ಸೃಜನಶೀಲ ಬರಹಗಾರರಿಂದ ಸಮಾಜ ವಿಜ್ಞಾನಿಗಳ ಕಾರ್ಯ

ಕನ್ನಡಪ್ರಭ ವಾರ್ತೆ, ತುಮಕೂರುಕನ್ನಡದ ಸೃಜನಶೀಲ ಬರಹಗಾರರು ಸಮಾಜ ವಿಜ್ಞಾನಿಗಳ ಪಾತ್ರವನ್ನು ನಿರ್ವಹಿಸಿಕೊಂಡು ಬಂದಿರುವುದು ಗಮನಾರ್ಹ ಸಂಗತಿ ಎಂದು ವಿದ್ವಾಂಸ, ವಿಮರ್ಶಕಡಾ. ರಾಜೇಂದ್ರಚೆನ್ನಿ ಅಭಿಪ್ರಾಯಪಟ್ಟರು.ತುಮಕೂರು ವಿಶ್ವವಿದ್ಯಾನಿಲಯದ ಶ್ರೀ ಅಲ್ಲಮಪ್ರಭು ಅಧ್ಯಯನ ಪೀಠ ಹಾಗೂ ಪ್ರಸಾರಾಂಗದ ಸಂಯುಕ್ತ ಆಶ್ರಯದಲ್ಲಿ ಹಮ್ಮಿಕೊಳ್ಳಲಾಗಿದ್ದ ಕನ್ನಡ ಸಾಹಿತ್ಯ ಮತ್ತು ಸಾಮಾಜಿಕ ಚಿಂತನೆಕುರಿತ ವಿಶೇಷ ಉಪನ್ಯಾಸ ಕಾರ್ಯಕ್ರಮದಲ್ಲಿ ಮಾತನಾಡಿದರು.ಕನ್ನಡ ಸಾಹಿತ್ಯವು ಜಾತಿ ಮತ್ತು ಲಿಂಗದಂತಹ ಸಾಮಾಜಿಕ ಸಮಸ್ಯೆಗಳಿಗೆ ಯಾವಾಗಲೂ ಸೂಕ್ಷ್ಮವಾಗಿ ಸ್ಪಂದಿಸಿದೆ. ಈ ನಿಟ್ಟಿನಲ್ಲಿ, ಆಧುನಿಕ ಪೂರ್ವ ಕಾಲದಿಂದ ಆಧುನಿಕ ಕಾಲದವರೆಗೆ ನಮ್ಮ ಸಾಹಿತ್ಯವು ಬಹಳ ಪ್ರಗತಿಪರವಾಗಿದೆ ಎಂದರು.ಡಾ. ಯು.ಆರ್. ಅನಂತಮೂರ್ತಿ ಅವರು ದ್ವಿಮಾನದ ಪರಿ ಭಾಷೆಯಲ್ಲಿ ಯೋಚಿಸಿದರು. ಲಂಕೇಶ್ ಮತ್ತು ತೇಜಸ್ವಿ ಆ ದ್ವಿದಳ ಚಿಂತನೆಗಳನ್ನು ಮುರಿಯಲು ಪ್ರಯತ್ನಿಸಿದರು. ಆದಾಗ್ಯೂ, ರಾಮ ಮನೋಹರ ಲೋಹಿಯಾ ಅವರ ಆಲೋಚನೆಗಳಿಂದ ಪ್ರಭಾವಿತರಾದ ಈ ಬರಹಗಾರರು ಜಾತಿ ಪ್ರಶ್ನೆಯೊಂದಿಗೆ ಬಹಳ ಸೃಜನಾತ್ಮಕವಾಗಿ ತೊಡಗಿಸಿಕೊಂಡರು ಎಂದು ವಿಶ್ಲೇಷಿಸಿದರು. ಕನ್ನಡ ಸಾಹಿತ್ಯದಲ್ಲಿ ಸಾಮಾಜಿಕ ಚಿಂತನೆಯ ಪರಂಪರೆಯ ಕುರಿತು ಬೆಳಕು ಚೆಲ್ಲಿದ, ಪ್ರೊ.ಚೆನ್ನಿ 12 ನೇ ಶತಮಾನದ ವಚನ ಚಳುವಳಿಯಿಂದ ಆರಂಭಿಸಿ ಆಧುನಿಕ ಪೂರ್ವ, ನವೋದಯ ಮತ್ತು ನವ್ಯ ಸಾಹಿತ್ಯದವರೆಗೆ ವಿಶ್ಲೇಷಣೆ ನಡೆಸಿದರು. ಕನ್ನಡ ಸಾಹಿತ್ಯದ ಸಾಮಾಜಿಕ ಸಂವೇದನೆಯನ್ನು ಪ್ರತಿಪಾದಿಸಿದರು.ಕಾರ್ಯಕ್ರಮದಲ್ಲಿಶ್ರೀ ಅಲ್ಲಮಪ್ರಭು ಅಧ್ಯಯನ ಪೀಠದ ನಿರ್ದೇಶಕರಾದ ಪ್ರೊ.ಎನ್.ಎಸ್. ಗುಂಡೂರಹಾಗೂ ಪ್ರಸಾರಾಂಗದ ನಿರ್ದೇಶಕರಾದ ಪ್ರೊ.ಶಿವಲಿಂಗಸ್ವಾಮಿ ಎಚ್.ಕೆ.ಉಪಸ್ಥಿತರಿದ್ದರು.