ಗಂಗಾವತಿ - ದರೋಜಿ ರೈಲ್ವೆ ಮಾರ್ಗಕ್ಕೆ ಅನುದಾನ ಬಿಡುಗಡೆಗೆ ಒತ್ತಾಯ

ಗಂಗಾವತಿ: ಗಂಗಾವತಿ - ದರೋಜಿ (36 ಕಿಮೀ) ಹೊಸ ರೈಲ್ವೆ ಮಾರ್ಗಕ್ಕೆ ತಕ್ಷಣ ಅನುದಾನ ಬಿಡುಗಡೆ ಮಾಡುವಂತೆ ಕೇಂದ್ರ ರೈಲ್ವೆ ಸಚಿವ ವಿ. ಸೋಮಣ್ಣ ಅವರನ್ನು ಮಾಜಿ ಶಾಸಕ ಪರಣ್ಣ ಮುನವಳ್ಳಿ ಒತ್ತಾಯಿಸಿದ್ದಾರೆ.

ಸಚಿವರ ಬೆಂಗಳೂರು ನಿವಾಸಕ್ಕೆ ನಿಯೋಗ ತೆರಳಿ ಮನವಿ ಅರ್ಪಿಸಿತು. ಗಂಗಾವತಿ - ಮುನಿರಾಬಾದ್ - ಗಿಣಿಗೇರಿ ಮೂಲಕ ಬಳ್ಳಾರಿಗೆ 93 ಕಿ.ಮೀ. ಸುತ್ತು ಬಳಸಿ ಹೋಗಬೇಕಾಗಿದೆ. ಗಂಗಾವತಿ - ದರೋಜಿ ನೇರ ಮಾರ್ಗ (36 ಕಿಮೀ ಮಾತ್ರ) ನಿರ್ಮಾಣವಾದರೆ ಈ ಅಂತರ 57 ಕಿಮೀ ಕಡಿಮೆಯಾಗುತ್ತದೆ. ಬಳ್ಳಾರಿ ಜಿಲ್ಲೆಯ ಕಂಪ್ಲಿ ಮತ್ತು ಸಂಡೂರು ವಿಧಾನಸಭಾ ಕ್ಷೇತ್ರದ ಜನರಿಗೆ ರೈಲ್ವೆ ಸೌಕರ್ಯ ದೊರೆಯಲಿದೆ ಎಂದು ವಿವರಿಸಿದರು.

ಈಗಾಗಲೇ ಮಾರ್ಗದ ಸರ್ವೇ ಆಗಿ, ಡಿಪಿಆರ್ ಸಿದ್ಧವಾಗಿದೆ. ಆದರೆ ಅನುದಾನದ ಕೊರತೆಯಿಂದ ಕಾಮಗಾರಿ ನನೆಗುದಿಗೆ ಬಿದ್ದಿದೆ. ಈ ಯೋಜನೆ ಪೂರ್ಣಗೊಂಡರೆ ಗಂಗಾವತಿ-ಬಳ್ಳಾರಿ-ಗುಂತಕಲ್ ನೇರ ಸಂಪರ್ಕ ಸಿಗುತ್ತದೆ. ರೈತರು, ವಿದ್ಯಾರ್ಥಿಗಳು ಮತ್ತು ವ್ಯಾಪಾರಿಗಳಿಗೆ ಅತ್ಯಂತ ಅನುಕೂಲವಾಗುತ್ತದೆ. ಆದ್ದರಿಂದ 2026-27ನೇ ಸಾಲಿನಲ್ಲಿ ಈ ಯೋಜನೆಗೆ ವಿಶೇಷ ಅನುದಾನ ಬಿಡುಗಡೆ ಮಾಡಿ, ಕಾಮಗಾರಿ ಪ್ರಾರಂಭಿಸಲು ಆದೇಶಿಸಬೇಕು ಎಂದು ಕೋರಿದ್ದಾರೆ.

ಸಿಂಧನೂರು - ಗಂಗಾವತಿ - ಹುಬ್ಬಳ್ಳಿ ರೈಲನ್ನು ಗೋವಾ ವರೆಗೆ ವಿಸ್ತರಿಸಬೇಕು. ಪ್ರಸ್ತುತ ಸಿಂಧನೂರು - ಗಂಗಾವತಿ - ಹುಬ್ಬಳ್ಳಿ ಪ್ಯಾಸೆಂಜರ್ ರೈಲು ಕಾರ್ಯನಿರ್ವಹಿಸುತ್ತಿದೆ. ಹಂಪಿ, ಆನೆಗುಂದಿ, ಕಿಷ್ಕಿಂಧಾ ಪ್ರದೇಶಕ್ಕೆ ಪ್ರತಿದಿನ ಸಾವಿರಾರು ದೇಶ-ವಿದೇಶಿ ಪ್ರವಾಸಿಗರು ಬರುತ್ತಾರೆ. ಗೋವಾ ಕೂಡ ಪ್ರಮುಖ ಪ್ರವಾಸಿ ತಾಣ. ಆದ್ದರಿಂದ ಈ ರೈಲನ್ನು ಸಿಂಧನೂರು - ಹುಬ್ಬಳ್ಳಿ - ಮಡಗಾಂವ್ (ಗೋವಾ) ವರೆಗೆ ವಿಸ್ತರಿಸಿದರೆ ಉತ್ತರ ಕರ್ನಾಟಕದ ಪ್ರವಾಸೋದ್ಯಮಕ್ಕೆ ದೊಡ್ಡ ಉತ್ತೇಜನ ಸಿಗುತ್ತದೆ ಮತ್ತು ಭಕ್ತರಿಗೆ ಹಾಗೂ ಪ್ರವಾಸಿಗರಿಗೆ ನೇರ ಸಂಪರ್ಕ ಸಿಗುತ್ತದೆ ಎಂದು ನಿಯೋಗ ಮನವಿ ಮಾಡಿದೆ.

ಸಿಂಧನೂರು - ಬೆಂಗಳೂರು ನೂತನ ವಂದೇ ಭಾರತ್ ರೈಲು ಮಂಜೂರಿ ಮಾಡಬೇಕು ಎಂದು ಕೋರಿರುವ ನಿಯೋಗ ಗಂಗಾವತಿಯ ನೂತನ ಬಸ್ ನಿಲ್ದಾಣದ ಬಳಿ ಹೊಸ ರೈಲ್ವೆ ನಿಲ್ದಾಣ , ರೈಲ್ವೆ ಸ್ಟಾಫ್‌ಗೆ ಅನುಮತಿ ನೀಡಬೇಕು. ಕೂಡಲೇ ಈ ಬೇಡಿಕೆಗಳನ್ನು ಈಡೇರಿಸಬೇಕು ಎಂದು ಮನವಿಯಲ್ಲಿ ಕೋರಿದೆ.

ಈ ವೇಳೆ ತಾಲೂಕು ಲಾರಿ ಮಾಲೀಕರ ಸಂಘದ ಅಧ್ಯಕ್ಷ ಸುರೇಶ್ ಸಿಂಗನಾಳ, ಗಂಗಾವತಿ ವಕೀಲರ ಸಂಘದ ಕಾರ್ಯದರ್ಶಿ ಎಚ್.ಎಂ. ಮಂಜುನಾಥ ಮತ್ತು ಕೊಟ್ಟೂರೇಶ್ವರ ವಿದ್ಯಾವರ್ಧಕ ಸಂಘದ ಸದಸ್ಯ ಕೆ. ವಿಶ್ವನಾಥ ಸ್ವಾಮಿ ಭಾಗವಹಿಸಿದ್ದರು.