₹10 ಕೋಟಿ ಆಸ್ತಿ ಒಡೆಯ ದಿಂಗಾಲೇಶ್ವರ ಸ್ವಾಮೀಜಿ

ಕನ್ನಡಪ್ರಭ ವಾರ್ತೆ ಧಾರವಾಡ

ಶಿರಹಟ್ಟಿಯ ಫಕೀರ ದಿಂಗಾಲೇಶ್ವರ ಸ್ವಾಮೀಜಿ ಗುರುವಾರ ಲೋಕಸಭೆ ಚುನಾವಣೆಗೆ ಉಮೇದುವಾರಿಕೆ ಸಲ್ಲಿಸಿದ್ದು, ಸ್ವಾಮೀಜಿ ಸಲ್ಲಿಸಿದ ನಾಮಪತ್ರದ ಅಫಿಡವಿಟ್‌ನಲ್ಲಿ ತಮ್ಮ ಹಾಗೂ ದಿಂಗಾಲೇಶ್ವರ ಮಠದ ಜಂಟಿಯಾಗಿರುವ ಚರಾಸ್ತಿ ಹಾಗೂ ಸ್ಥಿರಾಸ್ತಿಯನ್ನು ಘೋಷಿಸಿಕೊಂಡಿದ್ದಾರೆ.

₹1.22 ಕೋಟಿ ಚರಾಸ್ತಿ ಹಾಗೂ ₹8.52 ಕೋಟಿ ಸ್ಥಿರಾಸ್ತಿ ಸೇರಿ ಒಟ್ಟು ₹9.74 ಕೋಟಿ ಆಸ್ತಿ ಇರುವುದಾಗಿ ಸ್ವಾಮೀಜಿ ಘೋಷಿಸಿಕೊಂಡಿದ್ದಾರೆ. ಜತೆಗೆ ₹39.68 ಲಕ್ಷ ಹೊಣೆಗಾರಿಕೆಯನ್ನು ಅಫಿಡವಿಟ್‌ನಲ್ಲಿ ತೋರಿಸಿದ್ದಾರೆ. ಸ್ವಾಮೀಜಿ ಕೈಯಲ್ಲಿ ₹1.25 ಲಕ್ಷ ನಗದು ಇದ್ದು, ಬಾಳೇಹೊಸೂರಿನ ವಿವಿಧ ಬ್ಯಾಂಕ್‌ ಹಾಗೂ ಸಹಕಾರಿ ಬ್ಯಾಂಕ್‌ಗಳಲ್ಲಿ ಸುಮಾರು ₹38 ಲಕ್ಷ ಉಳಿತಾಯ ಹಾಗೂ ಠೇವಣಿ ಇಟ್ಟಿದ್ದಾರೆ. ಬಾಳೆಹೊಸೂರಿನ ಸಹಕಾರಿ ಸಂಘಗಳಲ್ಲಿ ಶೇರ್‌ ಹೊಂದಿದ್ದಾರೆ. ₹39.50 ಲಕ್ಷ ಮೌಲ್ಯದ ಟೋಯೊಟೋ ಇನ್ನೋವಾ ಹೈಬ್ರಿಡ್‌ ಕಾರು, ಮಹಿಂದ್ರಾ ಟ್ರ್ಯಾಕ್ಟರ್‌, ₹18.30 ಲಕ್ಷ ಮೌಲ್ಯದ ಟೋಯೋಟಾ ಇನ್ನೋವಾ ಕಾರು ಹಾಗೂ ಬಾಲೇಹೊಸೂರಿನಲ್ಲಿ ಇಂಗ್ಲಿಷ್‌ ಮಾಧ್ಯಮ ಶಾಲೆಯನ್ನು ಸ್ವಾಮೀಜಿ ಹೊಂದಿದ್ದಾರೆ. 820 ಗ್ರಾಂ ಬೆಳ್ಳಿ, 18.9 ಗ್ರಾಂ ಚಿನ್ನ ಸೇರಿದಂತೆ ₹1.22 ಕೋಟಿ ಚರಾಸ್ತಿ ಇರುವುದಾಗಿ ಘೋಷಿಸಿಕೊಂಡಿದ್ದಾರೆ.

ಅದೇ ರೀತಿ ಬಾಲೇಹೊಸೂರಿನಲ್ಲಿ ಪೂರ್ವಿಕ ಮಠದಿಂದ ಬಂದ 23 ಎಕರೆ ಕೃಷಿ ಭೂಮಿ ಇದೆ. ವಿವಿಧೆಡೆ ಸುಮಾರು ಎಂಟು ಸಾವಿರ ಚದರಿ ಅಡಿ ಕೃಷಿಯೇತರ ಭೂಮಿ ಇದ್ದು ಅದರ ಮೌಲ್ಯ ₹1.25 ಕೋಟಿ, ₹2 ಕೋಟಿ ಮೌಲ್ಯದ ಶಾಲೆ ಸೇರಿದಂತೆ ಒಟ್ಟಾರೆ ಮಠ ಹಾಗೂ ತಮ್ಮ ಹೆಸರಿನ ಜಂಟಿಯಾಗಿ ₹8.52 ಕೋಟಿ ಸ್ಥಿರಾಸ್ತಿ ಇರುವುದಾಗಿ ಘೋಷಿಸಿಕೊಂಡಿದ್ದಾರೆ.48 ವರ್ಷದ ಸ್ವಾಮೀಜಿ ಮೊದಲಿನ ಹೆಸರು ವೀರಯ್ಯ. ಸನ್ಯಾಸತ್ವ ಸ್ವೀಕರಿಸಿದ ನಂತರ ಬಾಲೇಹೊಸೂರ-ಶಿರಹಟ್ಟಿಯ ದಿಂಗಾಲೇಶ್ವರ ಮಠದ ದಿಂಗಾಲೇಶ್ವರ ಸ್ವಾಮೀಜಿಯಾಗಿದ್ದು, ತಮ್ಮ ಹಾಗೂ ಶ್ರೀಮಠದ ಹೆಸರಿನಲ್ಲಿ ಜಂಟಿಯಾಗಿರುವ ಆಸ್ತಿಯನ್ನು ಘೋಷಿಸಿಕೊಂಡಿದ್ದಾರೆ.