49 ಕೋಟಿ ರು. ಲಾಟರಿ - ಹೆಣ್ಣುಮಗು ತಂದ ಅದೃಷ್ಟ !

ಉಡುಪಿ: ಅಬುದಾಬಿಯ ಲಾಟರಿಯಲ್ಲಿ 49 ಕೋಟಿ ರು. ಗೆದ್ದಿರುವ ಓಮನ್‌ನಲ್ಲಿ ಉದ್ಯೋಗಿಯಾಗಿರುವ ಶಂತನು ಶೆಟ್ಟಿಗಾರ್ ಅವರ ಉದ್ಯಾವರದ ಮಟ್ಟುನಲ್ಲಿರುವ ಮನೆಯಲ್ಲಿ ಸಂತಸದ ಹೊಳೆಯೇ ಹರಿದಿದೆ. ತಿಂಗಳ ಹಿಂದೆ ಅವರು ಹೆಣ್ಣುಮಗುವಿನ ತಂದೆಯಾಗಿದ್ದು, ಹೆಣ್ಣುಮಗು ಅವರಿಗೆ ಅದೃಷ್ಟ ತಂದಿದೆ ಎಂದು ಸಂಭ್ರಮಿಸಿದ್ದಾರೆ. ಇಲ್ಲಿನ ಕೃಷಿಕ ಕುಟುಂಬದ ಶಂತನು ಶೆಟ್ಟಿಗಾರ್ ಡಿಪ್ಲೋಮಾ ಮಾಡಿ ಓಮನ್ ನ ರಿಟೇಲ್ ಸಂಸ್ಥೆಯೊಂದರಲ್ಲಿ ಉದ್ಯೋಗಿಯಾಗಿದ್ದಾರೆ. ಪದೇಪದೇ ಲಾಟರಿ ಟಿಕೇಟ್ ಖರೀದಿಸಿ ಅದೃಷ್ಟ ಪರೀಕ್ಷೆ ಮಾಡುತಿದ್ದರು. ಈ ಬಾರಿ ಗೆಳೆಯನೊಂದಿಗೆ ಪಾಲುದಾರಿಕೆಯಲ್ಲಿ 500 ದಿರ್ಹಂ (12,000 ರು.) ಕೊಟ್ಟು ಅಬುದಾಬಿಯಲ್ಲಿ ಡ್ರಾ ನಡೆಯುವ ವಿಶ್ವಮಟ್ಟದ ಲಾಟರಿ ಖರೀದಿಸಿದ್ದರು. ಈ ಬಾರಿ ಅದೃಷ್ಟ ಒಲಿದಿದೆ, 20 ಮಿಲಿಯನ್ ದಿರ್ಹಂ, ಅಂದರೆ 49 ಕೋಟಿ ರೂ. ಜಾಕ್‌ಪಾಟ್ ಹೊಡೆದಿದೆ. ಇದಕ್ಕೆ ಅವರಿಗೆ ಹೆಣ್ಣುಮಗು ಹುಟ್ಟಿದ್ದೆ ಕಾರಣ ಎಂದವರ ಮನೆಯವರು ಸಿಹಿ ಹಂಚಿ ಸಂಭ್ರಮಿಸಿದ್ದಾರೆ.ಅವರ ಪತ್ನಿ ಹೆರಿಗೆಗೆಂದು ತವರು ಮನೆ ತೀರ್ಥಹಳ್ಳಿಯಲ್ಲಿದ್ದಾರೆ. ಅವರಂತೂ ಹೆಣ್ಣು ಮಗು ಹುಟ್ಟಿದ್ದ ಸಂತೋಷದಲ್ಲಿದ್ದು, ಇದೀಗ ಪತಿ ಲಾಟರಿ ಗೆದ್ದಿದ್ದು ಅವರ ಸಂತೋಷ ದುಪ್ಪಟ್ಟಾಗಿದೆ, ಜೊತೆಗೆ ಮಗುವನ್ನು ನೋಡಲು ಈ ತಿಂಗಳ ಕೊನೆಗೆ ಬರುವುದಾಗಿ ಶಂತನು ಹೇಳಿದ್ದು, ಅವರ ಸಂತೋಷಕ್ಕೆ ಪಾರವೇ ಇಲ್ಲವಾಗಿದೆ ಎಂದು ಮನೆಯವರು ಹೇಳಿದ್ದಾರೆ.