ದೇವರ ಮುಂದೆ ಪ್ರಮಾಣ ಮಾಡುವುದರಿಂದ ಪ್ರಾಮಾಣಿಕತೆ ಸಾಬೀತಾಗದು: ಜೆಡಿಎಸ್ ಮುಖಂಡರ ವಾಗ್ದಾಳಿ
ಸಾರಾಂಶ
ಶಿವಲಿಂಗೇಗೌಡರ ರಾಜಕೀಯ ಜೀವನಕ್ಕೆ ಮಾಜಿ ಪ್ರಧಾನಿ ಎಚ್.ಡಿ. ದೇವೇಗೌಡರು, ಎಚ್.ಡಿ. ಕುಮಾರಸ್ವಾಮಿ ಹಾಗೂ ಎಚ್.ಡಿ. ರೇವಣ್ಣ ಅವರು ಬೆಂಬಲವಾಗಿ ನಿಂತಿದ್ದರು. ೨೦೦೨ರಲ್ಲಿ ಬಾಗೇಶಪುರ ಜಿಲ್ಲಾ ಪಂಚಾಯಿತಿ ಕ್ಷೇತ್ರದಿಂದ ಟಿಕೆಟ್ ಕೊಡಿಸಿ ಗೆಲ್ಲಿಸಿದ್ದು ಜೆಡಿಎಸ್ ನಾಯಕರು. ೨೦೦೪ರ ಚುನಾವಣೆಯ ಸೋಲಿನ ಬಳಿಕವೂ ರಾಜಕೀಯವಾಗಿ ಬೆಂಬಲ ನೀಡಿದ್ದರು. ಅರಸೀಕೆರೆ ಕ್ಷೇತ್ರದಲ್ಲಿ ನೆಲೆ ಕಂಡುಕೊಳ್ಳಲು ನೆರವಾದವರನ್ನೇ ಇಂದು ಟೀಕಿಸುತ್ತಿರುವುದು ಕೃತಘ್ನ ರಾಜಕಾರಣಕ್ಕೆ ಸಾಕ್ಷಿ ಎಂದು ಆರೋಪಿಸಿದರು.
ಕನ್ನಡಪ್ರಭ ವಾರ್ತೆ ಹಾಸನ
ನಗರ ಖಾಸಗಿ ಹೊಟೇಲೊಂದರಲ್ಲಿ ಬುಧವಾರ ಜಂಟಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಕೇಂದ್ರ ಸಚಿವ ಎಚ್.ಡಿ. ಕುಮಾರಸ್ವಾಮಿ ಅವರು ಜಿಲ್ಲಾಧಿಕಾರಿ ಕಚೇರಿಯ ಪಿಎ ಮತ್ತು ಮಧ್ಯವರ್ತಿ ನಡುವಿನ ವಾಟ್ಸ್‌ಆಪ್ ಸಂಭಾಷಣೆ ಪ್ರಸ್ತಾಪಿಸಿ ತನಿಖೆಗೆ ಒತ್ತಾಯಿಸಿದರು. ಚಾಟ್‌ನಲ್ಲಿ ಸಚಿವರು ಸೇರಿದಂತೆ ಹಲವು ಅಧಿಕಾರಿಗಳ ಹೆಸರುಗಳಿವೆ ಎಂಬ ಆರೋಪ ಕೇಳಿಬಂದಿದೆ. ತಾವು ತಪ್ಪು ಮಾಡಿಲ್ಲವೆಂದಾದರೆ ಸಚಿವರು ಸ್ವತಃ ದೂರು ನೀಡಿ ತನಿಖೆಗೆ ಅವಕಾಶ ಮಾಡಿಕೊಡಲಿ. ತನಿಖೆಗೂ ಮುನ್ನವೇ ಆರೋಪಗಳನ್ನು ಸುಳ್ಳು ಎಂದು ತೀರ್ಮಾನಿಸುವ ಅಧಿಕಾರ ಅವರಿಗಿದೆಯೇ ಎಂದು ಪ್ರಶ್ನಿಸಿದರು.
