ಶ್ರೀ ಕ್ಷೇತ್ರ ದೊಡ್ಡಣಗುಡ್ಡೆ: ವೈಭವದ ಶರನ್ನವರಾತ್ರಿ

ಉಡುಪಿ: ಇಲ್ಲಿನ ದೊಡ್ಡಣಗುಡ್ಡೆಯ ಪುರಾಣೇತಿಹಾಸ ಪ್ರಸಿದ್ಧ ಶ್ರೀ ಚಕ್ರಪೀಠ ಸುರಪೂಜಿತೆ ಶ್ರೀ ದುರ್ಗಾ ಆದಿಶಕ್ತಿ ಕ್ಷೇತ್ರದಲ್ಲಿ ನಡೆಯುತ್ತಿರುವ ಶರನ್ನವರಾತ್ರಿ ಮಹೋತ್ಸವಕ್ಕೆ ನಿತ್ಯವೂ ಭಕ್ತ ಸಾಗರವೇ ಹರಿದು ಬರುತ್ತಿದೆ. ಕ್ಷೇತ್ರದ ಧರ್ಮದರ್ಶಿ ಶ್ರೀ ರಮಾನಂದ ಗುರೂಜಿ ಅವರ ಮಾರ್ಗದರ್ಶನದಲ್ಲಿ ನಿತ್ಯವೂ ಧಾರ್ಮಿಕ - ಸಾಂಸ್ಕೃತಿಕ ಕಾರ್ಯಕ್ರಮಗಳು ವೈಭವದಿಂದ ನಡೆಯುತ್ತಿವೆ.ಕ್ಷೇತ್ರದಲ್ಲಿ ನವರಾತ್ರಿಯ ಅಂಗವಾಗಿ ನಡೆಯುತ್ತಿರುವ ಸಾಂಸ್ಕೃತಿಕ ವೈಭವಕ್ಕೆ ಗುರೂಜಿ ಅವರು ಚಾಲನೆ ನೀಡಿ ಅನುಗ್ರಹ ಸಂದೇಶ ನೀಡುತ್ತಾ, ಕಲಾವಿದರನ್ನು ವಿಶೇಷವಾಗಿ ಅನುಗ್ರಹಿಸುವ ಶಕ್ತಿಪೀಠ ಇದು, ಇಲ್ಲಿ ಶ್ರೀ ದುರ್ಗಾ ಆದಿಶಕ್ತಿ ದೇವಿ ಸಾನ್ನಿಧ್ಯದಲ್ಲಿ ತಮ್ಮ ಕಲಾ ಪ್ರತಿಭೆಯನ್ನು ಸಮರ್ಪಿಸುವ ಕಲಾವಿದರು ಮುಂದೆ ಯಶಸ್ಸಿನ ಮೆಟ್ಟಿಲೇರಿದ್ದಾರೆ. ಆದ್ದರಿಂದ ಈ 9 ದಿನಗಳ ಕಾಲ ಕಲಾವಿದರು ಸಂಗೀತ, ನೃತ್ಯ ಕಲೆಯ ಮೂಲಕ ತಾಯಿಯ ಆರಾಧನೆ ನಡೆಸಿ, ಕ್ಷೇತ್ರದ ಸಾಂಸ್ಕೃತಿಕ ವೈಭವವನ್ನು ಹೆಚ್ಚಿಸುತ್ತಿದ್ದಾರೆ ಎಂದರು.ಪ್ರಜ್ಞಾ ಆಂಗ್ಲ ಮಾಧ್ಯಮ ಶಾಲೆಯ ಮುಖ್ಯಶಿಕ್ಷಕಿ ಉಷಾ ರಮಾನಂದ, ಸಹ ಮುಖ್ಯಶಿಕ್ಷಕಿ ಚಂದ್ರಕಲಾ ಶರ್ಮ, ಕ್ಷೇತ್ರದ ಉಸ್ತುವಾರಿ ಕುಸುಮಾ ನಾಗರಾಜ್ ಆಚಾರ್ಯ ಉಪಸ್ಥಿತರಿದ್ದರು.ಆದಿಶಕ್ತಿ ಕ್ಷೇತ್ರದಲ್ಲಿ ವೇ.ಮೂ. ಸರ್ವೇಶ ತಂತ್ರಿ, ವೇ.