ಭಾವೈಕ್ಯತೆಯ ಬೇಸುಗೆ ಬಾಗಲಕೋಟೆ ಹೋಳಿ !

ಈಶ್ವರ ಶೆಟ್ಟರ

ಕನ್ನಡಪ್ರಭ ವಾರ್ತೆ ಬಾಗಲಕೋಟೆ

ಐತಿಹಾಸಿಕ ಪರಂಪರೆಯುಳ್ಳ ಬಾಗಲಕೋಟೆಯ ಹೋಳಿ ಆಚರಣೆಗೆ ಶತಮಾನಗಳ ಇತಿಹಾಸವಿದ್ದು, ಪಶ್ಚಿಮ ಬಂಗಾಳದ ಕೋಲ್ಕತಾ ಹೊರತುಪಡಿಸಿದರೆ 5 ದಿನಗಳ ಕಾಲ ಹೋಳಿ ಆಚರಿಸುವ ಹೆಗ್ಗಳಿಕೆ ಬಾಗಲಕೋಟೆಯದ್ದಾಗಿದ್ದು, ಭಾವೈಕ್ಯತೆ ಸಂಕೇತವಾಗಿ ಆಚರಿಸಿಕೊಂಡು ಬರುತ್ತಿರುವ ಬಾಗಲಕೋಟೆಯ ಹೋಳಿ ಹಬ್ಬ ಜಾತಿ, ಮತ, ಪಂಥಗಳನ್ನು ಮೀರಿ ಸಂಭ್ರಮದಿಂದ ಸಹಸ್ರಾರು ಜನ ಭಾಗವಹಿಸುವುದನ್ನು ನೋಡುವುದೇ ಸಂಭ್ರಮ.

ಕೃಷ್ಣಾ ಮೇಲ್ದಂಡೆ ಯೋಜನೆಯ ಹಿನ್ನೀರಿನಿಂದ ಬಾಧಿತವಾಗಿರುವ ಬಾಗಲಕೋಟೆ ನಗರ ಶೇ.60ರಷ್ಟು ಹಿನ್ನೀರಿನಲ್ಲಿ ಬಾಧಿತವಾಗಿದ್ದರೂ ಮುಳುಗಡೆಯ ಈ ನಗರದಲ್ಲಿ ಸಾಂಸ್ಕೃತಿಕ ಚಟುವಟಿಕೆಗಳ ಪರಂಪರೆಯ ಹೋಳಿ ಆಚರಣೆಗೆ ಮಾತ್ರ ಯಾವುದೇ ರೀತಿಯಲ್ಲೂ ಭಂಗವಾಗಿಲ್ಲ. ಕಾರಣ ಭಾವೈಕ್ಯತೆ ಬೆಸೆಯುವ ಹಬ್ಬವಾಗಿ ಆಚರಿಸುವ ನಗರದ ಜನತೆಯ ವಿಶಾಲ ಮನೋಭಾವ ಇದಕ್ಕೆ ಕಾರಣ ಎನ್ನಬಹುದು.ಸಂಪ್ರದಾಯದ ಹೋಳಿ ಆಚರಣೆ:

ನೂರಾರು ವರ್ಷಗಳಿಂದ ಬಾಗಲಕೋಟೆಯ ಹೋಳಿ ಆಚರಿಸಲಾಗುತ್ತಿದ್ದು, 5 ಪ್ರಮುಖ ಓಣಿಗಳ 5 ವಿವಿಧ ಜಾತಿಗಳ ಮನೆತನಗಳು ಹೋಳಿಯ ಜವಾಬ್ದಾರಿ ನಿರ್ವಹಿಸುವುದರ ಜೊತೆಗೆ ದಲಿತ ಸಮುದಾಯದ ಖಾತೆದಾರ ಮನೆಯಿಂದಲೇ ಬೆಂಕಿ ತಂದು ಕಾಮದಹನ ಮಾಡುವ ವಾಡಿಕೆ ಇಲ್ಲಿದೆ.

ಬಾಗಲಕೋಟೆಯ ಹೋಳಿ ಹಬ್ಬದ ವಿಶೇಷತೆಯೆಂದರೆ ಹಲಗೆ ಬಾರಿಸುವುದು. ಈ ವಿಶಿಷ್ಟ ಪದ್ಧತಿ ಎಲ್ಲಿಯೂ ಇಲ್ಲ, ನಿಶಾನೆ ಹಾಗೂ ತುರಾಯಿ ಹಲಗೆಗಳು ಪ್ರಮುಖವಾಗಿ ನಗರದ ಕಿಲ್ಲಾ, ಹೋಸಪೇಟೆ, ಹಳಪೇಟೆ, ಜೈನಪೇಟ, ವೆಂಕಟಪೇಟೆಯಲ್ಲಿನ ಪ್ರಸಿದ್ಧವಾಗಿರುವ 5 ಮನೆತನಗಳಿಂದ ತಂದು ಸಾರ್ವಜನಿಕವಾಗಿ ಹಲಿಗೆಮೇಳ ಏರ್ಪಡಿಸಿ ಸಂಭ್ರಮಿಸುತ್ತಾರೆ.

