ಯಕ್ಷಗಾನ ಕಲಾರಂಗದ 108ನೇ ಮನೆ ಹಸ್ತಾಂತರ

ಉಡುಪಿ: ಯಕ್ಷಗಾನ ಕಲಾರಂಗ ವಿದ್ಯಾಪೋಷಕ್‍ನ ಪ್ರಥಮ ಪಿಯುಸಿ ವಿದ್ಯಾರ್ಥಿ ಅಂಕಿತ್ (ಅನಿತಾ ಮತ್ತು ಗೋಪಾಲ್ ಪುತ್ರ) ಇವನಿಗೆ ಹಿರಿಯಡಕದ ಕೊಂಡಾಡಿಯಲ್ಲಿ, ಅಲೆವೂರಿನ ಎ. ರಘುಪತಿ ಭಟ್ ಇವರು ತಮ್ಮ 84ನೇ ಹುಟ್ಟುಹಬ್ಬದ ಶುಭಾವಸರದಲ್ಲಿ ತಮ್ಮ ತಂದೆ ಅಲೆವೂರು ವಾಸುದೇವ ಭಟ್ - ತಾಯಿ ರುಕ್ಮಿಣಿಯಮ್ಮ, ಸಹೋದರಿ ಶಶಿಕಲಾ ತಂತ್ರಿ ಮತ್ತು ಧರ್ಮಪತ್ನಿ ರತ್ನ ಇವರ ಸ್ಮರಣೆಯಲ್ಲಿ ನಿರ್ಮಿಸಿದ ನೂತನ ಮನೆ ‘ಶಶಿರತ್ನ’ ಶನಿವಾರ ಉದ್ಘಾಟನೆಗೊಂಡಿತು.ಜ್ಯೋತಿ ಬೆಳಗಿಸಿ ಉದ್ಘಾಟಿಸಿದ ರಘುಪತಿ ಭಟ್ ಅವರು ನನ್ನ ತಂದೆ, ತಾಯಿ, ಪತ್ನಿ ಮತ್ತು ಸಹೋದರಿ ನನ್ನ ಬದುಕಿನ ಬೇರೆ ಬೇರೆ ಕಾಲಘಟ್ಟದಲ್ಲಿ ಆಸರೆಯಾಗಿದ್ದಾರೆ. ಅವರೆಲ್ಲರಿಗು ನಾನು ಕೃತಜ್ಞ. ದಾನಗಳಲ್ಲಿ ಆಶ್ರಯದಾನಕ್ಕೆ ವಿಶೇಷ ಮಹತ್ವವಿದೆ. ಆ ಸಂತೋಷ ಇಂದು ಸಿಕ್ಕಿತು. ಯಕ್ಷಗಾನ ಕಲಾರಂಗ ಇದಕ್ಕೆ ಕಾರಣ. ಈ ಸಂಸ್ಥೆ ಸುಮನಸರ ಕೂಟ. ನನಗೆ ಏನೂ ಶ್ರಮವಿಲ್ಲದೆ ಸುಂದರವಾದ ಮನೆಯನ್ನು ನಿರ್ಮಿಸಿ ಕೊಟ್ಟಿದ್ದಾರೆ. ಅವರಿಗೂ ನಾನು ಆಭಾರಿಯಾಗಿದ್ದೇನೆ. ಈ ಮನೆಯಲ್ಲಿ ಅಂಕಿತ್ ಮತ್ತು ಅವನ ತಂದೆ ತಾಯಿ ಸುಖವಾಗಿರಲೆಂದು ಹಾರೈಸಿದರು.

ಅಭ್ಯಾಗತರಾದ ಹಿರಿಯಡಕ ಪ್ರಗತಿಪರ ಕೃಷಿಕ ಕುದಿ ಶ್ರೀನಿವಾಸ ಭಟ್ ಅವರು ಕಲಾರಂಗ ಮಾಡುತ್ತಿರುವ ಮನೆನಿರ್ಮಾಣದ ಈ ಕೆಲಸ ಬ್ರಹ್ಮಕಲಶೋತ್ಸವ ಮಾಡಿಸಿದ ಪುಣ್ಯಕ್ಕೆ ಸಮಾನವಾದುದು. ಈ ಸಂಸ್ಥೆಯ ಕಾರ್ಯಚಟುವಟಿಕೆಯನ್ನು ತುಂಬಾ ಮೆಚ್ಚಿಕೊಂಡಿದ್ದೇನೆ ಎಂದರು.ಕೆ. ಪಿ. ಎಸ್. ಹಿರಿಯಡಕ ಹಳೆ ವಿದ್ಯಾರ್ಥಿ ಸಂಘದ ಅಧ್ಯಕ್ಷ ಶ್ರೀನಿವಾಸ ರಾವ್, ಹೆರ್ಗ ದಿನಕರ ಶೆಟ್ಟಿ, ಪ್ರಭಾವತಿ ವಿ. ಶೆಣೈ ಶುಭ ಹಾರೈಸಿದರು.ಯು. ವಿಶ್ವನಾಥ್ ಶೆಣೈ, ರಘುಪತಿ ಭಟ್ಟರ ಸಂಬಂಧಿಕರಾದ ಕೃಷ್ಣರಾಜ ತಂತ್ರಿ, ಮಗಳು ಸವಿತಾ, ಸಂಜನಾ, ಕಲಾರಂಗದ ಉಪಾಧ್ಯಕ್ಷ ವಿ. ಜಿ. ಶೆಟ್ಟಿ, ಕೋಶಾಧಿಕಾರಿ ಕೆ. ಸದಾಶಿವ ರಾವ್, ಸಂಸ್ಥೆಯ ಸದಸ್ಯರು ಉಪಸ್ಥಿತರಿದ್ದರು. ಕಾಪು ಶಾಸಕ ಗುರ್ಮೆ ಸುರೇಶ್ ಶೆಟ್ಟಿಯವರು ಆಗಮಿಸಿ ಶುಭಹಾರೈಸಿ ಸಹಭೋಜನದಲ್ಲಿ ಪಾಲ್ಗೊಂಡರು. ಪೂರ್ವಾಹ್ನ ವೇದಮೂರ್ತಿ ಸೀತಾರಾಮ ಭಟ್ಟರಿಂದ ಗಣಹೋಮ ಧಾರ್ಮಿಕ ಕಾರ್ಯಕ್ರಮ ಮಾಡಿಸಿ ಮಧ್ಯಾಹ್ನ ಎಲ್ಲರಿಗೂ ಭೋಜನ ವ್ಯವಸ್ಥೆ ಏರ್ಪಡಿಸಿ ಅತ್ಯಂತ ಪ್ರೀತಿಯಿಂದ ಮನೆ ಹಸ್ತಾಂತರದ ಕಾರ್ಯಕ್ರಮವನ್ನು ಎ. ರಘುಪತಿ ಭಟ್ಟರು ನಡೆಸಿಕೊಟ್ಟರು. ಅಧ್ಯಕ್ಷ ಎಂ. ಗಂಗಾಧರ ರಾವ್ ಸ್ವಾಗತಿಸಿದರು. ನಾರಾಯಣ ಎಂ. ಹೆಗಡೆ ವಂದಿಸಿದರು. ಕಾರ್ಯದರ್ಶಿ ಮುರಲಿ ಕಡೆಕಾರ್ ಪ್ರಸ್ತಾವನೆಯ ಮಾತುಗಳೊಂದಿಗೆ ನಿರೂಪಿಸಿದರು.