ಗುಜರಾತಿನಿಂದ ಕೈಗಾದತ್ತ ಹೊರಟ ಸ್ಟೀಮ್ ಜನರೇಟರ್

ವಸಂತಕುಮಾರ್ ಕತಗಾಲ

ಕಾರವಾರ: ಕೈಗಾದಲ್ಲಿ ನಿರ್ಮಿಸಲು ಉದ್ದೇಶಿಸಿರುವ ತಲಾ 700 ಮೆ.ವ್ಯಾ.ಗಳ 5 ಹಾಗೂ 6ನೇ ಅಣು ವಿದ್ಯುತ್ ಘಟಕ ನಿರ್ಮಾಣಕ್ಕೆ ಪೂರ್ವಭಾವಿ ಸಿದ್ಧತೆ ಭರದಿಂದ ನಡೆಯುತ್ತಿದೆ. ಗುಜರಾತಿನಿಂದ ಎರಡನೇ ಸ್ಟೀಮ್ ಜನರೇಟರ್ ಕೈಗಾದತ್ತ ಹೊರಟಿದೆ. ಆಗಸ್ಟ್‌ ಮೊದಲ ವಾರದಲ್ಲಿ ಕೈಗಾ ತಲುಪಲಿದೆ. ಈ ಎರಡೂ ಘಟಕಗಳು ಸ್ವದೇಶಿ ನಿರ್ಮಿತವಾಗಿರುವುದು ವಿಶೇಷವಾಗಿದೆ.

ಲಾರ್ಸೆನ್ ಮತ್ತು ಟೊಬ್ರೋ (ಎಲ್ ಆ್ಯಂಡ್ ಟಿ ), ಗುಜರಾತದ ಹಜಿರಾದಲ್ಲಿರುವ ಎ.ಎಂ. ನಾಯಕ ಹೆವಿ ಎಂಜಿನಿಯರಿಂಗ್ ಕಾಂಪ್ಲೆಕ್ಸ್‌ನಿಂದ ಈ ಸ್ಟೀಮ್ ಜನರೇಟರ್‌ ಅನ್ನು ನಿಗದಿತ ಸಮಯಕ್ಕಿಂತ 11 ತಿಂಗಳು ಮುಂಚಿತವಾಗಿ ಕಳುಹಿಸಿದೆ. ಮೊದಲನೇ ಸ್ಟೀಮ್ ಜನರೇಟರ್ ಈಗಾಗಲೆ ಕೈಗಾಕ್ಕೆ ಆಗಮಿಸಿದೆ.

ಏನಿದು ಸ್ಟೀಮ್ ಜನರೇಟರ್?: ಪರಮಾಣು ಶಕ್ತಿ ಉತ್ಪಾದನೆಯಲ್ಲಿ ನಿರ್ಣಾಯಕವಾಗಿರುವ ಸ್ಟೀಮ್ ಜನರೇಟರ್ ಪರಮಾಣು ಕೋರ್‌ನಲ್ಲಿ ಉತ್ಪತ್ತಿಯಾಗುವ ಉಷ್ಣತೆಯನ್ನು ಬಳಸಿಕೊಂಡು ನೀರನ್ನು ಉಗಿಯಾಗಿ ಪರಿವರ್ತಿಸುವ ಶಾಖ ವಿನಿಮಯಕಾರಕವಾಗಿ ಕಾರ್ಯನಿರ್ವಹಿಸುತ್ತದೆ. ಈ ಸ್ಟೀಮ್ ಜನರೇಟರ್ ಅನ್ನು ದೇಶೀಯವಾಗಿಯೇ ಉತ್ಪಾದಿಸಲಾಗಿದೆ.

ನಡೆಯಲಿದೆ ಎರಡು ಸರ್ವೆ: ಕೈಗಾದಲ್ಲಿ 5 ಹಾಗೂ 6ನೇ ಘಟಕ ನಿರ್ಮಾಣಕ್ಕೆ ಮುನ್ನ ವನ್ಯಜೀವಿಗಳ ಸಂತತಿ ಹಾಗೂ ಆಹಾರದ ಪದ್ಧತಿಯ ಕುರಿತು ಸದ್ಯದಲ್ಲಿಯೇ ಸರ್ವೆ ನಡೆಯಲಿದೆ. ಚೆನೈನ ಹಸಿರು ಪೀಠದ ಸೂಚನೆ ಹಿನ್ನೆಲೆಯಲ್ಲಿ ಈ ಸಮೀಕ್ಷೆ ನಡೆಯಲಿದೆ. ಉದ್ದೇಶಿತ ಘಟಕಗಳಿಗೆ ಪರಿಸರ ಸಚಿವಾಲಯದ ಪರವಾನಗಿ ದೊರೆತಿದ್ದು, ಹಸಿರು ಪೀಠ ಈ ಸಮೀಕ್ಷೆ ವರದಿ ಆಧಾರದಲ್ಲಿ ಪರವಾನಗಿ ನೀಡುವುದನ್ನು ನಿರ್ಧರಿಸಲಿದೆ.

