ವಾಟರ್ ಮೆಟ್ರೋ ಯೋಜನೆಗೆ ವೇಗ: ೧೧ ನಿಲ್ದಾಣಗಳು ಅಂತಿಮ

ಮಂಗಳೂರು: ಮಂಗಳೂರಿನಲ್ಲಿ ನಡೆದ ರಾಜ್ಯ ಸಚಿವ ಸಂಪುಟ ಸಭೆ ಬಳಿಕ ನಗರದ ಸಾರಿಗೆ ವ್ಯವಸ್ಥೆಯಲ್ಲಿ ಹೊಸ ಸಾಧ್ಯತೆಗಳಿಗೆ ದಾರಿ ಮಾಡಿಕೊಡಬಹುದಾದ ಪ್ರಸ್ತಾವಿತ ಮಂಗಳೂರು ವಾಟರ್ ಮೆಟ್ರೋ ಯೋಜನೆಗೆ ಮತ್ತಷ್ಟು ವೇಗ ದೊರೆತಿದೆ. ಹಲವು ಹಂತಗಳ ಪ್ರಕ್ರಿಯೆ ಬಳಿಕ ಪ್ರಸ್ತಾವಿತ ೧೯ ವಾಟರ್ ಮೆಟ್ರೋ ನಿಲ್ದಾಣಗಳ ಪೈಕಿ ೧೧ ನಿಲ್ದಾಣಗಳನ್ನು ಮಂಗಳೂರು ಬಂದರು ಮತ್ತು ಮೀನುಗಾರಿಕಾ ಉಪವಿಭಾಗ ಅಂತಿಮಗೊಳಿಸಿದೆ.

ಈ ಯೋಜನೆಗೆ ತಾಂತ್ರಿಕ ಹಾಗೂ ಆರ್ಥಿಕ ಕಾರ್ಯಸಾಧ್ಯತಾ ಅಧ್ಯಯನ ನಡೆಸುವಂತೆ ಹಿಂದೆ ಸಚಿವ ಸಂಪುಟ ಸೂಚನೆ ನೀಡಿತ್ತು.ವಾಟರ್ ಮೆಟ್ರೋ ಯೋಜನೆ ನಗರ ಸಾರಿಗೆಗೆ ಮಾತ್ರ ಸೀಮಿತವಾಗಿರದೆ, ಬಂದರು ಹಾಗೂ ಕರಾವಳಿ ಪ್ರದೇಶಗಳ ಸಂಪರ್ಕ ಸುಧಾರಿಸುವ ಉದ್ದೇಶವನ್ನೂ ಹೊಂದಿದೆ. ಹಳೆ ಮಂಗಳೂರು ಬಂದರು, ಪೋರ್ಟ್ ಫೆರಿ, ಸ್ಯಾಂಡ್‌ಬಾರ್‌, ತೋಟ ಬೆಂಗ್ರೆ, ಹೊಯ್ಗೆ ಬಜಾರ್, ಜೆಪ್ಪು ಹಾಗೂ ಉಳ್ಳಾಲ ಸೇರಿದಂತೆ ಹಲವು ಪ್ರದೇಶಗಳನ್ನು ಜಲಸಾರಿಗೆ ಜಾಲಕ್ಕೆ ಸಂಪರ್ಕಿಸುವ ಪ್ರಸ್ತಾವನೆ ಇದೆ. ಯೋಜನೆ ಜಾರಿಯಾದಲ್ಲಿ ಭವಿಷ್ಯದಲ್ಲಿ ಜಲಮಾರ್ಗಗಳ ಸುತ್ತ ವ್ಯಾಪಾರ, ಪ್ರವಾಸೋದ್ಯಮ ಹಾಗೂ ಸ್ಥಳೀಯ ಚಟುವಟಿಕೆಗಳಿಗೆ ಹೊಸ ಅವಕಾಶಗಳು ಸೃಷ್ಟಿಯಾಗುವ ಸಾಧ್ಯತೆ ಇದೆ.ಯೋಜನೆ ಕುರಿತು ಸಾರ್ವಜನಿಕರಲ್ಲಿ ಆಸಕ್ತಿ ಹೆಚ್ಚಾಗಿದ್ದರೂ, ಇದು ಇನ್ನೂ ಅಂತಿಮ ಹಂತ ತಲುಪಿಲ್ಲ. ೨೦೨೫ರ ಜ.೯ ರಂದು ಮೂಲಸೌಕರ್ಯ ಅಭಿವೃದ್ಧಿ ಇಲಾಖೆಯ ಪಿಪಿಪಿ ಸೆಲ್‌ನೊಂದಿಗೆ ನಡೆದ ಚರ್ಚೆಯ ಬಳಿಕ, ಅಗತ್ಯವಿರುವ ಭೂಮಿಯ ಅಂದಾಜು ವಿವರಗಳನ್ನು ಹೆಚ್ಚುವರಿ ಮಾಹಿತಿಯಾಗಿ ಸಲ್ಲಿಸಲಾಗಿದೆ. ಪ್ರತಿ ನಿಲ್ದಾಣಕ್ಕೆ ಅಗತ್ಯವಿರುವ ನಿಖರ ಭೂಮಿಯ ವಿವರಗಳನ್ನು ವಿವರವಾದ ಯೋಜನಾ ವರದಿಯಲ್ಲಿ ಸೇರಿಸಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಮುಂದಿನ ಹಂತದಲ್ಲಿ ಯೋಜನೆಯ ತಾಂತ್ರಿಕ ಕಾರ್ಯಸಾಧ್ಯತೆ, ನಿಖರ ಮಾರ್ಗ, ನಿಲ್ದಾಣಗಳ ವಿನ್ಯಾಸ, ಅಂತಿಮ ಭೂಮಿ ಅವಶ್ಯಕತೆ, ಹಣಕಾಸು ಮಾದರಿ ಹಾಗೂ ಯೋಜನೆ ಅನುಷ್ಠಾನದ ರೂಪುರೇಷೆಗಳನ್ನು ಅಂತಿಮಗೊಳಿಸಬೇಕಿದೆ.

