ಮಠಗಳ ಬಗ್ಗೆ ವ್ಯಂಗ್ಯ ಸರಿಯಲ್ಲ: ಯತ್ನಾಳ

ಕುಷ್ಟಗಿ: ಮಠಗಳು ಹಾಗೂ ಶ್ರೀಗಳ ಕುರಿತು ವ್ಯಂಗ್ಯವಾಗಿ ಮಾತನಾಡುವುದು ಸರಿಯಲ್ಲ ಎಂದು ವಿಜಯಪುರ ಶಾಸಕ ಬಸನಗೌಡ ಪಾಟೀಲ ಯತ್ನಾಳ ಹೇಳಿದರು.

ಕುಷ್ಟಗಿ ಪಟ್ಟಣದ ಸಮೀಪದ ಅಮರನಾಥೇಶ್ವರ ಆಶ್ರಮಕ್ಕೆ ಭೇಟಿ ನೀಡಿ ಈಶ್ವರನ ಪೂಜೆ ಸಲ್ಲಿಸಿದ ಬಳಿಕ, 3 ಸಾವಿರ ಮಠ ಇರಲಿ, 6 ಸಾವಿರ ಮಠ ಇರಲಿ ಎಂಬ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ ಅವರ ಹೇಳಿಕೆಯ ಬಗ್ಗೆ ಯತ್ನಾಳ ಪ್ರತಿಕ್ರಿಯಿಸಿದರು. ಶ್ರೀಗಳಿಗೆ ರಾಯಭಾರಿಯಾಗಬೇಕು, ಸೇವೆ ಮಾಡಬೇಕು ಎಂಬ ರೀತಿಯಲ್ಲಿ ಮಾತನಾಡುವುದು ದೊಡ್ಡ ಪ್ರವಚನಕಾರರಂತೆ ಮಾತನಾಡಿದಂತಾಗುತ್ತದೆ. ಮಠಗಳನ್ನು ರಾಜಕೀಯ ಹೇಳಿಕೆಗಳ ಮೂಲಕ ಲಘುವಾಗಿ ಕಾಣಬಾರದು. ಮಠಗಳು ಧಾರ್ಮಿಕ ಕಾರ್ಯಗಳ ಜತೆಗೆ ಸಮಾಜಮುಖಿ ಸೇವೆಯಲ್ಲೂ ತೊಡಗಿವೆ. ಹೀಗಾಗಿ ಅವುಗಳ ಕುರಿತು ಜವಾಬ್ದಾರಿಯಿಂದ ಮಾತನಾಡಬೇಕು ಎಂದು ಹೇಳಿದರು.

ಎಥೆನಾಲ್ ಉತ್ಪಾದನೆ ನಿಲ್ಲಿಸಲು ಹುನ್ನಾರ: ಎಥೆನಾಲ್ ಉತ್ಪಾದನೆ ಸ್ಥಗಿತಗೊಳಿಸಲು ವ್ಯವಸ್ಥಿತವಾಗಿ ಹುನ್ನಾರ ನಡೆಯುತ್ತಿದ್ದು, ಇದರ ಹಿಂದೆ ಕೆಲವು ವಿದೇಶಿ ಶಕ್ತಿಗಳ ಕೈವಾಡವಿದೆ ಎಂದು ಯತ್ನಾಳ ಆರೋಪಿಸಿದರು.

ಎಥೆನಾಲ್ ಉತ್ಪಾದನೆಯಿಂದ ರೈತರ ಕಬ್ಬು ಹಾಗೂ ಮೆಕ್ಕೆಜೋಳಕ್ಕೆ ಮಾರುಕಟ್ಟೆ ಲಭ್ಯವಾಗುತ್ತಿದೆ. ಉತ್ಪಾದನೆ ಸ್ಥಗಿತಗೊಂಡರೆ ಬೆಳೆಗಳಿಗೆ ಉತ್ತಮ ದರ ದೊರೆಯುವುದಕ್ಕೆ ತೊಂದರೆಯಾಗಬಹುದು. ಇದರಿಂದ ರೈತರಿಗೆ ನಷ್ಟವಾಗುವ ಸಾಧ್ಯತೆ ಇದೆ ಎಂದರು.