ಕೈಗಾ ಹಾಗೂ ಸುತ್ತಮುತ್ತ ಇರುವ ನಾಲ್ಕು ಅಣು ವಿದ್ಯುತ್ ಘಟಕಗಳ ಆರಂಭಕ್ಕೆ ಇರುವ ವನ್ಯಜೀವಿಗಳ ಸಂತತಿ ಹಾಗೂ ನಂತರದ ಸ್ಥಿತಿಗತಿಗಳ ಬಗ್ಗೆ ಡೆಹರಾಡೂನ್‌ನ ವೈಲ್ಡ್ ಲೈಫ್ ಇನ್‌ಸ್ಟಿಟ್ಯೂಟ್‌ನಿಂದ ಸಮೀಕ್ಷೆ ನಡೆಯಲಿದೆ.

ಮಂಗಳೂರು ಯುನಿವರ್ಸಿಟಿಯಿಂದ ಕೈಗಾ ಸುತ್ತಮುತ್ತಲಿನ ಪ್ರದೇಶದಲ್ಲಿ ಆಹಾರ ಪದ್ಧತಿಯಲ್ಲಿ ಬದಲಾವಣೆ ಆಗಿದೆಯೇ ಎನ್ನುವ ಕುರಿತು ಹಾಗೂ ಬಳಸುವ ಆಹಾರದ ಬಗ್ಗೆ ಸಮೀಕ್ಷೆ ನಡೆಯಲಿದೆ. ಈ ಸಮೀಕ್ಷೆಯಲ್ಲಿ ಪೂರಕ ಅಂಶಗಳು ಕಂಡುಬಂದಲ್ಲಿ 5 ಹಾಗೂ 6ನೇ ಘಟಕಗಳ ನಿರ್ಮಾಣ ಕಾರ್ಯಕ್ಕೆ ಹಸಿರು ಪೀಠದ ಪರವಾನಗಿ ಸುಲಭವಾಗಿ ದೊರೆಯಲಿದೆ.

ಹಸಿರು ಪೀಠ ಕೈಗಾದಲ್ಲಿರುವ ನಾಲ್ಕು ಅಣು ವಿದ್ಯುತ್ ಘಟಕಗಳಿಂದ ಪರಿಸರದ ಮೇಲಾಗಿರುವ ಪರಿಣಾಮಗಳ ಬಗ್ಗೆ ವರದಿ ನೀಡಲು ಸೂಚಿಸಿತ್ತು. ಆ ಹಿನ್ನೆಲೆಯಲ್ಲಿ ಎನ್ವಿರಾನ್‌ಮೆಂಟಲ್ ಎಪ್ರಾಯ್ಸರ್ ಕಮಿಟಿ ಇತ್ತೀಚೆಗೆ ಕೈಗಾಕ್ಕೆ ಆಗಮಿಸಿ ಅಗತ್ಯ ಮಾಹಿತಿಯನ್ನು ಪಡೆದುಕೊಂಡು, ಅಧಿಕಾರಿಗಳೊಂದಿಗೆ ಸಭೆಯನ್ನೂ ನಡೆಸಿದ್ದು, ಸದ್ಯದಲ್ಲಿಯೇ ವರದಿ ನೀಡಲಿದೆ.

5 ಹಾಗೂ 6ನೇ ಘಟಕ ನಿರ್ಮಾಣಕ್ಕೆ ಈಗಾಗಲೆ ಟೆಂಡರ್ ಕೂಡ ಆಗಿದೆ. ₹21 ಸಾವಿರ ಕೋಟಿ ವೆಚ್ಚದ ಯೋಜನೆ ಇದಾಗಿದ್ದು, 2029-30ರ ವೇಳೆಗೆ ವಿದ್ಯುತ್ ಉತ್ಪಾದನೆಗೆ ಸಜ್ಜಾಗಲಿದೆ. ಶೀಘ್ರ ಸಮೀಕ್ಷೆ: ಈಗಾಗಲೆ ಒಂದು ಸ್ಟೀಮ್ ಜನರೇಟರ್ ಕೈಗಾಕ್ಕೆ ಬಂದಿದೆ. ಇನ್ನೊಂದು ಸ್ಟೀಮ್ ಜನರೇಟರ್ ಗುಜರಾತಿನಿಂದ ಹೊರಟಿದ್ದು, ಆಗಸ್ಟ್‌ ಮೊದಲನೇ ವಾರದಲ್ಲಿ ಕೈಗಾಕ್ಕೆ ತಲುಪಲಿದೆ. ವನ್ಯಜೀವಿ ಹಾಗೂ ಆಹಾರ ಪದ್ಧತಿಯ ಸಮೀಕ್ಷೆ ಸದ್ಯದಲ್ಲೇ ಆರಂಭವಾಗಲಿದೆ ಎಂದು ಕೈಗಾ ಅಣು ವಿದ್ಯುತ್ ನಿಗಮದ ಸ್ಟೇಶನ್ ಡೈರೆಕ್ಟರ್‌ ಪ್ರಮೋದ ಜಿ. ರಾಯಚೂರ ತಿಳಿಸಿದರು.