ಮತ್ತೆ ಶುರುಗೊಂಡ ತಿಂಗಳ ಸೊಬಗು; ಮುದ ನೀಡಿದ ವಿವಿಧ ಕಲಾ ಪ್ರದರ್ಶನ

KannadaprabhaNewsNetwork |  
Published : Nov 23, 2026, 02:15 AM IST
ಬಳ್ಳಾರಿಯ ನಾಡೋಜ ಸುಭದ್ರಮ್ಮ ಮನ್ಸೂರು ಬಯಲು ರಂಗಮಂದಿರ ಶನಿವಾರ ಸಂಜೆ ಜರುಗಿದ ತಿಂಗಳ ಸೊಬಗು ಕಾರ್ಯಕ್ರಮದಲ್ಲಿ ಲಕ್ಷ್ಮಿ ಕಲಾ ಟ್ರಸ್ಟ್ ತಂಡದ ಮಕ್ಕಳು ಸಮೂಹ ನೃತ್ಯ ಪ್ರದರ್ಶಿಸಿ ಗಮನ ಸೆಳೆದರು. | Kannada Prabha

ಸಾರಾಂಶ

ಗ್ರಾಮೀಣ ಕಲಾ ಪ್ರಕಾರವಾದ ಬಯಲಾಟದ ಸೊಗಡನ್ನು ನಗರ ವಾಸಿಗಳಿಗೆ ಪರಿಚಯಿಸುವಲ್ಲಿ ಈ ಪ್ರದರ್ಶನ ಯಶಸ್ವಿಯಾಯಿತು

ಬಳ್ಳಾರಿ: ಕಳೆದ ಒಂದು ವರ್ಷದಿಂದ ಸ್ಥಗಿತಗೊಂಡಿದ್ದ ತಿಂಗಳ ಸೊಬಗು ಸಾಂಸ್ಕೃತಿಕ ಕಾರ್ಯಕ್ರಮಕ್ಕೆ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಮತ್ತೆ ಆರಂಭಿಸಿದ್ದು, ಇಲ್ಲಿನ ಸಾಂಸ್ಕೃತಿಕ ಸಮುಚ್ಚಯದ ನಾಡೋಜ ಸುಭದ್ರಮ್ಮ ಮನ್ಸೂರು ಬಯಲು ರಂಗಮಂದಿರ ಶನಿವಾರ ಸಂಜೆ ಜರುಗಿದ ವಿವಿಧ ಕಲಾ ಪ್ರಕಾರಗಳ ಪ್ರದರ್ಶನ ಮುದ ನೀಡಿದವು.

ಬಳ್ಳಾರಿಯ ಖ್ಯಾತ ಹಾಸ್ಯ ಕಲಾವಿದ ಎ.ಎಂ.ಎರಿಸ್ವಾಮಿ ತಮ್ಮ ಹಾಸ್ಯ ಚಟಾಕಿಗಳ ಮೂಲಕ ಪ್ರೇಕ್ಷಕರನ್ನು ನಗೆಗಡಲಲ್ಲಿ ತೇಲಿಸಿದರು. ದೈನಂದಿನ ಬದುಕಿನ ಸನ್ನಿವೇಶ ಹಾಸ್ಯದ ಲೇಪನದೊಂದಿಗೆ ಕಟ್ಟಿಕೊಟ್ಟ ಅವರ ಮಾತಿನ ವೈಖರಿ ಸಭಿಕರನ್ನು ರಂಜಿಸಿತು. ಒಂದೊಂದೇ ಹಾಸ್ಯ ಪ್ರಸಂಗಗಳಿಗೆ ಪ್ರೇಕ್ಷಕರಿಂದ ಚಪ್ಪಾಳೆ,ನಗೆಯ ಪ್ರತಿಕ್ರಿಯೆ ವ್ಯಕ್ತವಾಯಿತು. ಬಳ್ಳಾರಿಯ ಲಕ್ಷ್ಮಿ ಕಲಾ ಟ್ರಸ್ಟ್ ತಂಡದ ಕಲಾವಿದರು ಆಕರ್ಷಕ ಸಮೂಹ ನೃತ್ಯ ಪ್ರದರ್ಶಿಸಿ ಗಮನ ಸೆಳೆದರು. ಲಯ, ತಾಳ ಹಾಗೂ ಹೆಜ್ಜೆಗಳ ಸೊಬಗಿನಿಂದ ಕೂಡಿದ್ದ ನೃತ್ಯ ಪ್ರದರ್ಶನಕ್ಕೆ ಪ್ರೇಕ್ಷಕರು ಮೆಚ್ಚುಗೆ ವ್ಯಕ್ತಪಡಿಸಿದರು.