ಕಬ್ಬಿನ ಬೆಲೆ ಹೆಚ್ಚಿಸುವ ಜವಾಬ್ದಾರಿ ಕೇಂದ್ರ ಸರ್ಕಾರದ್ದಾಗಿದೆ. ರೈತರಿಗೆ ಸೂಕ್ತ ದರ ದೊರೆಯುವಂತೆ ಕೇಂದ್ರ ಸರ್ಕಾರ ಕ್ರಮ ಕೈಗೊಳ್ಳಬೇಕು. ಸಕ್ಕರೆ ಬೆಲೆ ₹50ಕ್ಕಿಂತ ಹೆಚ್ಚಾಗದಂತೆ ನೋಡಿಕೊಳ್ಳುವ ಜತೆಗೆ ಎಥೆನಾಲ್‌ಗೆ ಸೂಕ್ತ ಬೆಲೆ ನಿಗದಿಪಡಿಸಬೇಕು ಎಂದು ಹೇಳಿದರು.

ಎಥೆನಾಲ್ ಉತ್ಪಾದನೆಯಿಂದ ಸಕ್ಕರೆ ಕಾರ್ಖಾನೆಗಳಿಗೆ ಪರ್ಯಾಯ ಆದಾಯದ ಮೂಲ ದೊರೆತಿದೆ. ರೈತರಿಗೆ ಕಬ್ಬಿನ ಬಿಲ್ ಪಾವತಿಸುವ ವ್ಯವಸ್ಥೆಯಲ್ಲಿ ಎಥೆನಾಲ್ ಉತ್ಪಾದನೆಯೂ ಪ್ರಮುಖ ಪಾತ್ರ ವಹಿಸುತ್ತಿದೆ ಎಂದರು.

ರೈತರು ತಮ್ಮ ಉಳಿವಿನ ಜತೆಗೆ ಸಕ್ಕರೆ ಕಾರ್ಖಾನೆಗಳ ಉಳಿವನ್ನೂ ಗಮನಿಸಬೇಕು. ಕಾರ್ಖಾನೆಗಳಿಗೆ ಸಂಬಂಧಿಸಿದಂತೆ ಬೇಕಾಬಿಟ್ಟಿಯಾಗಿ ಬೇಡಿಕೆಗಳನ್ನು ಮುಂದಿಡಬಾರದು. ಕೋಟ್ಯಂತರ ರುಪಾಯಿ ವೆಚ್ಚದಲ್ಲಿ ನಿರ್ಮಿಸಿರುವ ಕೆಲವು ಕಾರ್ಖಾನೆಗಳು ಈಗಾಗಲೇ ನಷ್ಟದಲ್ಲಿವೆ. ರೈತರು ಮತ್ತು ಕಾರ್ಖಾನೆ ಎರಡೂ ಉಳಿಯುವಂತಹ ದರ ವ್ಯವಸ್ಥೆ ಅಗತ್ಯವಾಗಿದೆ ಎಂದು ಹೇಳಿದರು.

ಎಥೆನಾಲ್ ವಾಹನಗಳ ಬಳಕೆ ಹೆಚ್ಚಲಿದೆ: ಮುಂದಿನ ದಿನಗಳಲ್ಲಿ ಎಥೆನಾಲ್ ಉತ್ಪಾದನೆ ಹಾಗೂ ಲಭ್ಯತೆ ಹೆಚ್ಚಾಗುವ ಸಾಧ್ಯತೆಯಿದೆ. ಎಥೆನಾಲ್ ಆಧಾರಿತ ವಾಹನಗಳ ಬಳಕೆ ಹೆಚ್ಚಾದರೆ ಪೆಟ್ರೋಲ್ ಮತ್ತು ಡೀಸೆಲ್ ಮೇಲಿನ ಅವಲಂಬನೆ ಕಡಿಮೆಯಾಗಬಹುದು. ದೇಶದ ಇಂಧನ ಅವಶ್ಯಕತೆ ಹಾಗೂ ರೈತರ ಆದಾಯದ ದೃಷ್ಟಿಯಿಂದ ಎಥೆನಾಲ್ ಉತ್ಪಾದನೆಗೆ ಉತ್ತೇಜನ ನೀಡುವ ಅಗತ್ಯವಿದೆ ಎಂದರು.

