ಮೇಲುಕೋಟೆಯಲ್ಲಿ ಇಂದಿನಿಂದ ಅ.20ರವರೆಗೆ ಶರನ್ನವರಾತ್ರಿ ಉತ್ಸವ
ಸಾರಾಂಶ
ಚೆಲುವನಾರಾಯಣಸ್ವಾಮಿ ದೇವಾಲಯದಲ್ಲಿ ಶರನ್ನವರಾತ್ರಿ ಮಹೋತ್ಸವ ಅ.11 ರಿಂದ 20ರವರೆಗೆ ವೈಭವದಿಂದ ನಡೆಯಲಿದೆ. ಪ್ರತಿದಿನ ಬೆಳಗ್ಗೆ 10 ಗಂಟೆಗೆ ಮಹಾಲಕ್ಷ್ಮಿ ಕಲ್ಯಾಣ ನಾಯಕಿ ಅಮ್ಮನವರಿಗೆ ಬಂಗಾರದ ಶೇಷವಾಹನೋತ್ಸವ ಸಡಗರ ಸಂಭದ್ರದಿಂದ ನೆರವೇರಲಿದೆ.
ಮೇಲುಕೋಟೆ:
ಈ ವರ್ಷ ಅಷ್ಟಮಿ ತಿಥಿ ಎರಡು ದಿನಗಳು ಬಂದಿರುವ ಕಾರಣ ದೇವಾಲಯದಲ್ಲಿ 10 ದಿನಗಳ ಕಾಲ ನವರಾತ್ರಿ ನಡಯೆಲಿದೆ. ಮಹಾನವಮಿ ಅ.20ರ ಮಂಗಳವಾರ ಮತ್ತು ವಿಜಯದಶಮಿ ಆಚರಣೆ ಅ.21ರ ಬುಧವಾರ ನಡೆಯಲಿದೆ
ನವರಾತ್ರಿ ಮಹೋತ್ಸವದ ಅಂಗವಾಗಿ ಮಹಾಲಕ್ಷ್ಮಿ ಕಲ್ಯಾಣನಾಯಕಿ ಅಮ್ಮನವರಿಗೆ ವಿಶೇಷ ತೋಮಾಲೆ, ಮಂಗಳವಾದ್ಯ ದಿವ್ಯಪ್ರಬಂಧ ಪಾರಾಯಣದೊಂದಿಗೆ ಪ್ರತಿದಿನವೂ ಬೆಳಿಗ್ಗೆ ಬಂಗಾರದ ಶೇಷವಾಹನೋತ್ಸವ ನಾಲ್ಕೂ ಉತ್ಸವ ಬೀದಿಗಳಲ್ಲಿ ನೆರವೇರಲಿದೆ. ಇದಕ್ಕೂ ಮುನ್ನ ವೇಣುವಾದನದೊಂದಿಗೆ ಮಹಾಲಕ್ಷ್ಮಿ ಕಲ್ಯಾಣನಾಯಕಿ ಅಮ್ಮನವರಿಗೆ ಪಲ್ಲಕ್ಕಿ ಉತ್ಸವ ನಡೆಯಲಿದೆ. ನವರಾತ್ರಿ ಮಂಟಪದಲ್ಲಿ ಪ್ರತಿದಿನ ವಿಶೇಷಪೂಜಾ ಕೈಂಕರ್ಯಗಳು ನಡೆಯಲಿದೆ.ಚೆಲುವನಾರಾಯಣಸ್ವಾಮಿ ನವರಾತ್ರಿ-ವಿಜಯದಶಮಿ ಮಹೋತ್ಸವವನ್ನು ವೈಭವದಿಂದ ನಡೆಸಲು ಹಾಗೂ ಉತ್ಸವಕ್ಕೆ ಆಕರ್ಷಣೆ ತಂದುಕೊಡಲು ಜಿಲ್ಲಾಡಳಿತ ಸಹಕಾರ ನೀಡಲಿದೆ ಎಂದು ಜಿಲ್ಲಾಧಿಕಾರಿ ಡಾ.ಕುಮಾರ್ ಮತ್ತು ಅಪರ ಜಿಲ್ಲಾಧಿಕಾರಿ ಶಿವಾನಂದಮೂರ್ತಿ ತಿಳಿಸಿದ್ದಾರೆ.
ಮೇಲುಕೋಟೆ ಶಾಸಕ ದರ್ಶನ್‌ ಪುಟ್ಟಣ್ಣಯ್ಯ ಭಕ್ತರು ಹಾಗೂ ಸ್ಥಾನೀಕರ ಮನವಿಗೆ ಸ್ಪಂದಿಸಿ ಸೂಚನೆ ನೀಡಿದ ಪರಿಣಾಮ ವಿಜಯದಶಮಿ, ನವರಾತ್ರಿ ಮಹೋತ್ಸವವನ್ನು ಆಕರ್ಷಕವಾಗಿ ವೈಭವಪೂರ್ಣವಾಗಿ ವ್ಯವಸ್ಥಾಪನಾ ಸಮಿತಿ ಸಹಕಾರದಲ್ಲಿ ನಡೆಯಲಿದೆ. ಸಮಿತಿ ಸದಸ್ಯರಾದ ವಕೀಲಕಾಡೇನಹಳ್ಳಿಸತೀಶ್, ವಿ.ವೆಂಕಟರಾಮೇಗೌಡ, ವೆಂಕಟೇಶ್, ಸ್ಥಾನೀಕಂ ಸಂತಾನರಾಮನ್ ಮತ್ತಿತರರು ಇದ್ದರು.
ಮೈಸೂರು ಅರಸರ ಕುಲದೈವ ಚೆಲುವನಾರಾಯಣಸ್ವಾಮಿಗೆ ಅ.21ರ ವಿಜಯದಶಮಿಯಂದು ಮಹಾರಾಜರ ಅಲಂಕಾರ ನೆರವೇರಿಸಲಾಗುತ್ತದೆ. ಸಂಜೆ ಶ್ರೀಸ್ವಾಮಿಗೆ ಕುದುರೆವಾಹನೋತ್ಸವದ ಜಂಬೂಸವಾರಿ, ಬನ್ನಿಪೂಜೆ, ವಿಜಯೋತ್ಸವ ಮೆರವಣಿಗೆ ಅದ್ಧೂರಿಯಾಗಿ ನಡೆಯಲಿದೆ. ಬನ್ನಿಪೂಜೆ ಮುಗಿಸಿ ವಿಜಯೋತ್ಸವದೊಂದಿಗೆ ಅಶ್ವವಾಹನದಲ್ಲಿ ಬರುವ ಚೆಲುವನಾರಾಯಣಸ್ವಾಮಿಯನ್ನು ದೊಡ್ಡ ಶೇಷವಾಹನದಲ್ಲಿ ಮಹಾಲಕ್ಷ್ಮಿ ಆಗಮಿಸಿ ಅಂಗಡಿಬೀದಿ ವೃತ್ತದಲ್ಲಿ ಎದುರುಗೊಂಡು ಸಾಂಪ್ರದಾಯಿಕವಾಗಿ ಸ್ವಾಗತಿಸಿದ ನಂತರ ನಾಲ್ಕೂ ಬೀದಿಗಳಲ್ಲಿ ವಿಜೃಂಭಣೆಯಿಂದ ಉತ್ಸವ ನಡೆಯಲಿದೆ