ಗುತ್ತಿಗೆದಾರರ ‘ಲೆಸ್’ ಆಟಕ್ಕೆ ನಗರಸಭೆ ತಬ್ಬಿಬ್ಬು!
ಸಾರಾಂಶ
ಸಾಮಾನ್ಯವಾಗಿ ಗುತ್ತಿಗೆದಾರರು ಶೇ. 5ರಿಂದ 10ರಷ್ಟು ಕಡಿಮೆ ದರಕ್ಕೆ ಬಿಡ್‌ ಸಲ್ಲಿಸುವುದು ಸಾಮಾನ್ಯ. ಆದರೆ, ಕೊಪ್ಪಳ ನಗರಸಭೆಯ ಬೀದಿದೀಪ ಅಳವಡಿಕೆ ಕಾಮಗಾರಿಗೆ ನಿಗದಿತ ಮೊತ್ತಕ್ಕಿಂತ ಶೇ. 50ರಷ್ಟು ಕಡಿಮೆ ದರಕ್ಕೆ ಬಿಡ್‌ ಸಲ್ಲಿಸಿರುವುದು ಅಧಿಕಾರಿಗಳನ್ನು ಇಕ್ಕಟ್ಟಿಗೆ ಸಿಲುಕಿಸಿದೆ.
ಸೋಮರಡ್ಡಿ ಅಳವಂಡಿ
₹18 ಲಕ್ಷದ ಕಾಮಗಾರಿಗೆ ₹9 ಲಕ್ಷದ ಬಿಡ್‌: ಕೊಪ್ಪಳ ನಗರಸಭೆ ವ್ಯಾಪ್ತಿಯಲ್ಲಿ ಒಂದು ವರ್ಷದ ಅವಧಿಗೆ ಬೀದಿದೀಪ ಅಳವಡಿಕೆ ಹಾಗೂ ನಿರ್ವಹಣೆಗಾಗಿ ವಿದ್ಯುತ್‌ ದೀಪಗಳ ಲೆಕ್ಕಾಚಾರದ ಆಧಾರದಲ್ಲಿ ₹18 ಲಕ್ಷ ಮೊತ್ತಕ್ಕೆ ಟೆಂಡರ್‌ ಕರೆಯಲಾಗಿದೆ. ಆದರೆ, ಗುತ್ತಿಗೆದಾರರೊಬ್ಬರು ಕೇವಲ ₹9 ಲಕ್ಷಕ್ಕೆ ಕಾಮಗಾರಿ ನಿರ್ವಹಿಸುವುದಾಗಿ ಬಿಡ್‌ ಸಲ್ಲಿಸಿದ್ದಾರೆ. ನಿಗದಿತ ಮೊತ್ತದ ಅರ್ಧದಷ್ಟು ಹಣಕ್ಕೆ ಕಾಮಗಾರಿ ಪೂರ್ಣಗೊಳಿಸುವುದಾದರೂ ಹೇಗೆ ಎಂಬ ಪ್ರಶ್ನೆ ನಗರಸಭೆ ಅಧಿಕಾರಿಗಳನ್ನು ಕಾಡುತ್ತಿದೆ. ಈ ಹಿನ್ನೆಲೆಯಲ್ಲಿ ಟೆಂಡರ್‌ ಪ್ರಕ್ರಿಯೆ ಇನ್ನೂ ಪೂರ್ಣಗೊಂಡಿಲ್ಲ.
ಲೆಕ್ಕಾಚಾರದಲ್ಲಿ ಗೋಲ್‌ಮಾಲ್‌ ಶಂಕೆ: ನಗರಸಭೆ ವ್ಯಾಪ್ತಿಯಲ್ಲಿ ಬೀದಿದೀಪ ಅಳವಡಿಕೆ ಹೆಸರಿನಲ್ಲಿ ಈ ಹಿಂದೆ ಬೋಗಸ್‌ ಬಿಲ್‌ ಸೃಷ್ಟಿಸಿ ಹಣ ದುರುಪಯೋಗ ಮಾಡಲಾಗುತ್ತಿದೆ ಎಂಬ ಆರೋಪಗಳು ಕೇಳಿಬಂದಿವೆ. ಕೆಲವೇ ದೀಪಗಳನ್ನು ಅಳವಡಿಸಿ ಹೆಚ್ಚಿನ ಸಂಖ್ಯೆಯ ದೀಪಗಳನ್ನು ಅಳವಡಿಸಿದಂತೆ ಲೆಕ್ಕ ತೋರಿಸುವ ಮೂಲಕ ಹಣ ಪಡೆಯಲಾಗುತ್ತಿದೆ ಎಂಬ ದೂರುಗಳೂ ಇವೆ. ನಿಜವಾದ ಕಾಮಗಾರಿ ಪ್ರಮಾಣಕ್ಕೂ ಬಿಲ್‌ನಲ್ಲಿ ತೋರಿಸುವ ಲೆಕ್ಕಕ್ಕೂ ವ್ಯತ್ಯಾಸವಿದ್ದರೆ, ಸಾರ್ವಜನಿಕರ ಹಣ ದುರುಪಯೋಗವಾಗುವ ಸಾಧ್ಯತೆ ಇದೆ.ಈಗ ಶೇ. 50ರಷ್ಟು ಕಡಿಮೆ ಬಿಡ್‌ ಸಲ್ಲಿಸಿರುವ ಪ್ರಕರಣವೂ ಹಲವು ಅನುಮಾನಗಳಿಗೆ ಎಡೆಮಾಡಿಕೊಟ್ಟಿದೆ. ಕಡಿಮೆ ದರದಲ್ಲಿ ಕಾಮಗಾರಿ ಪಡೆದು, ನಂತರ ಹೆಚ್ಚುವರಿ ಕಾಮಗಾರಿ ಅಥವಾ ಇತರ ನೆಪಗಳಲ್ಲಿ ಹಣ ಪಡೆಯುವ ಉದ್ದೇಶವಿದೆಯೇ ಎಂಬ ಪ್ರಶ್ನೆ ಉದ್ಭವಿಸಿದೆ. ಆದರೆ, ಈ ಕುರಿತು ಸಮಗ್ರ ಪರಿಶೀಲನೆಯಿಂದಲೇ ಸತ್ಯಾಂಶ ಹೊರಬರಬೇಕಿದೆ.
ಗುತ್ತಿಗೆದಾರರು ಅತಿ ಕಡಿಮೆ ದರಕ್ಕೆ ಬಿಡ್‌ ಸಲ್ಲಿಸುವುದರಿಂದ ನಗರಸಭೆಗೆ ಆರಂಭದಲ್ಲಿ ಉಳಿತಾಯವಾದಂತೆ ಕಂಡರೂ, ನಿಗದಿತ ಗುಣಮಟ್ಟದಲ್ಲಿ ಕಾಮಗಾರಿ ಪೂರ್ಣಗೊಳ್ಳುತ್ತದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳುವುದು ಮುಖ್ಯವಾಗಿದೆ. ಈ ಹಿನ್ನೆಲೆಯಲ್ಲಿ ಬೀದಿದೀಪ ಕಾಮಗಾರಿಯ ಟೆಂಡರ್‌ ಪ್ರಕ್ರಿಯೆ ಹಾಗೂ ಹಿಂದಿನ ಕಾಮಗಾರಿಗಳ ಲೆಕ್ಕಪತ್ರಗಳ ಸಮಗ್ರ ತನಿಖೆ ನಡೆಸಬೇಕೆಂಬ ಒತ್ತಾಯ ಕೇಳಿಬಂದಿದೆ.