ಶೇ.60ರಷ್ಟು ಕಡಿಮೆಯಾದ ಆಲಿವ್ ರಿಡ್ಲೇ ಪ್ರಭೇದದ ಕಡಲಾಮೆ ಸಂತತಿ
ಸಾರಾಂಶ
ಸಾಮಾನ್ಯವಾಗಿ ಕಡಲಾಮೆ ಮೊಟ್ಟೆ ಇಟ್ಟ 45ರಿಂದ 50 ದಿನಗಳಲ್ಲಿ ಮೊಟ್ಟೆಯೊಡೆದು ಮರಿಗಳು ಹೊರಬರುತ್ತವೆ. ಆದರೆ ಪರಿಸರ ವೈಪರೀತ್ಯದ ಪರಿಣಾಮ 55 ದಿನಗಳ ನಂತರ ಮರಿಯೊಡೆದು ಹೊರ ಬರುತ್ತಿರುವುದು ಮರೈನ್ ಸೆಲ್ಗೆ ಇನ್ನೊಂದು ಹೊಸ ಆತಂಕಕ್ಕೂ ಕಾರಣವಾಗಿದೆ. ಹಾಗೆ ಕರಾವಳಿಯಲ್ಲಿ ಕಳೆದ ವರ್ಷಗಳಿಂದ ಹೆಚ್ಚಿನ ಉಷ್ಣಾಂಶ ದಾಖಲಾಗುತ್ತಿರುವದರಿಂದ ಹೆಣ್ಣು ಮರಿಗಳ ಸಂಖ್ಯೆ ಹೆಚ್ಚಾಗಿದೆ ಎಂಬುದು ಇನ್ನೊಂದು ಗಮನಾರ್ಹ ಸಂಗತಿಯಾಗಿದೆ. ಮೊಟ್ಟೆಗೆ ಮರಳಿನಲ್ಲಿ 27 ಡಿಗ್ರಿ ಸೆಲ್ಸಿಯಸ್ಗಿಂತ ಕಡಿಮೆ ಉಷ್ಣಾಂಶ ಸಿಕ್ಕರೆ ಗಂಡು ಮರಿಗಳು, 30 ಡಿಗ್ರಿ ಸೆಲ್ಸಿಯಸ್ಗಿಂತ ಹೆಚ್ಚು ಉಷ್ಣಾಂಶ ಸಿಕ್ಕರೆ ಹೆಣ್ಣು ಮರಿ ಹುಟ್ಟುತ್ತದೆ. ಉಷ್ಣಾಂಶ ಹೆಚ್ಚು ಮೊಟ್ಟೆಗಳಿಗೆ ಸ್ಪರ್ಶಿಸುವದರಿಂದ ಹೆಣ್ಣು ಮರಿಗಳ ಸಂಖ್ಯೆ ಜಾಸ್ತಿಯಾಗಿದೆ. ಇದು ಆಮೆಗಳ ಸಂತತಿಯ ಸರಪಣಿಗೆ ತೊಡಕಾಗಿ ಪರಿಗಣಿಸಿದೆ.
ಹವಾಮಾನ ವೈಪರೀತ್ಯ ಹೊಡೆತಕ್ಕೆ ಸಂಕಷ್ಟ । ಆಲಿವ್ ರಿಡ್ಲೇ ರಕ್ಷಣೆಗೆ ಮರೈನ್ ಸೆಲ್ ಹೋರಾಟ । ಕರಾವಳಿಯಲ್ಲಿ ಉಷ್ಣಾಂಶ ಏರಿಕೆ; ಕಡಲಾಮೆಗಳ ಸಂತತಿ ಸರಪಳಿಗೆ ತೊಡಕು । ಅಂಕೋಲಾದಲ್ಲಿ ಕಡಿಮೆಯಾಗುತ್ತಿರುವ ಕಡಲಾಮೆಗಳ ಹೆಜ್ಜೆ ಗುರುತು
ಅಳಿವಿನಂಚಿನಲ್ಲಿರುವ ಆಲಿವ್ ರಿಡ್ಲೇ ಪ್ರಭೇದದ ಕಡಲಾಮೆಗಳ ಸಂತತಿ ರಕ್ಷಿಸುವ ಕಾರ್ಯಾಚರಣೆ ಅಂಕೋಲಾದ ಕಡಲ ತೀರದಲ್ಲಿ ನಡೆಯುತ್ತಿದ್ದು, ಈ ಬಾರಿ ಮರಿಗಳ ಸಂಖ್ಯೆ ಹಿಂದಿನ ವರ್ಷಗಳಿಗೆ ಹೋಲಿಸಿದರೆ ಈ ವರ್ಷ ಶೇ.60ರಷ್ಟು ಕಡಿಮೆಯಾಗಿದೆ. ಇದಕ್ಕೆ ಅತಿಯಾದ ಹವಾಮಾನ ವೈಪರೀತ್ಯ ಸಹಿತ ಕಾರಣವಾಗಿರಬಹುದು ಎಂದು ಅಂದಾಜಿಸಲಾಗಿದೆ.
ಮಂಜಗುಣಿಯಲ್ಲಿ ಅತಿ ಹೆಚ್ಚು ಮೊಟ್ಟೆಗಳನ್ನು ಇಟ್ಟಿದ್ದು, ಸಮುದ್ರದ ಸಂಗಮ ಪ್ರದೇಶವಾದ ಈ ಪ್ರದೇಶವು ಕಡಲಾಮೆಗಳಿಗೆ ಮೊಟ್ಟೆಗಳನ್ನಿಡಲು ಹಾಟ್ಸ್ಪಾಟ್ ಪ್ರದೇಶವಾಗಿರುವುದು ಕಂಡು ಬಂದಿದೆ.
ಅಂಕೋಲಾದ ಮಂಜಗುಣಿಯಲ್ಲಿ 9 ಸ್ಥಳಗಳಲ್ಲಿ, ಬೆಳಂಬಾರದಲ್ಲಿ 2 ಸ್ಥಳ, ಭಾವಿಕೇರಿ ಹಾಗೂ ಬೇಲೆಕೇರಿಯಲ್ಲಿ ತಲಾ ಒಂದು ಒಟ್ಟು 13 ಕಡೆಗಳಲ್ಲಿ ಆಲಿವ್ ರಿಡ್ಲೆ ಕಡಲಾಮೆಗಳು ಮೊಟ್ಟೆ ಇಡುವ ಪ್ರದೇಶಗಳನ್ನು ಮರೈನ್ ಸೆಲ್ ಗುರುತಿಸಿದೆ.