ಹೂವಿನಹಡಗಲಿ: ಗುರುವಿನ ಸ್ಥಾನ ಎಲ್ಲದಕ್ಕಿಂತ ದೊಡ್ಡದಾಗಿದ್ದು ಶಿಕ್ಷಕರನ್ನು ಗೌರವದಿಂದ ಕಾಣಬೇಕೆಂದು ಜಿಲ್ಲಾ ಪ್ರೌಢಶಾಲಾ ಸಹ ಶಿಕ್ಷಕರ ಸಂಘದ ಅಧ್ಯಕ್ಷ ಎನ್.ಜಿ ಮನೋಹರ್ ಹೇಳಿದರು.
ಸಂವಿಧಾನ ಶಿಲ್ಪಿ ಡಾ.ಬಿ.ಆರ್. ಅಂಬೇಡ್ಕರ್ ರವರ ಪ್ರತಿಭೆ ಗುರುತಿಸಿದ್ದು ಒಬ್ಬ ಗುರು. ಸ್ವಾಮಿ ವಿವೇಕಾನಂದ, ಅರಿಸ್ಟಾಟಲ್ ಮೊದಲಾದ ಮಹನೀಯರು ಪ್ರಖ್ಯಾತರಾದದ್ದು ಗುರುವಿನ ಅನುಗ್ರಹದಿಂದ ಎಂದು ಹೇಳಿದರು.
ಹರಪನಹಳ್ಳಿ, ಹೂವಿನಹಡಗಲಿ ಸಾಹಿತ್ಯ ಸಾಂಸ್ಕೃತಿಕವಾಗಿ ಜೀವಂತವಾಗಿರುವುದು ಶ್ರೇಷ್ಠ ಹಾಸ್ಯ ಸಾಹಿತಿ ಬೀಚಿ ಅವರ ವಿಚಾರ ಬದುಕು ಬರಹಗಳಿಂದ ಎಂದ ಅವರು, ಸತತ 28 ವರ್ಷ ನಿರಂತರವಾಗಿ ಉತ್ತಮ ಶಿಕ್ಷಕರನ್ನು ಗೌರವಿಸುವ ಬಳಗದ ಕಾರ್ಯವೈಖರಿ ಶ್ಲಾಘನೀಯ ಎಂದು ಬಣ್ಣಿಸಿದರು.ಸರ್ಕಾರಿ ನೌಕರರ ಸಂಘದ ಅಧ್ಯಕ್ಷ ಎ. ಕೊಟ್ರಗೌಡ ಮಾತನಾಡಿ, ಶಿಕ್ಷಕರನ್ನು ಗೌರವಿಸಿದರೆ ಸಮಾಜವನ್ನು ಗೌರವಿಸಿದಂತೆ. ಪ್ರಶಸ್ತಿಗಳು ಜವಾಬ್ದಾರಿ ಹೆಚ್ಚಿಸುತ್ತವೆ. ಬಳಗದ ಕಾರ್ಯಕ್ರಮಗಳಿಗೆ ಸಹಕಾರ ನೀಡುವುದಾಗಿ ಹೇಳಿದರು.
ಬೀಚಿ ಬಳಗದ ಅಧ್ಯಕ್ಷ ಸುರೇಶ ಅಂಗಡಿ ಅಧ್ಯಕ್ಷತೆ ವಹಿಸಿದ್ದರು. ಈ ಹಿಂದೆ ಗ್ರಂಥಾಲಯ ಅಧಿಕಾರಿಗಳಾಗಿದ್ದ ಷರಾಫ್ ಕೃಷ್ಣಮೂರ್ತಿ, ಮಜ್ಜಿಗಿ ಬಸವರಾಜ, ವೈ.ಜಿ. ಅಂಗಡಿ, ಜನಾರ್ದನ ಶೆಟ್ಟಿ ಬಸವರಾಜ ಕೊಳ್ಳಿ ಹಾಗೂ ಇಂದಿನ ಮಂಜುನಾಥ ಭೋವಿ, ಬಿ. ನಾರಾಯಣ್ ದಾಸ್ ಅವರ ಸಹಕಾರ ಸ್ಮರಿಸಿದರು.
ಚಂದನ ಕಲಾ ಸಂಸ್ಥೆಯ ಎಂ.ಪಿ.ಎಂ. ಪ್ರಶಾಂತ್, ಕನ್ನಡ ಗೀತೆ ಹಾಡಿದರು. ಉಪನ್ಯಾಸಕ ಎಚ್.ಕೆ. ಮಹೇಶ, ಎಂ. ದಯಾನಂದ, ಶಂಕರ್ ಬೆಟಗೇರಿ, ನಾಗರಾಜ್ ಮಲ್ಕಿಒಡೆಯರ್, ಬಿಚ್ಚುಗತ್ತಿ ಖಾಜಾ ಹುಸೇನ್ ನಿರ್ವಹಿಸಿದರು. ಬಳಗದ ಸದಸ್ಯರು ಶಿಕ್ಷಣ ಪ್ರೇಮಿಗಳು ಗ್ರಂಥಾಲಯ ಓದುಗರು ಭಾಗವಹಿಸಿದ್ದರು.