ನಕಲಿ ಮತದಾರರ ಆರೋಪ: ವಿಜಯಪುರ ಕ್ಷೇತ್ರದಲ್ಲಿ 20 ಸಾವಿರಕ್ಕೂ ಅಧಿಕ ನಕಲಿ ಮತದಾರರಿದ್ದಾರೆ ಎಂಬ ಪ್ರಶ್ನೆಗೆ ಪ್ರತಿಕ್ರಿಯಿಸಿದ ಯತ್ನಾಳ, ಆದಿಲ್‌ಷಾಹಿ ಕಾಲದಿಂದಲೂ ಇದ್ದವರ ಹೆಸರುಗಳು ಮತದಾರರ ಪಟ್ಟಿಯಲ್ಲಿ ಉಳಿದಿವೆ. ಮೃತಪಟ್ಟವರ ಹೆಸರುಗಳನ್ನು ತೆಗೆದುಹಾಕಿಲ್ಲ. ಒಂದೇ ವ್ಯಕ್ತಿಯ ಹೆಸರು ಎರಡು–ಮೂರು ಕಡೆ ಇರುವ ಪ್ರಕರಣಗಳಿವೆ ಎಂದು ಆರೋಪಿಸಿದರು. ಕೆಲವರು ಬುರ್ಖಾ ಧರಿಸಿ ಬೇರೆಯವರ ಹೆಸರಿನಲ್ಲಿ ಮತ ಚಲಾಯಿಸುತ್ತಾರೆ ಎಂಬ ಅನುಮಾನವನ್ನೂ ವ್ಯಕ್ತಪಡಿಸಿದ ಅವರು, ಈ ಕುರಿತು ದೂರುಗಳನ್ನು ನೀಡಲಾಗಿದೆ ಎಂದರು. ‘ಇಷ್ಟೆಲ್ಲ ಬೋಗಸ್ ಮತದಾರರಿದ್ದರೂ ನಾನು ಗೆದ್ದಿರುವುದು ನಮ್ಮ ಹೆಮ್ಮೆ’ ಎಂದು ಯತ್ನಾಳ ಹೇಳಿದರು.

ಜೋಶಿ ಬಗ್ಗೆ ಹಗುರವಾಗಿ ಮಾತನಾಡಬಾರದು: ಹುಬ್ಬಳ್ಳಿಯಲ್ಲಿ ನಡೆದ ರೈತರ ಧರಣಿಯಲ್ಲಿ ಕೇಂದ್ರ ಸಚಿವ ಪ್ರಹ್ಲಾದ ಜೋಶಿ ಕುರಿತು ವೈಯಕ್ತಿಕವಾಗಿ ಹಾಗೂ ಕುಟುಂಬದ ವಿರುದ್ಧ ಹಗುರವಾಗಿ ರೈತರು ಮಾತನಾಡಿರುವುದು ಸರಿಯಲ್ಲ ಎಂದು ಯತ್ನಾಳ ಹೇಳಿದರು. ಪ್ರಹ್ಲಾದ ಜೋಶಿ ರೈತರ ಪರವಾಗಿದ್ದಾರೆ. ಅವರನ್ನು ಕರೆದುಕೊಂಡು ಪ್ರತಿಭಟನೆ ನಡೆಸಬಹುದಿತ್ತು. ನನ್ನನ್ನು ಕರೆದಿದ್ದರೆ ನಾನೂ ಪ್ರತಿಭಟನೆಯಲ್ಲಿ ಭಾಗವಹಿಸುತ್ತಿದ್ದೆ ಎಂದು ಹೇಳಿದರು.

ಮಹಾಂತ ಸಹದೇವಾನಂದ ಗಿರಿಜಿ, ವೀರಣ್ಣ ಸೊಬರದ್‌, ದೊಡ್ಡಬಸವ ಸುಂಕದ್‌, ಮಹಾಂತಯ್ಯ ಅರಳೇಲಿಮಠ, ದೇವೆಂದ್ರಪ್ಪ ಬಳೂಟಗಿ ಇದ್ದರು.