ರೈತರಿಗೆ ಶೇಂಗಾ ಬೆಳೆವಿಮೆ ಕೊಡಿಸಲು ಆಯುಕ್ತರಿಗೆ ಶಾಸಕರ ಪತ್ರ
ಸಾರಾಂಶ
ಚಳ್ಳಕೆರೆ ತಾಲೂಕಿನ ಸೇಂಗಾ ಬೆಳೆಗಾರರು ಶಾಸಕ ಟಿ.ರಘುಮೂರ್ತಿ ಅವರನ್ನು ಭೇಟಿ ಮಾಡಿ ಸೇಂಗಾ ಬೆಳೆ ನಷ್ಟ ಪರಿಹಾರ ದೊಕರಿಸಿಕೊಡುವಂತೆ ಮನವಿ ಮಾಡಿದರು.
ಕನ್ನಡಪ್ರಭ ವಾರ್ತೆ ಚಳ್ಳಕೆರೆ
ವಿಮೆಗೆ ಸಂಬಂಧಿಸಿದಂತೆ ಹಲವು ರೈತ ಸಂಘಟನೆಗಳು ಕಳೆದ ಎರಡು ತಿಂಗಳಿನಿಂದ ಶಾಸಕರು, ಜಿಲ್ಲಾಧಿಕಾರಿಗಳು, ಉಸ್ತುವಾರಿ ಸಚಿವರ ಮುಂದೆ ತಮ್ಮ ಗೋಳು ತೋಡಿಕೊಂಡು ರೈತರಿಗೆ ವಿಮಾ ಕಂಪನಿಗಳು ತೋರುತ್ತಿರುವ ಬೇಜವಾಬ್ದಾರಿ ನಡೆಯ ಕುರಿತು ಹಲವು ಮನವಿ ಮಾಡಿದ್ದರು.
ಈ ಸಂಬಂಧ ಭಾನುವಾರ ಶಾಸಕರನ್ನು ಭೇಟಿ ಮಾಡಿದ ತಾಲೂಕಿನ ಕಸಬಾ ಹೋಬಳಿಯ ಶೇಂಗಾ ಮತ್ತು ತೊಗರಿ ಬೆಳೆಗಾರರ ಸಂಘದ ಪದಾಧಿಕಾರಿಗಳು ಶೇಂಗಾ ವಿಮೆ ವಿತರಣೆಯ ವಿಳಂಬದ ಕುರಿತು ಗಮನ ಸೆಳೆದರು. ತಕ್ಷಣವೇ ಇದಕ್ಕೆ ಸ್ಪಂದಿಸಿದ ಶಾಸಕರು ಕೃಷಿ ಇಲಾಖೆಯ ಉನ್ನತ ಅಧಿಕಾರಿಗಳ ಜೊತೆ ಮಾತನಾಡಿ ಕೊನೆಗೆ ಈ ಕುರಿತು ಕೃಷಿ ಇಲಾಖೆ ಆಯುಕ್ತರಿಗೆ ಪತ್ರ ಬರೆಯುವುದಾಗಿ ರೈತರಿಗೆ ಭರವಸೆ ನೀಡಿದರು. ಅದರಂತೆ ಒಂದು ಗಂಟೆಯ ಒಳಗಾಗಿ ಆಯುಕ್ತರಿಗೆ ಪತ್ರ ರವಾನಿಸಿದ್ದಾರೆ.ಶೇಂಗಾ ಬೆಳೆಗಾರರು ಕಳೆದ ಮುಂಗಾರು ಹಂಗಾಮಿನಲ್ಲಿ ಬಿತ್ತನೆ ಮಾಡಿದ್ದ ಶೇಂಗಾ ನಷ್ಟವಾಗಿದೆ. ಸುಮಾರು 36,766 ರೈತರು ಪ್ರೀಮಿಯಂ ಕಟ್ಟಿದ್ದಾರೆ. ಆದರೆ, ವಿಮಾ ಕಂಪನಿ ಇದೀಗ ವಿಳಂಬ ಧೋರಣೆ ತಳೆಯುತ್ತಿದೆ. ಕಾಲಕ್ಕೆ ಸರಿಯಾಗಿ ಮಳೆ ಬಾರದ ಹಿನ್ನೆಲೆ ಬೆಂಕಿ ರೋಗ, ಕರೆ ಜಾಡಿ, ರೋಗಗಳಿಗೆ ಬಲಿಯಾಗಿ ಹಾಕಿದ ಶೇಂಗಾ ಬೆಳೆ ನಷ್ಟವಾಗಿದೆ. ತಾಲೂಕಿನ ಸುಮಾರು 40 ಗ್ರಾಪಂಗಳ ವ್ಯಾಪ್ತಿಯಲ್ಲಿ 1,14,900ಎಕರೆ ಶೇಂಗಾ ಬೆಳೆಗೆ 36,766ರೈತರು ವಿಮೆ ಪಾವತಿಸಿದ್ದಾರೆ.
ಈ ಹಿಂದೆಯೂ ಕೂಡ ಅಂದರೆ ಕಳೆದು ಒಂದೂವರೆ ತಿಂಗಳ ಹಿಂದೆ ತೊಗರಿ ಬೆಳೆಗಾರರಿಗೂ ಮಧ್ಯಂತರ ಪರಿಹಾರ ಕೊಡಿಸುವಲ್ಲಿ ಶಾಸಕರ ಶ್ರಮವಿತ್ತು ಎಂದು ತೊಗರಿ ಬೆಳೆಗಾರರ ಸಂಘದ ಅಧ್ಯಕ್ಷ ಡಾ.ಸಿ.ಶಿವಲಿಂಗಪ್ಪ ಹೇಳಿದರು.ತೊಗರಿ ಬೆಳೆಗಾರರಿಗೆ ಮಧ್ಯಂತರ ವಿಮೆ ತರಲು ಸೆಣಸಾಡಿದ ತೊಗರಿ ಬೆಳೆಗಾರರ ಸಂಘದವರು ಕೃಷಿ ಇಲಾಖೆ, ಜಿಲ್ಲಾಧಿಕಾರಿ, ಜಿಲ್ಲಾ ಮಂತ್ರಿ, ಶಾಸಕರು ಹೀಗೇ ಎಲ್ಲರ ಹತ್ತಿರ ಸಂಕಷ್ಟ ಹೇಳಿ ಪಡಬಾರದ ಪಾಡು ಪಟ್ಟು ಮಧ್ಯಂತರ ವಿಮೆ ದಕ್ಕಿಸಿಕೊಂಡಿದ್ದರು.