ಇನ್ನು ಬಳ್ಳಾರಿ ತಾಲೂಕಿನ ಎಂ. ಗೋನಾಳ ವೀರಭದ್ರೇಶ್ವರ ಬಯಲಾಟ ಕಲಾವಿದರ ಸಂಘದ ಕಲಾವಿದರು ವೀರ ಅಭಿಮನ್ಯು ಕಾಳಗದ ಆಯ್ದ ಸನ್ನಿವೇಶ ರಂಗದ ಮೇಲೆ ಜೀವಂತಗೊಳಿಸಿದರು. ಪೌರಾಣಿಕ ಪ್ರಸಂಗದ ವೀರಾವೇಶ, ಪಾತ್ರಧಾರಿಗಳ ಅಭಿನಯ, ಸಂಭಾಷಣೆ ಹಾಗೂ ಸಾಂಪ್ರದಾಯಿಕ ಬಯಲಾಟದ ವೈಶಿಷ್ಟ್ಯ ಪ್ರೇಕ್ಷಕರನ್ನು ಸೆಳೆಯಿತು.

ಗ್ರಾಮೀಣ ಕಲಾ ಪ್ರಕಾರವಾದ ಬಯಲಾಟದ ಸೊಗಡನ್ನು ನಗರ ವಾಸಿಗಳಿಗೆ ಪರಿಚಯಿಸುವಲ್ಲಿ ಈ ಪ್ರದರ್ಶನ ಯಶಸ್ವಿಯಾಯಿತು. ಬಯಲು ರಂಗಮಂದಿರದಲ್ಲಿ ಬಯಲಾಟದ ವೀರಾವೇಶ, ನೃತ್ಯದ ಲಯಬದ್ಧ ಹೆಜ್ಜೆ, ಹಾಸ್ಯದ ನಗೆಚಟಾಕಿಗಳು ಹೀಗೆ ಒಂದೆಡೆ ಕಲಾ ವೈವಿಧ್ಯ, ಮತ್ತೊಂದೆಡೆ ಪ್ರೇಕ್ಷಕರ ಚಪ್ಪಾಳೆ, ನಗೆಯ ಅಲೆ. ನಗರದ ಮತ್ತೆ ಆರಂಭವಾಗಿದ್ದು, ವಿವಿಧ ಕಲಾಪ್ರಕಾರಗಳ ಪ್ರದರ್ಶನ ಕಲಾಸಕ್ತರಿಗೆ ಮನರಂಜನೆಯ ರಸದೌತಣ ಉಣಬಡಿಸಿತು.

