ಗೋಸಂರಕ್ಷಣೆಗಾಗಿ ೩೧ ಕೋಟಿ ಸಹಿ ಸಂಗ್ರಹದ ಗುರಿ: ರವೀಂದ್ರನಾಥ ಭಾರತೀ ಸ್ವಾಮೀಜಿ

KannadaprabhaNewsNetwork |  
Published : Nov 21, 2026, 02:15 AM IST
ಫೋಟೋ : ೨೦ಕೆಎಂಟಿ_ಎನ್‌ಒವಿ_ಕೆಪಿ೧ + ೧ಎ : ಮಾಸ್ತಿಕಟ್ಟೆಯಲ್ಲಿ ಮಹಾ ನಂದಿ ರಥಕ್ಕೆ ಪೂಜೆ ಸಲ್ಲಿಸಿ ಗೋಸಂರಕ್ಷಣಾ ಸಹಿ ಸಂಗ್ರಹ ಅಭಿಯಾನಕ್ಕೆ ನಂದಬಾಬಾ ಸ್ವಾಮೀಜಿ ಚಾಲನೆ ನೀಡಿದರು. ಆರೂಢಭಾರತೀ ಸ್ವಾಮೀಜಿ ಇತರರು ಇದ್ದರು.   | Kannada Prabha

ಸಾರಾಂಶ

ಬೆಂಗಳೂರಿನ ಸಂಸ್ಕೃತ ವಿದ್ಯಾಲಯದ ಪ್ರಾಧ್ಯಾಪಕರಾದ ಸ್ವಾಮಿ ಆರೂಢ ಭಾರತೀ ಸ್ವಾಮಿಜಿ ಮಾತನಾಡಿ, ತಾಲೂಕಿನಾದ್ಯಂತ ರಥ ಸಂಚರಿಸಿ ಸಹಿ ಸಂಗ್ರಹಿಸಿ, ಮುಂದಿನ ದಿನಗಳಲ್ಲಿ ಅಂಕೋಲಾ, ಕಾರವಾರ, ಶಿರಸಿ, ಸಿದ್ದಾಪುರ ಸೇರಿದಂತೆ ಜಿಲ್ಲಾದ್ಯಂತ ಸಹಿ ಸಂಗ್ರಹ ಅಭಿಯಾನ ನಡೆಸಲಿದ್ದೇವೆ ಎಂದರು.

ಕುಮಟಾ: ಭಾರತದಲ್ಲೆಲ್ಲೂ ಗೋವಿನ ಹತ್ಯೆಯಾಗದಂತೆ ಕಾನೂನು ಜಾರಿಯಾಗಬೇಕು. ಗೋವಿಗೆ ರಾಷ್ಟ್ರೀಯ ಗೌರವ ಸಿಗಬೇಕು ಎಂಬ ಕಾರಣಕ್ಕೆ ಈ ಬಾರಿ ೩೧ ಕೋಟಿ ಸಹಿ ಸಂಗ್ರಹಿಸುವ ಗುರಿಯೊಂದಿಗೆ ಅಭಿಯಾನ ಆರಂಭಿಸಿದ್ದೇವೆ ಎಂದು ರವೀಂದ್ರನಾಥ ಭಾರತೀ ಸ್ವಾಮೀಜಿ(ನಂದಿಬಾಬಾ) ನುಡಿದರು.

ಪಟ್ಟಣದ ಮಹಾಸತಿ ದೇವಾಲಯದಲ್ಲಿ ಶುಕ್ರವಾರ ಮಹಾ ನಂದಿ ರಥಕ್ಕೆ ಪೂಜೆ ಸಲ್ಲಿಸಿ, ಗೋಪೂಜೆ ಮೂಲಕ ಸಹಿ ಸಂಗ್ರಹ ಅಭಿಯಾನಕ್ಕೆ ಚಾಲನೆ ನೀಡಿ ಮಾತನಾಡಿದರು.

ಭಾರತದ ಸನಾತನ ಪರಂಪರೆ ಸಂಸ್ಕೃತಿ ಮೂಲ ಆಧಾರವೇ ಗೋವು. ಪ್ರತಿಯೊಂದು ಗ್ರಾಮದಿಂದಲೂ ಗೋಸಮ್ಮಾನ ಅಭಿಯಾನಕ್ಕಾಗಿ ಸಹಿ ಸಂಗ್ರಹಿಸಿ ಕೇಂದ್ರ ಸರ್ಕಾರದಲ್ಲಿ ಗೋಮಂತ್ರಾಲಯದ ರಚನೆಯಾಗಬೇಕು. ಗೋಹತ್ಯಾ ನಿಷೇಧ ಹಾಗೂ ಗೋವಿನ ಸಂರಕ್ಷಣೆಯ ಕಾನೂನು ಜಾರಿಯಾಗಬೇಕು. ಈ ಮೂಲಕ ಹಿಂದೆ ಋಷಿಮುನಿಗಳಿಂದ ಆರಂಭಿಸಿ ಈವರೆಗೆ ಗೋಮಾತೆಗೆ ನ್ಯಾಯ ಕೊಡುವ ಪ್ರಯತ್ನವಾಗಬೇಕು. ಹಿಂದೆ ೨೦ ಕೋಟಿ ಸಹಿ ಸಂಗ್ರಹಿಸಿ ನೀಡಿದ್ದೇವೆ. ನಮ್ಮ ಅಭಿಯಾನಕ್ಕೆ ಗೋಕರ್ಣ ರಾಮಚಂದ್ರಾಪುರಮಠದ ರಾಘವೇಶ್ವರ ಭಾರತೀ ಶ್ರೀಗಳ ಸಹಯೋಗ ಮಾರ್ಗದರ್ಶನದಲ್ಲಿ ರಥ ಯಾತ್ರೆ ಮೂಲಕ ಈ ಜಿಲ್ಲೆಯಲ್ಲಿ ಉತ್ತಮ ಸಂದೇಶ ಬಿತ್ತರಿಸುತ್ತಿದ್ದೇವೆ ಎಂದರು.

