ವಿದ್ಯಾರ್ಥಿನಿಯರಿಗೆ ಉಚಿತ ಹೈಟೆಕ್ ವಸತಿ ಸಹಿತ ಕಾಲೇಜ್ ಜೂನ್ ನಲ್ಲಿ ಪ್ರಾರಂಭ
ಸಾರಾಂಶ
ವಿಜ್ಞಾನ ವಿಭಾಗದಲ್ಲಿ ನಾಲ್ಕು ನೂರು ಮಕ್ಕಳು, ಕಲಾ ವಿಭಾಗದಲ್ಲಿ ಎರಡುನೂರು ಮಕ್ಕಳಿಗೆ ಪ್ರವೇಶ ನೀಡಲಾಗುತ್ತದೆ. ಐಎಎಸ್, ಐಪಿಎಸ್ ಕೋಚಿಂಗ್ ನೀಡಲಾಗುತ್ತದೆ
ಕೊಪ್ಪಳ: ಐಐಟಿ ಮಾದರಿಯಲ್ಲಿ ನಿರ್ಮಾಣವಾಗಿರುವ ಹೈಟೆಕ್ ಕಟ್ಟಡದಲ್ಲಿ ಕೋಳೂರು ಗ್ರಾಮದ ಬಳಿ ವಿದ್ಯಾರ್ಥಿನಿಯರಿಗಾಗಿ ಪಿಯು ವಸತಿ ಕಾಲೇಜು ನಿರ್ಮಾಣ ಪೂರ್ಣಗೊಂಡಿದ್ದು, ಜೂನ್ ತಿಂಗಳಲ್ಲಿ ಆರಂಭವಾಗಲಿದೆ ಎಂದು ಶ್ರೀಗವಿಸಿದ್ಧೇಶ್ವರ ಮಹಾಸ್ವಾಮೀಜಿಗಳು ಘೋಷಣೆ ಮಾಡಿದ್ದಾರೆ.
ಈಗ ಈ ಭಾಗದ ವಿದ್ಯಾರ್ಥಿನಿಯರಿಗಾಗಿ ಉಚಿತ ವಸತಿ ಕಾಲೇಜು ಪ್ರಾರಂಭಿಸಲಾಗುವುದು. ಬೀದಿ ಬದಿ ವ್ಯಾಪಾರಿಗಳು, ತಂದೆ, ತಾಯಿ ಇಲ್ಲದ ತಬ್ಬಲಿಗಳು ಇರುತ್ತಾರೆ. ರೈತರು, ಆಟೋದವರು ಮಕ್ಕಳು ಸೇರಿದಂತೆ ಓದಿಸಲು ಆಗದ ಸ್ಥಿತಿಯಲ್ಲಿ ಇರುತ್ತಾರೆ. ಅಂಥವರಿಗಾಗಿ ಈ ಕಾಲೇಜು ಇದೆ. ₹60 ಕೋಟಿ ವೆಚ್ಚದಲ್ಲಿ ಇದನ್ನು ನಿರ್ಮಾಣ ಮಾಡಲಾಗಿದೆ. ₹2,3 ಲಕ್ಷ ವೆಚ್ಚ ಮಾಡಿ, ಬಡವರು ಪಿಯುಸಿ ಓದಿಸಲು ಆಗುವುದಿಲ್ಲ. ಅಂಥವರಿಗಾಗಿಯೇ ಈ ಕಾಲೇಜು ನಿರ್ಮಾಣ ಮಾಡಲಾಗಿದೆ. ಅತ್ಯುತ್ತಮವಾಗಿ ಕಟ್ಟಡ ನಿರ್ಮಾಣ ಮಾಡಲಾಗಿದೆ ಎಂದರು.
