ಗೌಡೇಟಿ ಪ್ರಭಾಕರ್ ಮಾಡಿರುವ ಆರೋಪದಲ್ಲಿ ಹುರುಳಿಲ್ಲ
ಸಾರಾಂಶ
ಇತ್ತೀಚೆಗೆ ಜಮೀನು ಖಾತೆಗಳ ಪರಬಾರೆ ವಿಚಾರಕ್ಕೆ ಸಂಬಂಧಪಟ್ಟಂತೆ ತಹಶೀಲ್ದಾರ್ ಹಾಗೂ ಗ್ರಾಮ ಆಡಳಿತಾಧಿಕಾರಿಯ ವಿರುದ್ಧ ತಾಲೂಕಿನ ಗೌಡೇಟಿ ಪ್ರಭಾಕರ್ ಮಾಡಿರುವ ಆರೋಪ ಸತ್ಯಕ್ಕೆ ದೂರ
ಕನ್ನಡಪ್ರಭ ವಾರ್ತೆ ಪಾವಗಡ ಇತ್ತೀಚೆಗೆ ಜಮೀನು ಖಾತೆಗಳ ಪರಬಾರೆ ವಿಚಾರಕ್ಕೆ ಸಂಬಂಧಪಟ್ಟಂತೆ ತಹಶೀಲ್ದಾರ್ ಹಾಗೂ ಗ್ರಾಮ ಆಡಳಿತಾಧಿಕಾರಿಯ ವಿರುದ್ಧ ತಾಲೂಕಿನ ಗೌಡೇಟಿ ಪ್ರಭಾಕರ್ ಮಾಡಿರುವ ಆರೋಪ ಸತ್ಯಕ್ಕೆ ದೂರವಾಗಿದ್ದು ಅವರ ಆರೋಪಕ್ಕೂ ನಮ್ಮ ಜಮೀನಿಗೂ ಸಂಬಂಧವೇ ಇಲ್ಲ ಎಂದು ರೈತ ಸತ್ಯನಾರಾಯಣಶಾಸ್ತ್ರಿ ಹಾಗೂ ಮಹಾ ಆದಿಗ ಮೀಸಲಾತಿ ಹೋರಾಟ ಸಮಿತಿ ರಾಜ್ಯಾಧ್ಯಕ್ಷ ಕನ್ನಮೇಡಿ ಕೃಷ್ಣಮೂರ್ತಿ ಸ್ಪಷ್ಟನೆ ನೀಡಿದರು. ಇದೇ ವಿಚಾರಕ್ಕೆ ಸಂಬಂಧಪಟ್ಟಂತೆ ಬುಧವಾರ ಪಟ್ಟಣದ ಪ್ರವಾಸಿ ಮಂದಿರದಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಸತ್ಯನಾರಾಯಣಶಾಸ್ತ್ರಿ ತಹಸೀಲ್ದಾರ್ ಹಾಗೂ ಇತರೆ ಕಂದಾಯ ಇಲಾಖೆಯ ಅಧಿಕಾರಿಗಳ ವಿರುದ್ಧ ಮಾದ್ಯಮಗಳ ಮೂಲಕ ಏಕವಚನದಲ್ಲಿ ಪ್ರಭಾಕರ್ ಮಾತನಾಡಿದ್ದು ಅವರ ನಡೆ ಸೂಕ್ತವಲ್ಲ ಎಂದು ಆಕ್ರೋಶ ಹೊರಹಾಕಿದರು.
ದೂರುದಾರರು ಮಾಡುತ್ತಿರುವ ಆರೋಪಗಳಲ್ಲಿ ನೈಜತೆಯಿಲ್ಲ, ನಮ್ಮ ಹೆಸರನ್ನು ಅಥವಾ ಕುಟುಂಬದ ಹೆಸರನ್ನು ಬಳಸಿಕೊಂಡು ಜಮೀನಿನ ವಿಚಾರದಲ್ಲಿ ಇಲ್ಲಸಲ್ಲದ ವಿವಾದ ಸೃಷ್ಟಿಸಿದ್ದು ಅಧಿಕಾರಿಗಳ ಮೇಲೆ ಆರೋಪ ಮಾಡುವ ಉದ್ದೇಶದಿಂದ ನಮ್ಮನ್ನು ಎಳೆದು ತಂದಿದ್ದಾರೆ. ವಂಶವೃಕ್ಷವೇ ಸುಳ್ಳಿನಿಂದ ಕೂಡಿದೆ.ಆ ವಂಶವೃಕ್ಷದಲ್ಲಿರುವ ಹೆಸರುಗಳಿಗೂ ನಮಗೂ ಯಾವುದೇ ಸಂಬಂಧವಿಲ್ಲ ನಕಲಿ ವಂಶವೃಕ್ಷ ಸೃಷ್ಟಿಸಿ ದಾರಿ ತಪ್ಪಿಸುವ ಕೆಲಸ ಮಾಡಲಾಗುತ್ತಿದೆ ಎಂದು ಆಕ್ರೋಶ ಹೊರಹಾಕಿದರು.
ಮಹಾ ಅದಿಗ ಹೋರಾಟ ಸಮಿತಿ ಅಧ್ಯಕ್ಷ ಕೃಷ್ಣಮೂರ್ತಿ ಮಾತನಾಡಿ ಗೌಡೇಟಿ ಪ್ರಭಾಕರ್ ರವರೇ ಸ್ವತಃ ಪ್ರಭಾಕರ್ ಅವರೇ ಭೂ ಕಬಳಿಕೆ ಮಾಡಿದ್ದು, ಕನಕಪುರ ಸರ್ವೆ ನಂಬರ್ 20 ರಲ್ಲಿ ಸರ್ಕಾರದಿಂದ 4 ಎಕರೆ ಮಂಜೂರಾಗಿದೆ. ಮತ್ತೊಂದು 4 ಎಕರೆ ಜಮೀನನ್ನು ಇವರು ಅಕ್ರಮವಾಗಿ ಕಬಳಿಸಿದ್ದಾರೆ. ಇವರು ಕನಕಪುರ ಗ್ರಾಮದಲ್ಲಿ ಪ್ರಾರಂಭಿಸಿರುವ ಬಾರ್ ಅಂಡ್ ರೆಸ್ಟೋರೆಂಟ್ ನಿವೇಶನವು ಭೂ ಪರಿವರ್ತನೆ ಆಗಿಲ್ಲ. ದಲಿತ ಸಮುದಾಯದಿಂದ ಬಂದ ಅಧಿಕಾರಿಗಳನ್ನು ಅವಹೇಳನಕಾರಿಯಾಗಿ ಮಾತನಾಡಿಸುವುದು ಸಮಂಜಸವಲ್ಲ. ಪ್ರಭಾಕರ್ ತಮ್ಮ ಹಿತಾಸಕ್ತಿಗೆ ತಕ್ಕಂತೆ ದಾಖಲೆಗಳನ್ನು ವಿಶ್ಲೇಷಿಸುತ್ತಿದ್ದು,ಇದೇ ರೀತಿ ಸುಳ್ಳು ಆರೋಪಗಳನ್ನು ಮುಂದುವರೆಸಿದರೆ, ದಲಿತಪರ ಸಂಘಟನೆಗಳ ವತಿಯಿಂದ ಪ್ರತಿಭಟನೆ ಹಮ್ಮಿಕೊಳ್ಳಲು ಸಜ್ಜಾಗುವುದಾಗಿ ಎಚ್ಚರಿಕೆ ನೀಡಿದರು.