ಮುಂದುವರಿದ ಪ್ರತಿಭಟನೆ: ತಮಟೆ ಚಳವಳಿ ಮೂಲಕ ರೈತರ ಆಕ್ರೋಶ
ಸಾರಾಂಶ
ಕರ್ನಾಟಕ ರಾಜ್ಯ ರೈತ ಸಂಘ ಹಾಗೂ ಹಸಿರುಸೇನೆ ಹಾಗೂ ಕೊಳ್ಳೇಗಾಲ ತಾಲೂಕು ಗುಂಡಾಲ್ ಜಲಾಶಯದ ಹಳೆ ಸ್ಥಿರ ಅಚ್ಚುಕಟ್ಟು ವ್ಯಾಪ್ತಿಯ ರೈತರ ಹಿತರಕ್ಷಣಾ ಸಮಿತಿ ವಿವಿಧ ಬೇಡಿಕೆ ಈಡೇರಿಕೆಗೆ ಆಗ್ರಹಿಸಿ ನಡೆಸಲಾಗುತ್ತಿರುವ ಅನಿರ್ದಿಷ್ಟಾವಧಿ ಪ್ರತಿಭಟನೆ 25ನೇ ದಿನದಲ್ಲಿ ಮುಂದುವರಿದಿದ್ದು, ಗುರುವಾರ ಬೆಳಗ್ಗೆ ಪ್ರತಿಭಟನಾಕಾರರು ತಮಟೆ ಚಳವಳಿ ನಡೆಸುವ ಮೂಲಕ ಜಿಲ್ಲಾಡಳಿತ, ತಾಲೂಕು ಆಡಳಿತಕ್ಕೆ ಎಚ್ಚರಿಕೆ ರವಾನಿಸಿದರು.
- ದಪ್ಪ ಚರ್ಮದ ಅಧಿಕಾರಿಗಳಿಗೆ ರೈತರ ಸಮಸ್ಯೆ, ಪ್ರತಿಭಟನೆ ಕೂಗು ಕೇಳುತ್ತಿಲ್ಲ- ಆಕ್ರೋಶಕನ್ನಡಪ್ರಭ ವಾರ್ತೆ ಕೊಳ್ಳೇಗಾಲ
ಪಟ್ಟಣದ ಬಸ್ ನಿಲ್ದಾಣದಿಂದ ಮೆರವಣಿಗೆ ಹೊರಟ ಪ್ರತಿಭಟನಾಕಾರರು ಖಾಲಿ ಬಿಂದಿಗೆ ತಲೆಮೇಲೆ ಹೊತ್ತು, ಶಂಖ, ಜಾಗಟೆ ಹಾಗೂ ತಮಟೆ ಶಬ್ದದೊಂದಿಗೆ ತಾಲೂಕು ಕಚೇರಿಯವರೆಗೆ ತೆರಳಿ 25ದಿನದ ಪ್ರತಿಭಟನೆ ಮುಂದುವರಿಸಿದರು.
ಈ ವೇಳೆ ರೈತ ಸಂಘದ ಅಧ್ಯಕ್ಷ ಸರಗೂರು ನಾಗರಾಜು ಮಾತನಾಡಿ, ಕೆರೆ ಅಭಿವೃದ್ದಿಪಡಿಸಿ ಅತಿಕ್ರಮ ತೆರವುಗೊಳಿಸಿ ಗ್ರಾಮಠಾಣೆ ನಿಗದಿಮಾಡಿ ಇ-ಸ್ವತ್ತು ನೀಡಿ ಎಂಬಿತ್ಯಾದಿ ಬೇಡಿಕೆಗಳಿಗೆ ತಾಲೂಕು ಆಡಳಿತ, ಜಿಲ್ಲಾಡಳಿತ ಮೌನ ತಾಳಿವೆ. ನ್ಯಾಯಯುತ ಬೇಡಿಕೆಗೂ ಅಧಿಕಾರಿಗಳು ಸ್ಪಂದಿಸುತ್ತಿಲ್ಲ ಎಂದು ದೂರಿದರು.ಈ ವೇಳೆ ಗುಂಡಾಲ್ ಹಿತರಕ್ಷಣಾ ಸಮಿತಿ ಅಧ್ಯಕ್ಷ ದಶರಥ್ ಮಾತನಾಡಿ ನಮ್ಮದು ನ್ಯಾಯಯುತ ಪ್ರತಿಭಟನೆ, ನಾವು ಸರ್ಕಾರಿ ಆಸ್ತಿ ಉಳಿಸಿ, ಸಾರ್ವಜನಿಕರ ಸಮಸ್ಯೆಗೆ ಸ್ಪಂದಿಸಿ, ನಾಲೆಗಳ ಹೂಳೆತ್ತಿಸಿ, ಅತಿಕ್ರಮ ತೆರವು ಮಾಡಿ ರೈತರಿಗೆ ಅನುಕೂಲ ಮಾಡಿಕೊಡಿ ಎಂದು 25ದಿನಗಳಿಂದಲೂ ಅಹೋ-ರಾತ್ರಿ ಧರಣಿ ನಡೆಸುತ್ತಿದ್ದೇವೆ, ಆದರೆ ದಪ್ಪ ಚರ್ಮದ ಅಧಿಕಾರಿಗಳಿಗೆ ಇದಾವುದು ಕೇಳುತ್ತಿಲ್ಲ, ಇದೆ ರೀತಿ ಮುಂದುವರಿದರೆ ಪ್ರತಿಭಟನೆ ಉಗ್ರ ಸ್ವರೂಪಗೊಳಿಸಲಾಗುವುದು ಎಂದು ಎಚ್ಚರಿಸಿದರು.
------
ಕೊಳ್ಳೇಗಾಲದಲ್ಲಿ ಗುಂಡಾಲ್ ಹಿತರಕ್ಷಣಾ ಸಮಿತಿ ಹಾಗೂ ರೈತ ಸಂಘಟನೆಗಳ ವತಿಯಿಂದ 25ನೇದಿನದ ಅಹೋರಾತ್ರಿ ಧರಣಿ ಅಂಗವಾಗಿ ಗುರುವಾರ ತಮಟೆ ಚಳವಳಿ ನಡೆಸಿ ಅಧಿಕಾರಿಗಳನ್ನು ಎಚ್ಚರಿಸಲಾಯಿತು. ಧಶರಥ್, ಚಿಕ್ಕಮಾಧು, ಬಸವರಾಜು ಇನ್ನಿತರಿದ್ದರು.