ಸಂಕಷ್ಟದಲ್ಲಿರುವ ರೈತರಿಗೆ ಸರ್ಕಾರ ಯೋಗ್ಯ ಪರಿಹಾರ ನೀಡಿ

ನವಲಗುಂದ:

ಮಳೆ ಕೊರತೆಯಿಂದ ರೈತರು ತೀವ್ರ ಸಂಕಷ್ಟಕ್ಕೆ ಸಿಲುಕಿದ್ದು ತಕ್ಷಣ ರಾಜ್ಯ ಸರ್ಕಾರ ಸೂಕ್ತ ಬೆಳೆ ಪರಿಹಾರ ನೀಡಬೇಕು. ಇಲ್ಲದಿದ್ದರೆ ಜೆಡಿಎಸ್‌ನಿಂದ ಹೋರಾಟ ನಡೆಸಲಾಗುವುದು ಎಂದು ಮಾಜಿ ಸಚಿವ ಕೆ.ಎನ್. ಗಡ್ಡಿ ಎಚ್ಚರಿಸಿದರು.

ನವಲಗುಂದ ವಿಧಾನಸಭಾ ಕ್ಷೇತ್ರದ ಹುಬ್ಬಳ್ಳಿ, ಕುಸಗಲ್ಲ, ಹೆಬಸೂರ, ಯಮನೂರ ಮತ್ತು ಕುಮಾರಗೊಪ್ಪ ಸೇರಿದಂತೆ ವಿವಿಧ ಗ್ರಾಮಗಳಲ್ಲಿ ಜಮೀನುಗಳಿಗೆ ಭೇಟಿ ನೀಡಿ ಬೆಳೆ ನಷ್ಟದ ಕುರಿತು ಮಾಹಿತಿ ಪಡೆದ ಬಳಿಕ ಮಾಧ್ಯಮಗಳೊಂದಿಗೆ ಮಾತನಾಡಿದರು.

ಸಾಲ ಮಾಡಿ ಬಿತ್ತನೆ ಮಾಡಿದ್ದ ರೈತರಿಗೆ ಮಳೆ ಕೊರತೆ ಆಘಾತ ನೀಡಿದೆ. ಬಿತ್ತಿದ ಬೆಳೆ ಭೂಮಿಯಲ್ಲಿ ಕಮರಿದರೆ ಅಳಿದುಳಿದ ಬೆಳೆಯೂ ಇಳುವರಿ ಇಲ್ಲದೆ ಮಾಡಿದ ಖರ್ಚು ಬರದಂತೆ ಆಗಿದೆ. ಆದರಿಂದ ತಕ್ಷಣ ಸರ್ಕಾರ ಪ್ರತಿ ರೈತರಿಗೆ ₹ 50000 ಪರಿಹಾರ ನೀಡಬೇಕೆಂದು ಒತ್ತಾಯಿಸಿದರು.

ಕ್ಷೇತ್ರದ ಬರ ಸಮೀಕ್ಷೆ ನಂತರ ಜೆಡಿಎಸ್ ಮುಖಂಡರು, ಕಾರ್ಯಕರ್ತರು ನವಲಗುಂದ ತಹಸೀಲ್ದಾರ್ ಮೂಲಕ ಮುಖ್ಯಮಂತ್ರಿಗೆ ಮನವಿ ಸಲ್ಲಿಸಿದರು.

ಈ ವೇಳೆ ಜೆಡಿಎಸ್ ಜಿಲ್ಲಾಧ್ಯಕ್ಷ ಬಿ.ಬಿ. ಗಂಗಾಧರಮಠ, ಜೆಡಿಎಸ್ ಮುಖಂಡ ಸಿ.ಎಸ್. ಪಾಟೀಲ, ಪ್ರಕಾಶ ಅಂಗಡಿ, ಶ್ರೀಶೈಲ ಮೂಲಿಮನಿ, ಶಿವಶಂಕರ ಕಲ್ಲೂರ, ಜೆ.ಎನ್. ತೋಟದ, ಮೈಲಾರಪ್ಪ ವೈದ್ಯ, ವೀರೇಶ ಶ್ಯಾನಭೋಗರ, ಜಿ.ಎನ್. ತೋಟದ, ಮೌಲಾಸಾಬ್‌ ವೈದ್ಯ, ಶಿವಶಂಕರ ಕಲ್ಲೂರ, ವೀರೇಶ ಶಾನಭೋಗಾರ, ಶ್ರೀಶೈಲ ಮೂಲಿಮನಿ, ಮೈಲಾರಪ್ಪ ವೈದ್ಯ, ಪ್ರಕಾಶ ಅಂಗಡಿ ಸೇರಿದಂತೆ ಹಲವರಿದ್ದರು.