ರೈತ ಉತ್ಪಾದಕ ಕಂಪನಿ ಮೂಲಕ ವ್ಯವಹರಿಸಲು ಕರೆ

ನವಲಿ: ಕನಕಾಚಲ ರೈತ ಉತ್ಪಾದಕರ ಕಂಪನಿಯ ಮೂರನೇ ವಾರ್ಷಿಕ ಮಹಾಸಭೆ ಇತ್ತೀಚೆಗೆ ನವಲಿ ಗ್ರಾಮದ ಕನಕ ಭವನದ ಕಚೇರಿ ಮುಂದೆ ಜರುಗಿತು.

ಸಭೆಯಲ್ಲಿ ರೈತರು ಮತ್ತು ಮಂಡಳಿ ಸದಸ್ಯರು, ಪಾಲುದಾರ ಸಂಸ್ಥೆಗಳ ಸದಸ್ಯರು ಪಾಲ್ಗೊಂಡಿದ್ದರು. ಜೆಎಸ್‌ಡಬ್ಲ್ಯೂ ಫೌಂಡೇಶನ್‌ನ ಇ.ವೈ. ಚಿರಂತನ್‌ ಅವರು, ಕನಕಚಲ ಎಫ್‌ಪಿಸಿಯ ಅಭಿವೃದ್ಧಿ ಪ್ರಯಾಣ ಮತ್ತು ರೈತ ಆಧಾರಿತ ಉದ್ಯಮಗಳನ್ನು ಬಲಪಡಿಸುವತ್ತ ಅದರ ಪ್ರಯತ್ನಗಳ ಕುರಿತು ವಿವರಿಸಿದರು.

ಕೆವಿಕೆ ಕೊಪ್ಪಳದ ಮುಖ್ಯಸ್ಥ ಮತ್ತು ಕಾರ್ಯಕ್ರಮ ಸಂಯೋಜಕ ರಾಘವೇಂದ್ರ ಎಲಿಗಾರ್ ಅವರು, ರೈತರು ಎಫ್‌ಪಿಸಿ ಮೂಲಕ ವ್ಯಾಪಾರ-ವಹಿವಾಟುಗಳನ್ನು ಹೆಚ್ಚಿಸುವಂತೆ ಕರೆ ನೀಡಿದರು. ಸಾಮೂಹಿಕ ಮಾರುಕಟ್ಟೆ ಮತ್ತು ಇನ್‌ಪುಟ್ ನಿರ್ವಹಣೆ ಕಂಪನಿಯ ಬೆಳವಣಿಗೆ ಮತ್ತು ರೈತರ ಸಮೃದ್ಧಿಗೆ ಗಮನಾರ್ಹವಾಗಿ ಕೊಡುಗೆ ನೀಡುತ್ತದೆ ಎಂದು ಅವರು ಒತ್ತಿ ಹೇಳಿದರು.

ಶರಣಪ್ಪ ಕೊತ್ವಾಲ್ ಮಾತನಾಡಿ, ಷೇರುದಾರ-ರೈತರಿಗೆ ಹೆಚ್ಚಿನ ಆದಾಯವನ್ನು ಗಳಿಸುವ ವೈವಿಧ್ಯಮಯ ವ್ಯವಹಾರ ಚಟುವಟಿಕೆ ಅನ್ವೇಷಿಸಲು ಮತ್ತು ಪ್ರಾರಂಭಿಸಲು ಒತ್ತಾಯಿಸಿದರು. ಶರಣಪ್ಪ ಕೆಸರೆಟ್ಟಿ ಮಾತನಾಡಿ, ಕಂಪನಿ ತನ್ನ ಕಾರ್ಯಾಚರಣೆ ಮತ್ತು ಮೂಲಸೌಕರ್ಯವನ್ನು ವಿಸ್ತರಿಸಲು ವಿವಿಧ ಸರ್ಕಾರಿ ಯೋಜನೆಗಳನ್ನು ಪರಿಣಾಮಕಾರಿಯಾಗಿ ಬಳಸಿಕೊಳ್ಳಬೇಕು ಎಂದು ಸಲಹೆ ನೀಡಿದರು.

ಚೌಡೇಶ್ವರಿ ರೈತ ಉತ್ಪಾದಕ ಕಂಪನಿ ಸಿಇಒ ದೇಸಾಯಿ, ಕೃಷಿ ಉತ್ಪನ್ನಗಳಿಗೆ ಮೌಲ್ಯವರ್ಧನೆಯ ಮಹತ್ವದ ಬಗ್ಗೆ ಮಾತನಾಡಿದರು. ಮೌಲ್ಯವರ್ಧಿತ ಉತ್ಪನ್ನಗಳನ್ನು ಸಂಸ್ಕರಿಸುವುದು ಮತ್ತು ಮಾರಾಟ ಮಾಡುವುದರಿಂದ ರೈತ ಷೇರುದಾರರಿಗೆ ಲಾಭ ಗಮನಾರ್ಹವಾಗಿ ಹೆಚ್ಚಾಗುತ್ತದೆ ಎಂದು ಅವರು ವಿವರಿಸಿದರು.

ವ್ಯವಸ್ಥಾಪಕ ನಿರ್ದೇಶಕ ವೆಂಕಟೇಶ್ ಗೌಡ, ನಿರ್ದೇಶಕ ಲಚ್ಚಪ್ಪ ಈಡಿಗೇರ ಅವರು, ರೈತ ಸದಸ್ಯರು ರೈತ ಉತ್ಪಾದಕ ಕಂಪನಿಯಲ್ಲಿ ಹೆಚ್ಚಿನ ವ್ಯವಹಾರ ಮಾಡುವ ಮೂಲಕ ಸಕ್ರಿಯವಾಗಿ ಬೆಂಬಲಿಸುವಂತೆ ಕೋರಿದರು. ಕಾರ್ಯಕ್ರಮದ ನೇತೃತ್ವವನ್ನು ಕಂಪನಿಯ ಸಿಇಒ ಬಸವರಾಜ್ ವಹಿಸಿದ್ದರು. ಸುರೇಶ ಕ್ಯಾಡೇದ ಸ್ವಾಗತಿಸಿದರು.