ಮೂ. ವಿಖ್ಯಾತ್ ಭಟ್, ಗಣೇಶ ಸರಳಾಯರ ನೇತೃತ್ವದಲ್ಲಿ ಶರನ್ನವರಾತ್ರಿಯ ಧಾರ್ಮಿಕ ಕಾರ್ಯಕ್ರಮಗಳು ನೆರವೇರುತ್ತಿವೆ. ಮಂಗಳವಾರ ಶ್ರೀ ಕುಬೇರ ಚಿತ್ರಲೇಖ ಸಹಿತ ಮಹಾಲಕ್ಷ್ಮೀ ಸಾನ್ನಿಧ್ಯದಲ್ಲಿ ಶ್ರೀ ಲಕ್ಷ್ಮೀ ಸಹಸ್ರನಾಮ ಪಾಯಸ ಹೋಮ, ಸಂಜೆ 6ರಿಂದ ದೀಪಾರಾಧನೆ ಸಹಿತ ರಂಗಪೂಜೆ ನಡೆಯಿತು. ಬೆಳಗ್ಗೆ ಕಡೆಕಾರು ಚಿತ್ರಾಕ್ಷಿ ಉಮೇಶ್ ದಂಪತಿ ಹಾಗೂ ಮುಂಬಯಿಯ ಅರುಂಧತಿ ಮತ್ತು ಮನೆಯವರ ಚಂಡಿಕಾಯಾಗಗಳು, ಕಡೆಕಾರು ಚಿತ್ರಾಕ್ಷಿ ಉಮೇಶ್ ದಂಪತಿ ಸೇವಾರ್ಥ ದುರ್ಗಾ ನಮಸ್ಕಾರ ಹಾಗೂ ರಂಗಪೂಜೆ ನಡೆಯಿತು.

ಸಂಗೀತ ಕಾರ್ಯಕ್ರಮ: ಕ್ಷೇತ್ರದ ವಿಶೇಷತೆಯಾಗಿರುವ ದೇವಿ ಸಾನಿಧ್ಯದಲ್ಲಿ ನೃತ್ಯ ಸೇವೆಯನ್ನು ನೃತ್ಯಾರ್ಥಿಗಳಾದ ವರ್ಷಿಣಿ, ವೈಶಾಲಿ, ಅದ್ವಿತಾ, ಜನ್ಯಾ, ಶಾಂಭವಿ, ಹಿಮಗೌರಿ ಸಮರ್ಪಿಸಿದರು. ನವಶಕ್ತಿ ವೇದಿಕೆಯಲ್ಲಿ ಪೂರ್ವಾಹ್ನ ವಿದ್ವಾನ್ ಶ್ರೀಪತಿ ಉಪಾಧ್ಯಾಯ ಕುಂಭಾಶಿ ಹಾಗೂ ವಿ. ಗಣಪತಿ ಭಟ್ ಯಲ್ಲಾಪುರ ಮತ್ತು ಸಂಗಡಿಗರಿಂದ ಗಾನ ವ್ಯಾಖ್ಯಾನ ಗಂಗಾವತರಣ, ಉಳ್ಳೂರು ಭಾಗ್ಯಲಕ್ಷ್ಮೀ ನೇತೃತ್ವದ ಕಲಾನಿಧಿ ತಂಡದಿಂದ ವೈವಿಧ್ಯಮಯ ಸಾಂಸ್ಕೃತಿಕ ಕಾಠ್ಯಕ್ರಮ-ನವಶಕ್ತಿ ವೈಭವ, ಸುಗಮ ಸಂಗೀತ ನಡೆಯಿತು.ಧಾರ್ಮಿಕ ಕಾರ್ಯಕ್ರಮ: ದಿನಂಪ್ರತಿ ಊರ ಹಾಗೂ ಪರವೂರ ಭಕ್ತರ ಸೇವಾರೂಪದ ಜೋಡಿ ಚಂಡಿಕಾಯಾಗ, ಸಹಸ್ರ ನಾಮಾರ್ಚನೆ, ಕಲ್ಲೋಕ್ತ ಪೂಜೆ, ಶ್ರೀರಂಗ ಪೂಜೆ, ಶ್ರೀ ದುರ್ಗಾ ನಮಸ್ಕಾರ ಪೂಜೆ, ದೀಪಾರಾಧನೆ ಜರಗುತ್ತಿವೆ. ಮಧ್ಯಾಹ್ನ ನಡೆವ ಅನ್ನಸಂತರ್ಪಣೆಯಲ್ಲಿ ಸಹಸ್ರ ಸಂಖ್ಯೆಯ ಭಕ್ತರು ಅನ್ನಪ್ರಸಾದ ಸ್ವೀಕರಿಸುತಿದ್ದಾರೆ ಕ್ಷೇತ್ರದ ಉಸ್ತುವಾರಿ ಕುಸುಮಾ ನಾಗರಾಜ್ ಆಚಾರ್ಯ ತಿಳಿಸಿದ್ದಾರೆ.