ಅಂಧಕಾರವನ್ನು ದೂರ ಮಾಡಿದ ತಾರೆ ಕೃಷ್ಣ

ಕನ್ನಡಪ್ರಭ ವಾರ್ತೆ ಅರಸೀಕೆರೆ

ತಾಲೂಕು ಕಚೇರಿ ಕಂದಾಯ ಭವನದಲ್ಲಿ ಭಕ್ತಿಪೂರ್ಣ ವಾತಾವರಣದಲ್ಲಿ ಶ್ರೀ ಕೃಷ್ಣಜನ್ಮಾಷ್ಟಮಿ ಜಯಂತಿ ಕಾರ್ಯಕ್ರಮ ಆಯೋಜಿಸಲಾಯಿತು. ಕಾರ್ಯಕ್ರಮವನ್ನು ಶಾಸಕ ಕೆ. ಎಂ. ಶಿವಲಿಂಗೇಗೌಡರು ಉದ್ಘಾಟಿಸಿದರು. ಅವರು ಶ್ರೀ ಕೃಷ್ಣನಿಗೆ ಗೌರವನಮನ ಸಲ್ಲಿಸಿದರು.ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಮಾತನಾಡಿದ ಕೆ. ಎಂ. ಶಿವಲಿಂಗೇಗೌಡರು, ಭಾರತೀಯ ಸಂಸ್ಕೃತಿಯ ಆಳವಾದ ಮೂಲವಾದ ಶ್ರೀ ಕೃಷ್ಣನು ಕೇವಲ ಪೌರಾಣಿಕ ಪಾತ್ರವಲ್ಲ, ಅವರು ಮಾನವತೆ, ಧರ್ಮ, ನೀತಿ, ಭಕ್ತಿ ಮತ್ತು ಪ್ರೇಮದ ಪ್ರತಿಮೂರ್ತಿಯಾಗಿದ್ದಾರೆ. ಯುಗಯುಗಾಂತರಗಳಿಂದ ಭಕ್ತರ ಹೃದಯಗಳಲ್ಲಿ ಒಲವು ಮೂಡಿಸಿರುವ ಈ ದೈವಿಕ ವ್ಯಕ್ತಿತ್ವದ ಚರಿತ್ರೆ ಮತ್ತು ಸುವರ್ಣ ಗಾಥೆಗಳು ಪ್ರತಿಯೊಬ್ಬರ ಜೀವನಕ್ಕೆ ಮಾರ್ಗದರ್ಶಕವಾಗಿದೆ ಎಂದು ಹೇಳಿದರು.ಶ್ರೀ ಕೃಷ್ಣನ ಜನ್ಮವನ್ನು ಕಳಂಕವನ್ನು ನಿವಾರಿಸಿದ ಬೆಳಕು, ಅಂಧಕಾರವನ್ನು ದೂರ ಮಾಡಿದ ತಾರೆ ಎಂದು ವ್ಯಾಖ್ಯಾನಿಸಿದರು. ಕಂಸನ ದೌರ್ಜನ್ಯವನ್ನು ನಿರ್ಮೂಲಗೊಳಿಸಲು ಅವರು ಲೋಕಕ್ಕೆ ಬಂದು, ನ್ಯಾಯ ಮತ್ತು ಸತ್ಯವನ್ನು ಪ್ರತಿಪಾದಿಸಿದ್ದರು.

ಶ್ರೀ ಕೃಷ್ಣನಿಂದ ಅರ್ಜುನನಿಗೆ ನೀಡಲಾದ ಭಗವದ್ಗೀತೆ ಕೇವಲ ಧಾರ್ಮಿಕ ದರ್ಶನವಲ್ಲ, ಜೀವನದ ಸಾರ್ಥಕತೆಯ ಮಾರ್ಗದರ್ಶಕವೂ ಆಗಿದ್ದು, “ಕರ್ಮಣ್ಯೇವಾಧಿಕಾರಸ್ತೇ ಮಾ ಫಲೆಷು ಕದಾಚನ” ಎಂಬ ನಿದರ್ಶನವು ನೈತಿಕ ಮತ್ತು ಶ್ರದ್ಧೆಯ ಪಾಠವಾಗಿದೆ. ಗೀತೆಯ ಮೂಲಕ ಕೃಷ್ಣನು ಮಾನವನ ಆತ್ಮಸಾಕ್ಷಾತ್ಕಾರ ಮತ್ತು ಸಮಾಜದಲ್ಲಿ ಜಾಗೃತಿ ಮೂಡಿಸುವ ಜ್ಞಾನವನ್ನು ಹರಿಸಿದರು.ಶ್ರೀ ಕೃಷ್ಣನು ಮಾನವ ಜೀವನದ ಸವಾಲುಗಳನ್ನು ಧೈರ್ಯದಿಂದ ಎದುರಿಸುವ ಮತ್ತು ಪ್ರೀತಿ, ಸಮನ್ವಯದ ಮೂಲಕ ಸಮಸ್ಯೆಗಳನ್ನು ಪರಿಹರಿಸುವ ಆದರ್ಶವನ್ನೂ ನೀಡಿದವರು. ಅವರ ಕಥೆಗಳು ಮಾನವ ಹೃದಯದಲ್ಲಿ ಶಾಂತಿ ಮತ್ತು ನೆಮ್ಮದಿಯನ್ನು ಹರಡಿಸುತ್ತವೆ ಎಂದು ವಿಷ್ಲೇಷಿದರು.ಈ ಕಾರ್ಯಕ್ರಮದಲ್ಲಿ ಅರಸೀಕೆರೆ ತಹಸೀಲ್ದಾರ್ ಸಂತೋಷ್ ಕುಮಾರ್, ಗ್ಯಾರಂಟಿ ಸಮಿತಿಯ ಅಧ್ಯಕ್ಷ ಗೀಜಿಹಳ್ಳಿ ಧರ್ಮಶೇಖರ್, ಯಾದವ್ ಸಮಾಜದ ಅಧ್ಯಕ್ಷರು, ವಿವಿಧ ಸಮಾಜದ ಮುಖಂಡರು, ಕಾರ್ಯಕರ್ತರು, ಇಲಾಖೆಗಳ ಅಧಿಕಾರಿಗಳು ಮತ್ತು ಸ್ಥಳೀಯ ಸಾರ್ವಜನಿಕರು ಸಕ್ರಿಯವಾಗಿ ಪಾಲ್ಗೊಂಡಿದ್ದರು.