ವಿಜ್ಞಾನ ವಿಭಾಗದಲ್ಲಿ ನಾಲ್ಕು ನೂರು ಮಕ್ಕಳು, ಕಲಾ ವಿಭಾಗದಲ್ಲಿ ಎರಡುನೂರು ಮಕ್ಕಳಿಗೆ ಪ್ರವೇಶ ನೀಡಲಾಗುತ್ತದೆ. ಐಎಎಸ್, ಐಪಿಎಸ್ ಕೋಚಿಂಗ್ ನೀಡಲಾಗುತ್ತದೆ. ನೀಟು, ಸಿಇಟಿ ಕೋಚಿಂಗ್ ನೀಡಲಾಗುತ್ತದೆ. ಈ ವರ್ಷ ಆರು ನೂರು ಮಕ್ಕಳಿಗೆ ಪ್ರವೇಶ ನೀಡಲಾಗುತ್ತದೆ. ಹದಿನೈದುನೂರು ಮಕ್ಕಳಿಗೆ ಈಗ ಕಾಲೇಜು ಕಟ್ಟಡ ಸಿದ್ಧವಾಗಿದೆ. ಏಳುನೂರು ವಿದ್ಯಾರ್ಥಿಗಳಿಗೆ ಮಾತ್ರ ಹಾಸ್ಟೆಲ್ ಕಟ್ಟಡ ನಿರ್ಮಾಣವಾಗಿದೆ. ಉಳಿದ ಮಕ್ಕಳಿಗೂ ಹಾಸ್ಟೆಲ್ ನಿರ್ಮಾಣ ಗವಿಸಿದ್ಧ ಶಕ್ತಿ ಕೊಟ್ಟರೇ ಅದನ್ನು ಪೂರ್ಣಗೊಳಿಸಲಾಗುವುದು. ಕರ್ನಾಟಕದ ಯಾವ ಮೂಲೆಯಿಂದಾದರೂ ಈ ಮಕ್ಕಳು ಬರಬಹುದು. ಹೈಸ್ಕೂಲ್ ಶಿಕ್ಷಕರು ಇದನ್ನು ಹೆಚ್ಚು ಹೆಚ್ಚು ಪ್ರಚಾರ ನಡೆಸಬೇಕು. ಇದೆಲ್ಲವನ್ನು ಉಚಿತವಾಗಿ ನಡೆಸುವುದು ಕಷ್ಟವಾಗುತ್ತದೆ. ಕೋಚಿಂಗ್, ಶಿಕ್ಷಣ ಉಚಿತವಾಗಿ ನೀಡಲಾಗುತ್ತದೆ. ಪ್ರಸಾದದ ವೆಚ್ಚವನ್ನು ಡಿವೈಡ್ ಲೆಕ್ಕಾಚಾರದಲ್ಲಿ ಪಾವತಿ ಮಾಡಬೇಕಾಗುತ್ತದೆ.ಭಾವುಕರಾದ ಶ್ರೀಗಳು:ಇದೆಲ್ಲವೂ ಮಕ್ಕಳಿಗೆ ತಲುಪಲಿ ಎಂದು ನೀವೆಲ್ಲ ಆರ್ಶೀವಾದ ಮಾಡಬೇಕು. ನೀವು ಹೃದಯ ತುಂಬಿ ಆರ್ಶಿವಾದ ಮಾಡಬೇಕು ಎಂದು ಭಾವುಕರಾದರು. ನನ್ನ ಹುಟ್ಟೆ ಜೋಳಗಿಯಲ್ಲಿದೆ. ಜೋಳಿಗೆ ಹಿಡಿದುಕೊಂಡೆ ಹುಟ್ಟಿದ್ದೇನೆ, ಈಗಲೂ ಜೋಳಿಗೆ ಹಿಡಿದುಕೊಂಡಿದ್ದೇನೆ, ಅರಿವೆಯ ಜೋಳಿಗೆ ಹೋಗಿ, ಅರಿವಿನ ಜೋಳಿಗೆ ಬಂದಿದೆ. ಈ ಜೋಳಿಗೆ ಹಿಡಿದುಕೊಂಡು ಕೊಂಡು ತಿರುಗಿದಾಗ ನಾನು ಕೇಳಿದ್ದನ್ನು ಕೇಳದ್ದನ್ನು ನೀಡಿದರು. ಈ ಜೋಳಿಗೆಗೆ ತೂತು ಬಿದ್ದಿದೆ ಎನ್ನುವುದು ನೋಡಿದಾಗ ಗೊತ್ತಾಯಿತು. ಹೀಗಾಗಿ ಲೆಕ್ಕಾಚಾರ ಮಾಡಲು ಆಗುವುದಿಲ್ಲ. ಜೋಳಿಗೆಗೆ ಆಡಿಟ್ ಇರುವುದಿಲ್ಲ ಎಂದು ಹೇಳಿದರು.