ವಿಶಿಷ್ಟ ಆಚರಣೆ; ಪೇಶ್ವೆ ಆಡಳಿತ ಹಾಗೂ ಸವಣೂರು ನವಾಬರು ಬಾಗಲಕೋಟೆಯ ಹೋಳಿ ಆಚರಣೆಗೆ ವಿಶೇಷವಾದ ಗೌರವ ನೀಡಿದ್ದರೆಂದು ಹೇಳಲಾಗುತ್ತಿದ್ದು, ಅಸ್ಪೃಶ್ಯತೆಯ ಕಾಲದಲ್ಲಿಯೇ ಸಮಾನತೆ ತಂದ ಬಾಗಲಕೋಟೆಯ ಹೋಳಿ ಹಬ್ಬ ದಲಿತ ಮತ್ತು ಮೇಲ್ವರ್ಗದ ನಡುವಿನ ಬಾಂಧವ್ಯ ಗಟ್ಟಿಗೊಳಿಸುವ ಪ್ರಯತ್ನದ ಭಾಗವಾಗಿ ದಲಿತ ಸಮುದಾಯದ ಮನೆಯಿಂದ ಬೆಂಕಿ ತಂದು ಕಾಮದಹನ ಮಾಡವ ಪರಂಪರೆಯಿದೆ.

ತುರಾಯಿ ಹಲಿಗೆ, ಶಹನಾಯಿ ವಾದನ ಅದಕ್ಕೆ ತಕ್ಕಂತೆ ಹಿಮ್ಮೆಳಗಳ ನಾದಸ್ವರ ಆರಂಭಗೊಂಡರೆ ಯುವಕರಿಂದ ಹಿಡಿದು ವಯೋವೃದ್ಧರು ಸಹ ಕುಣಿಯುವಂತೆ ಮಾಡುವ ಶಕ್ತಿ ಹಲಿಗೆ ಮೇಳಕ್ಕಿದೆ. ಹೋಳಿಹಬ್ಬದ ವೈಭವ ಹೆಚ್ಚಿಸುವ ಅನೇಕ ಕಾರ್ಯಕ್ರಮಗಳು ಸಹ 5 ದಿನಗಳ ಕಾಲ ನಡೆಯುವುದು ವಿಶೇಷ.

ಇಂದಿನಿಂದ ಮೂರು ದಿನಗಳ ಬಣ್ಣದಾಟ: 5 ದಿನಗಳ ಹಬ್ಬದ ಆಚರಣೆಯಲ್ಲಿ 3 ದಿನಗಳ ಸತತ ಕಾಲ ಬಣ್ಣದಾಟ ನಡೆಯುವುದು ಬಾಗಲಕೋಟೆಯಲ್ಲಿ ಮಾತ್ರ, 3 ದಿನಗಳಲ್ಲಿ ನಗರದ ವಿವಿಧ ಬಡಾವಣೆಗಳಾದ ಕಿಲ್ಲಾ, ಹಳಪೇಟೆ, ಹೊಸಪೇಟೆ, ಜೈನಪೇಟೆ, ವೆಂಕಟಪೇಟೆಯ ಜನತೆ ವಿಶಿಷ್ಟ ರೀತಿಯಲ್ಲಿ ಬಣ್ಣದಾಟದಲ್ಲಿ ತೊಡಗುತ್ತಾರೆ. ಈ ಬಾರಿ ಬಣ್ಣದಾಟವನ್ನು ಮತ್ತಷ್ಟು ರಂಗಿನಿಂದ ಆಡಲು ಸಜ್ಜಾಗಿದ್ದಾರೆ. ಜೊತೆಗೆ ಮಾ.25 ರಿಂದ ಮುರು ದಿನಗಳ ಕಾಲ ರೇನ್‌ ಡ್ಯಾನ್ಸ್‌ ಹಾಗೂ ಬಣ್ಣದ ಬಂಡಿಗಳು ಸಹ ಹೋಳಿಯ ರಂಗ ಹೆಚ್ಚಿಸಲಿದೆ.

ಮೂರು ದಿನ ಹೋಳಿಯಾಟ: ಬುಧವಾರ ಮಧ್ಯ ರಾತ್ರಿ ನಡೆದ ಕಾಮದಹನದಿಂದ ಆರಂಭಗೊಳ್ಳುವ ಬಾಗಲಕೋಟೆಯ ಹೋಳಿ ಆಚರಣೆ 13ರಂದು ನಗರದೆಲ್ಲೆಡೆ ಕಾಮದಹನ, 14,15,16ರಂದು ಮೂರು ದಿನಗಳ ಕಾಲ ವಿವಿಧ ಬಡಾವಣೆಯಲ್ಲಿ ನಡೆಯುವ ಹೋಳಿ ಬಣ್ಣದಾಟ ವೀಕ್ಷಿಸುವುದು ಹಾಗೂ ಭಾಗವಹಿಸಿ ಪರಸ್ಪರ ಬಣ್ಣದಾಟದಲ್ಲಿ ತೊಡಗುವುದೇ ಒಂದು ಸಂಭ್ರಮ. ಶತಮಾನಗಳ ಇತಿಹಾಸವಿರುವ ಬಾಗಲಕೋಟೆ ಹೋಳಿ ಆಚರಣೆಗೆ ರಾಷ್ಟ್ರೀಯ ಮಾನ್ಯತೆ ಅಗತ್ಯವಾಗಿದೆ. ದೇಶದಲ್ಲಿ 5 ದಿನಗಳ ಕಾಲ ಹೋಳಿ ಹಬ್ಬ ಆಚರಿಸುವ ಏಕಮಾತ್ರ ನಗರ ಬಾಗಲಕೋಟೆಯಾಗಿದೆ. ಹೋಳಿ ವೈಭವ ಇನ್ನಷ್ಟು ಹೆಚ್ಚಿಸುವ ಪ್ರಯತ್ನಕ್ಕೆ ಎಲ್ಲರೂ ಕೈಜೋಡಿಸಬೇಕಿದೆ.

- ಮಹಾಬಳೇಶ್ವರ ಗುಡುಗುಂಟಿ, ಹೋಳಿ ಆಚರಣೆ ಸಮಿತಿ ಮುಖ್ಯಸ್ಥರು