ಕಬ್ಬಿಗೆ ನ್ಯಾಯಯುತ ಬೆಲೆ ನಿಗದಿಪಡಿಸುವಂತೆ ಆಗ್ರಹಿಸಿ ಪ್ರತಿಭಟನೆ

ಕನ್ನಡಪ್ರಭ ವಾರ್ತೆ ಮುಳಗುಂದ

ಕಬ್ಬು ಬೆಳೆಗಾರರ ವಿವಿಧ ಬೇಡಿಕೆ ಈಡೇರಿಸುವಂತೆ ಆಗ್ರಹಿಸಿ ರಾಜ್ಯ ರೈತ ಸಂಘ ಹಾಗೂ ಹಸಿರು ಸೇನೆಯಿಂದ ಕರೆ ನೀಡಲಾಗಿರುವ ಕರ್ನಾಟಕ ಬಂದ್‌ಗೆ ಬೆಂಬಲ ಸೂಚಿಸಿ ಸಮೀಪದ ಕಣವಿ-ಹೊಸೂರ ಗ್ರಾಮದ ರೈತರು ಕಣವಿ ಕ್ರಾಸ್ ನಲ್ಲಿ ಶನಿವಾರ ಪಾಳಾ-ಬಾದಾಮಿ ರಾಜ್ಯ ಹೆದ್ದಾರಿ ತಡೆದು ಪ್ರತಿಭಟನೆ ನಡೆಸಿದರು.

ನೂರಾರು ರೈತರು ಪಾಳಾ-ಬಾದಾಮಿ ರಾಜ್ಯ ಹೆದ್ದಾರಿಯಲ್ಲಿ ಎತ್ತು ಚಕ್ಕಡಿಗಳನ್ನ, ಟ್ರ‍್ಯಾಕ್ಟರ್ ಗಳನ್ನ ರಸ್ತೆಗೆ ನಿಲ್ಲಿಸಿ, ರಸ್ತೆಯಲ್ಲಿ ಮಲಗಿ ರಾಜ್ಯ, ಕೇಂದ್ರ ಸರ್ಕಾರಗಳ ವಿರುದ್ಧ ಘೋಷಣೆ ಕೂಗಿ ಆಕ್ರೋಶ ವ್ಯಕ್ತಪಡಿಸಿದರು.

ರೈತ ಮುಖಂಡ ಶರಣಪ್ಪಗೌಡ ಪಾಟೀಲ ಮಾತನಾಡಿ, ಪ್ರತಿ ಟನ್ ಕಬ್ಬಿಗೆ ₹5500 ದರ ನಿಗದಿ ಮಾಡಬೇಕು, ಎಫ್‌ಆರ್‌ಪಿ ಹಾಗೂ ಎಸ್‌ಎಪಿ ದರ ಹೆಚ್ಚಳ ಮಾಡಬೇಕು ಎಂದು ಆಗ್ರಹಿಸಿ ಕರ್ನಾಟಕ ಬಂದ್ ಹಾಗೂ ಹೆದ್ದಾರಿ ಬಂದ್‌ಗೆ ರೈತ ಸಂಘದ ರಾಜ್ಯಧ್ಯಕ್ಷ ಚೂನಪ್ಪ ಪೂಜಾರಿ ಹಾಗೂ ಗೌರವಾಧ್ಯಕ್ಷ ಶಶಿಕಾಂತ ಗುರೂಜಿ ನೀಡಿದ ಬಂದ್ ಕರೆಗೆ ಬೆಂಬಲ ಸೂಚಿಸಿ, ಕಬ್ಬು ಬೆಳೆಗಾರರಿಗೆ ಸಹಕಾರ ನೀಡಿ ಕಣವಿ ಕ್ರಾಸ್ ನಲ್ಲಿ ರಾಜ್ಯ ಹೆದ್ದಾರಿ ಬಂದ್ ಮಾಡುವ ಮೂಲಕ ಈ ಹೋರಾಟವನ್ನ ಸ್ವಯಂ ಪ್ರೇರಿತವಾಗಿ ಪಕ್ಷಾತೀತವಾಗಿ ಹಮ್ಮಿಕೊಂಡಿದ್ದೇವೆ. ಸರ್ಕಾರ ಕಬ್ಬು ಬೆಳಗೆ ನ್ಯಾಯಯುತವಾದ ಬೆಲೆ ನಿಗದಿಪಡಿಸಬೇಕು. ಇಲ್ಲದಿದ್ದರೆ ಮುಂದಿನ ದಿನಮಾನಗಳಲ್ಲಿ ಉಗ್ರವಾದ ಹೋರಾಟವನ್ನ ಮಾಡುತ್ತೇವೆ ಎಂದು ಸರ್ಕಾರಕ್ಕೆ ಎಚ್ಚರಿಕೆ ನೀಡಿದರು.

ಈ ವೇಳೆ ರೈತರಾದ ಬಾಪು ಕಿಲ್ಲೇದಾರ, ರಾಮಣ್ಣ ತೋಳನವರ, ಗಂಗಪ್ಪ ಗಡಾದ, ಶರಣಪ್ಪ ಕೋರಿ, ಮಂಜು ಕುರಿ, ಪರಪ್ಪ ಕೋಳಿವಾಡ, ಶ್ರೀಕಾಂತಗೌಡ ಪಾಟೀಲ, ಮಹೇಶ ಮಾಯಣ್ಣವರ, ಶರಣಪ್ಪ ಬಳಿಗೇರ, ಮಂಜು ಕುರ್ತಕೋಟಿ, ರಾಜು ಕುರ್ತಕೋಟಿ ಸೇರಿದಂತೆ ನೂರಾರು ರೈತರು ಇದ್ದರು.