ಶಿವಲಿಂಗೇಗೌಡರ ರಾಜಕೀಯ ಜೀವನಕ್ಕೆ ಮಾಜಿ ಪ್ರಧಾನಿ ಎಚ್.ಡಿ. ದೇವೇಗೌಡರು, ಎಚ್.ಡಿ. ಕುಮಾರಸ್ವಾಮಿ ಹಾಗೂ ಎಚ್.ಡಿ. ರೇವಣ್ಣ ಅವರು ಬೆಂಬಲವಾಗಿ ನಿಂತಿದ್ದರು. ೨೦೦೨ರಲ್ಲಿ ಬಾಗೇಶಪುರ ಜಿಲ್ಲಾ ಪಂಚಾಯಿತಿ ಕ್ಷೇತ್ರದಿಂದ ಟಿಕೆಟ್ ಕೊಡಿಸಿ ಗೆಲ್ಲಿಸಿದ್ದು ಜೆಡಿಎಸ್ ನಾಯಕರು. ೨೦೦೪ರ ಚುನಾವಣೆಯ ಸೋಲಿನ ಬಳಿಕವೂ ರಾಜಕೀಯವಾಗಿ ಬೆಂಬಲ ನೀಡಿದ್ದರು. ಅರಸೀಕೆರೆ ಕ್ಷೇತ್ರದಲ್ಲಿ ನೆಲೆ ಕಂಡುಕೊಳ್ಳಲು ನೆರವಾದವರನ್ನೇ ಇಂದು ಟೀಕಿಸುತ್ತಿರುವುದು ಕೃತಘ್ನ ರಾಜಕಾರಣಕ್ಕೆ ಸಾಕ್ಷಿ ಎಂದು ಆರೋಪಿಸಿದರು.ಜೆಡಿಎಸ್ ತೊರೆಯುವುದಿಲ್ಲ ಎಂದು ದೇವೇಗೌಡರ ಸಮ್ಮುಖದಲ್ಲಿ ಹಾಗೂ ಮಗನ ಮೇಲೆ ಪ್ರಮಾಣ ಮಾಡಿದ್ದವರು ಬಳಿಕ ಪಕ್ಷ ತೊರೆದಿದ್ದು, ಹಣ ಪಡೆದಿಲ್ಲ ಎಂದು ದೇವಿಯ ಮುಂದೆ ಪ್ರಮಾಣ ಮಾಡುವ ಸಚಿವರು, ಸಚಿವ ಸ್ಥಾನ ಪಡೆಯಲು ಯಾವುದೇ ಹಣ ನೀಡಿಲ್ಲ ಎಂಬುದನ್ನೂ ಪ್ರಮಾಣ ಮಾಡಿ ಹೇಳಲಿ ಎಂದು ಸವಾಲು ಹಾಕಿದರು.
ಕಾಂಗ್ರೆಸ್‌ನಲ್ಲಿಯೂ ಶಿವಲಿಂಗೇಗೌಡರ ವಿರುದ್ಧ ಅಸಮಾಧಾನ ವ್ಯಕ್ತವಾಗುತ್ತಿದೆ. ಜಿಲ್ಲೆಯ ಆಡಳಿತದಲ್ಲಿ ಸಚಿವರ ಹಿಡಿತದ ಬಗ್ಗೆಯೂ ಪ್ರಶ್ನೆಗಳು ಮೂಡಿವೆ. ಆರೋಪ- ಪ್ರತ್ಯಾರೋಪಗಳ ಬದಲಿಗೆ ವಾಟ್ಸ್‌ ಆ್ಯಪ್ ಸಂಭಾಷಣೆಯ ಕುರಿತು ನಿಷ್ಪಕ್ಷಪಾತ ತನಿಖೆ ನಡೆಸಿ ಸತ್ಯಾಸತ್ಯತೆ ಬಹಿರಂಗಪಡಿಸಬೇಕು. ಅಧಿಕಾರ ಮತ್ತು ಸ್ವಾರ್ಥಕ್ಕಿಂತ ಸಾರ್ವಜನಿಕ ಜೀವನದಲ್ಲಿ ಪ್ರಾಮಾಣಿಕತೆ ಮುಖ್ಯ ಎಂದು ಆಗ್ರಹಿಸಿದರು.