ಷದಲ್ಲಿ ‘ಆಲಿಸು ಕಂದ’ ಯೋಜನೆ ಪರಿಣಾಮಕಾರಿಯಾಗಿ ಅನುಷ್ಠಾನಗೊಳ್ಳಬೇಕು. ಈ ಮೂಲಕ ಇಂತಹ ಸಮಸ್ಯೆಯನ್ನು ಶಾಶ್ವತವಾಗಿ ನಿವಾರಿಸಲು ಸರ್ಕಾರ ಬದ್ಧವಾಗಿದೆ ಎಂದು ಸಚಿವರು ತಿಳಿಸಿದರು.

ಈ ಕಾರ್ಯಕ್ರಮದಡಿ ಫಲಾನುಭವಿಗಳ ತಪಾಸಣೆ, ಶ್ರವಣ ಸಾಮರ್ಥ್ಯದ ಮೌಲ್ಯಮಾಪನ, ಅರ್ಹತೆಯ ಪರಿಶೀಲನೆ, ಕಾಕ್ಲಿಯರ್‌ ಇಂಪ್ಲಾಂಟ್ ಶಸ್ತ್ರಚಿಕಿತ್ಸೆ, ಶಸ್ತ್ರಚಿಕಿತ್ಸೆ ನಂತರ ಸಾಧನವನ್ನು ಸಕ್ರಿಯಗೊಳಿಸುವಿಕೆ ಮತ್ತು ಅದರ ಸೂಕ್ತ ಹೊಂದಾಣಿಕೆ (ಡಿವೈಸ್ ಆ್ಯಕ್ಟಿವೇಶನ್ ಆ್ಯಂಡ್ ಮ್ಯಾಪಿಂಗ್) ಹಾಗೂ ವ್ಯವಸ್ಥಿತ ಶ್ರವಣ-ಮೌಖಿಕ ಚಿಕಿತ್ಸಾ ಸೇವೆಗಳನ್ನು (ಆಡಿಟರಿ ಆ್ಯಂಡ್ ವರ್ಬಲ್ ಥೆರಪಿ -ಎವಿಟಿ) ಒಳಗೊಂಡ ಸಮಗ್ರ ಆರೈಕೆ ಒದಗಿಸಲಿದೆ ಎಂದು ಮಾಹಿತಿ ನೀಡಿದರು.

ಕಾರ್ಯಕ್ರಮದಲ್ಲಿ ಆರೋಗ್ಯ ಇಲಾಖೆ ಕಾರ್ಯದರ್ಶಿ ರಿತ್ವಿಕ್ ರಂಜನ್‌ಪಾಂಡೆ, ಅಧಿಕಾರಿಗಳಿದ್ದರು.

ಕಳೆದ ವರ್ಷ 575 ಮಕ್ಕಳಿಗೆಕಾಕ್ಲಿಯರ್ ಇಂಪ್ಲಾಂಟ್

ಕಳೆದ 2025-26ನೇ ಆರ್ಥಿಕ ವರ್ಷದಲ್ಲಿ ಕರ್ನಾಟಕ ರಾಜ್ಯದಲ್ಲಿ 575 ಮಕ್ಕಳಿಗೆ ಕಾಕ್ಲಿಯರ್ ಇಂಪ್ಲಾಂಟ್ ಶಸ್ತ್ರಚಿಕಿತ್ಸೆ ಮಾಡಲಾಗಿದೆ. ಈ ಆರ್ಥಿಕ ವರ್ಷದಲ್ಲಿ ಸರ್ಕಾರದೊಂದಿಗೆ ನೋಂದಾಯಿತ ಹಾಗೂ ಮಾನ್ಯತೆ ಪಡೆದ ಕಾಕ್ಲಿಯರ್‌ಇಂಪ್ಲಾಂಟ್ ಆಸ್ಪತ್ರೆಗಳಿಗೆ ಹೆಚ್ಚುವರಿ 200 ಕಾಕ್ಲಿಯರ್‌ಇಂಪ್ಲಾಂಟ್ ಸಾಧನಗಳನ್ನು ಪೂರೈಸಲು ಯೋಜಿಸಲಾಗಿದೆ ಎಂದು ಸಚಿವ ಖಾದರ್‌ ತಿಳಿಸಿದರು.