ಚಾಲನೆ ನೀಡಿದ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಸಹಾಯಕ ನಿರ್ದೇಶಕ ಬಿ.ನಾಗರಾಜ ಮಾತನಾಡಿ, ಕಳೆದ ಒಂದು ವರ್ಷದಿಂದ ಪ್ರೇಕ್ಷಕರ ಕೊರತೆಯ ಹಿನ್ನೆಲೆ ಸ್ಥಗಿತಗೊಂಡಿದ್ದ ತಿಂಗಳ ಸೊಬಗು ಕಾರ್ಯಕ್ರಮ ಇದೀಗ ಪುನರಾರಂಭಿಸಲಾಗಿದೆ. ಜಿಲ್ಲಾಧಿಕಾರಿ ಹಾಗೂ ಅಪರ ಜಿಲ್ಲಾಧಿಕಾರಿಗಳ ವಿಶೇಷ ಪ್ರಯತ್ನದ ಫಲವಾಗಿ ಮತ್ತೆ ಈ ಸಾಂಸ್ಕೃತಿಕ ವೇದಿಕೆ ಸಜ್ಜುಗೊಂಡಿದೆ. ಸ್ಥಳೀಯವಾಗಿ ಸಾಕಷ್ಟು ಪ್ರತಿಭಾವಂತ ಕಲಾವಿದರಿದ್ದು, ಅವರಿಗೆ ತಮ್ಮ ಕಲೆ ಪ್ರದರ್ಶಿಸಲು ಸೂಕ್ತ ವೇದಿಕೆ ಕಲ್ಪಿಸುವುದು ಕಾರ್ಯಕ್ರಮದ ಪ್ರಮುಖ ಉದ್ದೇಶವಾಗಿದೆ. ಈಗಾಗಲೇ ಗುರುತಿಸಿಕೊಂಡಿರುವ ನುರಿತ ಕಲಾವಿದರ ಜತೆಗೆ ಹೊಸ ಪ್ರತಿಭೆಗಳಿಗೂ ಅವಕಾಶ ನೀಡಲಾಗುವುದು. ಇದರಿಂದ ಕಲಾವಿದರಿಗೆ ಪ್ರೋತ್ಸಾಹ ದೊರೆಯುವುದರ ಜತೆಗೆ ಸಾರ್ವಜನಿಕರಿಗೂ ವಿವಿಧ ಕಲಾಪ್ರಕಾರ ಆಸ್ವಾದಿಸುವ ಅವಕಾಶ ಸಿಗಲಿದೆ ಎಂದರು.

ಪ್ರತಿ ತಿಂಗಳು ಆಯೋಜನೆಯಾಗುತ್ತಿದ್ದ ಈ ಕಾರ್ಯಕ್ರಮ ಅನಿವಾರ್ಯ ಕಾರಣಗಳಿಂದ ಒಂದು ವರ್ಷ ಸ್ಥಗಿತಗೊಂಡಿತ್ತು. ಇದೀಗ ಕಲೆ, ಸಾಹಿತ್ಯ, ಸಂಗೀತ ಮತ್ತು ಸಂಸ್ಕೃತಿಯ ಉಳಿವು ಹಾಗೂ ಬೆಳವಣಿಗೆಯ ಆಶಯದೊಂದಿಗೆ ಮತ್ತೆ ಚಾಲನೆ ನೀಡಲಾಗಿದೆ. ಮುಂದಿನ ದಿನಗಳಲ್ಲಿಯೂ ನಿರಂತರವಾಗಿ ಕಾರ್ಯಕ್ರಮ ಆಯೋಜಿಸಲು ಉದ್ದೇಶಿಸಲಾಗಿದೆ. ಕಲಾಭಿಮಾನಿ, ಸಾರ್ವಜನಿಕರು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸಿ ಸ್ಥಳೀಯ ಕಲಾವಿದರನ್ನು ಪ್ರೋತ್ಸಾಹಿಸಬೇಕು ಎಂದು ನಾಗರಾಜ ಮನವಿ ಮಾಡಿದರು.

ಸ್ಥಗಿತಗೊಂಡಿದ್ದ ತಿಂಗಳ ಸೊಬಗು ಮತ್ತೆ ಆರಂಭವಾಗಿರುವುದು ಸ್ಥಳೀಯ ಕಲಾವಿದರಲ್ಲಿ ಹೊಸ ಉತ್ಸಾಹ ಮೂಡಿಸಿದೆ.

PREV
Get the latest news from across Karnataka (ಕರ್ನಾಟಕ ನ್ಯೂಸ್)— breaking headlines, politics, local developments, crime reports, district updates, civic issues and more. Stay informed with Kannada Prabha’s real‑time Karnataka news coverage.

Recommended Stories

ಬರದಲ್ಲಿ ಆಸರೆಯಾದ ಕಳಸಕೊಪ್ಪ ಕೆರೆ
ಬೆಳಗಾವಿಯಲ್ಲಿ ಮಟಕಾ ದಂಧೆ ಮೇಲೆ ಪೊಲೀಸರ ಸರಣಿ ದಾಳಿ