ಮಂಗಳೂರಿನ ಭೌಗೋಳಿಕ ಸ್ವರೂಪವೇ ವಾಟರ್ ಮೆಟ್ರೋ ಪರಿಕಲ್ಪನೆಗೆ ಪ್ರಮುಖ ಆಧಾರವಾಗಿದೆ. ನಗರದ ಸುತ್ತಮುತ್ತಲಿನ ಜಲಮಾರ್ಗಗಳನ್ನು ಸಾರ್ವಜನಿಕ ಸಾರಿಗೆಗೆ ಬಳಸಿಕೊಳ್ಳುವ ಮೂಲಕ ರಸ್ತೆ ಮೇಲಿನ ವಾಹನ ದಟ್ಟಣೆಯ ಒತ್ತಡವನ್ನು ಕಡಿಮೆ ಮಾಡುವ ಸಾಧ್ಯತೆ ಇದೆ.

ಯೋಜನೆ ಅನುಷ್ಠಾನಗೊಂಡರೆ ಕೆಲವು ಪ್ರಯಾಣಿಕರು ದಟ್ಟಣೆಯ ರಸ್ತೆಗಳಲ್ಲಿ ಸಂಚರಿಸುವ ಬದಲು ಜಲಮಾರ್ಗವನ್ನು ಆಯ್ಕೆ ಮಾಡಿಕೊಳ್ಳಲು ಅವಕಾಶ ದೊರೆಯಬಹುದು. ಇದರಿಂದ ನಗರದ ವಿವಿಧ ಭಾಗಗಳ ನಡುವಿನ ಸಂಪರ್ಕಕ್ಕೆ ಮತ್ತೊಂದು ಸಾರಿಗೆ ಆಯ್ಕೆ ಲಭ್ಯವಾಗುವ ಸಾಧ್ಯತೆ ಇದೆ.

ಆದರೆ ಪ್ರಾಥಮಿಕ ದಾಖಲೆಯಲ್ಲಿ ಪ್ರಯಾಣದ ಅವಧಿ, ವಾಟರ್ ಮೆಟ್ರೋ ಬೋಟ್‌ಗಳ ಸೇವೆಗಳ ಸಂಖ್ಯೆ, ಪ್ರಯಾಣ ದರ, ಪ್ರಯಾಣಿಕರ ಸಾಮರ್ಥ್ಯ ಹಾಗೂ ನಿಖರ ಮಾರ್ಗದಂತಹ ವಿವರಗಳನ್ನು ಇನ್ನೂ ನೀಡಲಾಗಿಲ್ಲ. ಈ ಅಂಶಗಳನ್ನು ಅಂತಿಮ ಯೋಜನಾ ವರದಿಯಲ್ಲಿ ನಿರ್ಧರಿಸಬೇಕಿದೆ.

ವಾಟರ್ ಮೆಟ್ರೋ ಕುರಿತು ಪ್ರಾಥಮಿಕ ವರದಿಯನ್ನು ಸರ್ಕಾರಕ್ಕೆ ಸಲ್ಲಿಸಲಾಗಿದೆ. ಯೋಜನೆಯಡಿ ಒಟ್ಟು ೧೯ ನಿಲ್ದಾಣಗಳನ್ನು ಗುರುತಿಸಲಾಗಿದ್ದು, ಅವುಗಳಲ್ಲಿ ೧೧ ನಿಲ್ದಾಣಗಳನ್ನು ಅಂತಿಮಗೊಳಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಪ್ರಸ್ತಾವಿತ ವಾಟರ್ ಮೆಟ್ರೋ ನಿಲ್ದಾಣಗಳು

ಜೆಪ್ಪಿನಮೊಗರು ಎನ್‌ಎಚ್, ನಾರ್ದನ್ ಸ್ಯಾಂಡ್ ಬಾರ್, ಓಲ್ಡ್ ಪೋರ್ಟ್, ಪೋರ್ಟ್ ಫೆರಿ, ಸ್ಯಾಂಡ್‌ಫಿಟ್ ಬೆಂಗ್ರೆ, ಬಂಗ್ರ ಕೂಳೂರು, ಕೂಳೂರು ಸೇತುವೆ, ಕಸಬಾ ಬೆಂಗ್ರೆ, ಸುಲ್ತಾನ್ ಬತ್ತೇರಿ, ಜೆಪ್ಪಿನಮೊಗರು ಓಲ್ಡ್ ಫೆರಿ, ತಣ್ಣೀರುಬಾವಿ ಚರ್ಚ್, ಕೂಳೂರು ಸೇತುವೆ ಈ ಯೋಜನೆಯ ಪ್ರಮುಖ ಅಂಶವಾಗಿದ್ದು, ಇಲ್ಲಿ ರೋ-ರೋ ಹಾಗೂ ಫ್ಲೋಟಿಂಗ್ ಮಾದರಿಯನ್ನು ಆಧರಿಸಿ ಎರಡು ಪ್ರತ್ಯೇಕ ನಿಲ್ದಾಣಗಳನ್ನು ಪರಿಗಣಿಸಲಾಗುತ್ತಿದೆ.