ಕೊರಗ ಸಮುದಾಯಕ್ಕೆ ನಿವೇಶನ, ಹಕ್ಕು ಪತ್ರ ಆಗ್ರಹಿಸಿ ‘ಅರೆಬೆತ್ತಲೆ ಮೆರವಣಿಗೆ’
ಸಾರಾಂಶ
ವಾಮಂಜೂರು ಮಂಗಳಜ್ಯೋತಿಯಲ್ಲಿ ಕೊರಗ ಸಮುದಾಯದ ನಿವೇಶನ ರಹಿತರಿಗೆ ನಿವೇಶನ ಮತ್ತು ಹಕ್ಕುಪತ್ರ ಕೂಡಲೇ ವಿತರಣೆಗೆ ಒತ್ತಾಯಿಸಿ ವಾಮಂಜೂರು ಜಂಕ್ಷನ್‌ನಿಂದ ಪಡೀಲ್‌ ಜಂಕ್ಷನ್‌ವರೆಗೆ ಕೊರಗ ಫಲಾನುಭವಿಗಳು ಕರ್ನಾಟಕ ಆದಿವಾಸಿ ಹಕ್ಕುಗಳ ಸಮನ್ವಯ ಸಮಿತಿ ನೇತೃತ್ವದಲ್ಲಿ ವಿವಿಧ ಸಂಘಟನೆಗಳ ಜೊತೆಯಲ್ಲಿ ಪಾದಯಾತ್ರೆ - ಅರೆ ಬೆತ್ತಲೆ ಮೆರವಣಿಗೆಯನ್ನು ಸೋಮವಾರ ನಡೆಸಿದರು.
ಮಂಗಳೂರು : ವಾಮಂಜೂರು ಮಂಗಳಜ್ಯೋತಿಯಲ್ಲಿ ಕೊರಗ ಸಮುದಾಯದ ನಿವೇಶನ ರಹಿತರಿಗೆ ನಿವೇಶನ ಮತ್ತು ಹಕ್ಕುಪತ್ರ ಕೂಡಲೇ ವಿತರಣೆಗೆ ಒತ್ತಾಯಿಸಿ ವಾಮಂಜೂರು ಜಂಕ್ಷನ್‌ನಿಂದ ಪಡೀಲ್‌ ಜಂಕ್ಷನ್‌ವರೆಗೆ ಕೊರಗ ಫಲಾನುಭವಿಗಳು ಕರ್ನಾಟಕ ಆದಿವಾಸಿ ಹಕ್ಕುಗಳ ಸಮನ್ವಯ ಸಮಿತಿ ನೇತೃತ್ವದಲ್ಲಿ ವಿವಿಧ ಸಂಘಟನೆಗಳ ಜೊತೆಯಲ್ಲಿ ಪಾದಯಾತ್ರೆ - ಅರೆ ಬೆತ್ತಲೆ ಮೆರವಣಿಗೆಯನ್ನು ಸೋಮವಾರ ನಡೆಸಿದರು.ವಾಮಂಜೂರು, ಪಂಪ್‌ವೆಲ್‌, ಪಡೀಲ್‌ ಮೊದಲಾದ ಕಡೆ ಬಹಿರಂಗ ಸಭೆ ನಡೆಸಿ ತಮ್ಮ ನಿವೇಶನ ಹಕ್ಕಿಗಾಗಿನ ಬೇಡಿಕೆ ಮುಂದಿಟ್ಟರು. ವಾಮಂಜೂರು ಮಂಗಳಜ್ಯೋತಿಯ ಕೊರಗ ಕುಟುಂಬಗಳು ಹಾಗೂ ಪ್ರತಿಭಟನಾಕಾರರ ಅರೆಬೆತ್ತಲೆ ಪಾದಯಾತ್ರೆಯಲ್ಲಿ ಕೊರಗರ ಸಾಂಸ್ಕೃತಿಕ ಪರಿಕರವಾದ ಡೋಲು ವಾದನ ಗಮನ ಸೆಳೆಯಿತು. ಮಧ್ಯಾಹ್ನದ ಉರಿ ಬಿಸಿಲನ್ನೂ ಲೆಕ್ಕಿಸದೆ ಮೆರವಣಿಗೆಯಲ್ಲಿ ಸಾಗಿದರು.
ಸಾಮಾಜಿಕ ಹೋರಾಟಗಾರ, ಸಿಪಿಎಂ ಜಿಲ್ಲಾ ಕಾರ್ಯದರ್ಶಿ ಮುನೀರ್‌ ಕಾಟಿಪಳ್ಳ ಮಾತನಾಡಿ, ಧ್ವನಿ ಇಲ್ಲದ ಕೊರಗ ಸಮುದಾಯದ ಬೇಡಿಕೆಗಳ ಬಗ್ಗೆ ಜಿಲ್ಲಾಡಳಿತ ಸೇರಿದಂತೆ ಸರಕಾರ ಮೌನವಾಗಿದೆ ಎಂದು ಆರೋಪಿಸಿದರು.ವಿವಿಧ ಸಂಘಟನೆಗಳ ನಾಯಕರಾದ ಕರಿಯ ಕೆ. ವಾಸುದೇವ ಉಚ್ಚಿಲ್‌, ಜೆ.ಬಾಲಕೃಷ್ಣ ಶೆಟ್ಟಿ, ಯಾದವ ಶೆಟ್ಟಿ, ಜಯಂತಿ ಶೆಟ್ಟಿ, ಸುನಿಲ್‌ ಕುಮಾರ್‌ ಬಜಾಲ್‌, ಸಂತೋಷ್‌ ಬಜಾಲ್‌, ಯೋಗೀಶ್‌ ಜಪ್ಪಿನಮೊಗರು, ಶೇಖರ್‌ ವಾಮಂಜೂರು, ಪ್ರಮುಖರಾದ ವಿಘ್ನೇಶ್‌ ವಾಮಂಜೂರು, ಪೂರ್ಣಿಮಾ, ಸುನಿ ಮತ್ತಿತರರು ಇದ್ದರು.