ಬೆಂಗಳೂರಿನ ಸಂಸ್ಕೃತ ವಿದ್ಯಾಲಯದ ಪ್ರಾಧ್ಯಾಪಕರಾದ ಸ್ವಾಮಿ ಆರೂಢ ಭಾರತೀ ಸ್ವಾಮಿಜಿ ಮಾತನಾಡಿ, ತಾಲೂಕಿನಾದ್ಯಂತ ರಥ ಸಂಚರಿಸಿ ಸಹಿ ಸಂಗ್ರಹಿಸಿ, ಮುಂದಿನ ದಿನಗಳಲ್ಲಿ ಅಂಕೋಲಾ, ಕಾರವಾರ, ಶಿರಸಿ, ಸಿದ್ದಾಪುರ ಸೇರಿದಂತೆ ಜಿಲ್ಲಾದ್ಯಂತ ಸಹಿ ಸಂಗ್ರಹ ಅಭಿಯಾನ ನಡೆಸಲಿದ್ದೇವೆ. ನಮ್ಮೆಲ್ಲರ ಉದ್ಧಾರಕ್ಕಾಗಿ ಅವತರಿಸಿದ ಬಂದ ಪುಣ್ಯಕೋಟಿಯ ಉಳಿವಿಗಾಗಿ ಯಾರೂ ಜೀವ ಕೊಡಬೇಕೆಂದಿಲ್ಲ, ದುಡ್ಡು ಕೊಡಬೇಕೆಂದಿಲ್ಲ, ಆಸ್ತಿ ಪಾಸ್ತಿ ಕೊಡಬೇಕೆಂದಿಲ್ಲ, ಸಮಾಜದ ಸಾಮರಸ್ಯ ಹಾನಿ ಮಾಡುವ ಉದ್ದೇಶವೂ ಇಲ್ಲ. ಈ ಅಭಿಯಾನದ ಮುಖ್ಯ ಉದ್ದೇಶ ಗೋಹತ್ಯಾ ನಿಷೇಧ ಕಾನೂನು ಜಾರಿಗೆ ತರಲು ಮನವಿ ಪತ್ರಕ್ಕೆ ಸಾರ್ವಜನಿಕರ ಹಸ್ತಾಕ್ಷರ ಸಂಗ್ರಹ ಮಾತ್ರ. ಗೋಮಾತೆಯ ಉಳಿವು ಜೀವ ಸಂಕುಲದ ಉಳಿವು ಎಂದರು.

ಶಾಸಕ ದಿನಕರ ಶೆಟ್ಟಿ ಮಾತನಾಡಿ, ಗೋಮಾತೆಯ ಮಹತ್ವ, ಗೋಸಂರಕ್ಷಣೆಯ ಅಗತ್ಯತೆ ಹಾಗೂ ಭಾರತೀಯ ಸಂಸ್ಕೃತಿ ಮತ್ತು ಪರಂಪರೆಯಲ್ಲಿ ಗೋಮಾತೆ ಹೊಂದಿರುವ ಪವಿತ್ರ ಸ್ಥಾನವನ್ನು ಉಳಿಸಿ ಬೆಳೆಸುವ ಈ ಅಭಿಯಾನ ಅತ್ಯಂತ ಅರ್ಥಪೂರ್ಣವೂ ಅತ್ಯಾವಶ್ಯಕವೂ ಆಗಿದೆ. ಗೋಮಾತೆಯ ರಕ್ಷಣೆ, ಪೋಷಣೆ ಮತ್ತು ಸಂವರ್ಧನೆಗಾಗಿ ಕೈಜೋಡಿಸುವ ಸಂಕಲ್ಪವನ್ನು ಸಮಾಜದ ಪ್ರತಿಯೊಬ್ಬರೂ ಮಾಡಬೇಕು. ಗೋಮಾತೆಯ ರಕ್ಷಣೆ ನಮ್ಮೆಲ್ಲರ ಹೊಣೆ ಎಂದರು.

ಕೃಷ್ಣಪ್ರಸಾದ ಎಡಪ್ಪವು, ಡಾ. ಸುರೇಶ ಹೆಗಡೆ, ಮುರಳೀಧರ ಪ್ರಭು, ಜಿ.ಎಸ್. ಹೆಗಡೆ, ಹೇಮಂತಕುಮಾರ ಗಾಂವ್ಕರ್, ಎಸ್.ವಿ. ಹೆಗಡೆ ಭದ್ರನ್, ಸುಬ್ರಾಯ ಭಟ್ ಇತರರು ಪಾಲ್ಗೊಂಡಿದ್ದರು.

PREV
Get the latest news from across Karnataka (ಕರ್ನಾಟಕ ನ್ಯೂಸ್)— breaking headlines, politics, local developments, crime reports, district updates, civic issues and more. Stay informed with Kannada Prabha’s real‑time Karnataka news coverage.

Recommended Stories

ಬಿಜೆಪಿ ಜಿಲ್ಲಾ ಹಿಂದುಳಿದ ವರ್ಗಗಳ ಮೋರ್ಚಾ ಪದಗ್ರಹಣ
ಬ್ರಹ್ಮಾವರ ರುಡ್‌ಸೆಟ್‌ನಲ್ಲಿ ಕೆನರಾ ಬ್ಯಾಂಕ್ ಸಂಸ್ಥಾಪಕರ ಜನ್ಮದಿನಾಚರಣೆ