ನಂದಿನಿ ಡೇರಿಯ ಸಿಇಒಗಳ ಆಟೋಟ ಸ್ಪರ್ಧೆಯ ಸಂಭ್ರಮ
ಸಾರಾಂಶ
ಸೊಸೈಟಿ ಬೆಳವಣಿಗೆಯನ್ನು ವೈಯುಕ್ತಿಕ ಬದುಕಿನಷ್ಟೇ ಪ್ರೀತಿಸುತ್ತಿರುವವರು ಡೇರಿ ಕಾರ್ಯದರ್ಶಿಗಳಾಗಿದ್ದಿರಿ.
ಕನ್ನಡಪ್ರಭ ವಾರ್ತೆ ಮೈಸೂರು
ಒಬ್ಬರಿಗೊಬ್ಬರೂ ಸ್ಪರ್ಧೆಗಿಳಿದು ಹಗ್ಗ ಹಿಡಿದೆಳೆದು ತಮ್ಮ ತಂಡ ಗೆದ್ದು ಕೂಗಿ ಸಂಭ್ರಮಿಸುತ್ತಿದ್ದು ಒಂದೆಡೆಯಾದರೆ ಮತ್ತೊಂದೆಡೆ ಅದೇ ಹಗ್ಗ ಹಿಡಿದು ಕೆಳಗೆ ಬಿದ್ದು ನಕ್ಕು ನಲಿದಿದ್ದು ಮತ್ತೊಂದು ತಂಡದಲ್ಲಿ ಸಂಭ್ರಮದ ನಗೆ ಬೀರಿತು.ಮೈಸೂರು ಜಿಲ್ಲಾ ಸಹಕಾರಿ ಹಾಲು ಉತ್ಪಾದಕರ ಸಂಘಗಳ ಒಕ್ಕೂಟ ನಿಯಮಿತದ (ಮೈಮುಲ್) ಹಾಲು ಉತ್ಪಾದಕರ ಸಹಕಾರ ಸಂಘಗಳ ಮುಖ್ಯ ಕಾರ್ಯನಿರ್ವಾಹಕರಿಗೆ ಸಿದ್ಧಾರ್ಥನಗರದ ಶಿಕ್ಷಕರ ಭವನದಲ್ಲಿ ಮಂಗಳವಾರ ಆಯೋಜಿಸಿದ್ದ ಆಟೋಟ ಹಾಗೂ ಸಾಂಸ್ಕೃತಿಕ ಸ್ಪರ್ಧೆಗಳ ಚಿತ್ರಣವಿದು. ತಾಲೂಕು ಮಟ್ಟದಲ್ಲಿ ವಿಜೇತರಾದ ತಂಡಗಳು ಜಿಲ್ಲಾ ಮಟ್ಟದಲ್ಲಿ ಭಾಗವಹಿಸಿದ್ದವು.
ವಿಜೇತರಿಗೆ ಬಹುಮಾನ ವಿತರಿಸಿದ ಮೈಮುಲ್ ಅಧ್ಯಕ್ಷ ಚೆಲುವರಾಜು ಮಾತನಾಡಿ, ಸೊಸೈಟಿ ಬೆಳವಣಿಗೆಯನ್ನು ವೈಯುಕ್ತಿಕ ಬದುಕಿನಷ್ಟೇ ಪ್ರೀತಿಸುತ್ತಿರುವವರು ಡೇರಿ ಕಾರ್ಯದರ್ಶಿಗಳಾಗಿದ್ದಿರಿ. ಇದೊಂದು ಮಾದರಿ ಕಾರ್ಯಕ್ರಮ ಆಗಿದ್ದು, ಮುಂದಿನ ದಿನಗಳಲ್ಲಿ ನಾಲ್ಕು ದಿನಗಳ ಕಾಲ 10 ಹೆಚ್ಚು ಕಾರ್ಯಕ್ರಮಗಳನ್ನು ಆಯೋಜಿಸುವ ಗುರಿ ಹೊಂದಿದ್ದೇವೆ ಎಂದರು.ನೀವೂ ಒಕ್ಕೂಟದ ಭಾಗವಾಗಿದ್ದಿರಿ. ಒಕ್ಕೂಟದಲ್ಲಿ 10 ಲಕ್ಷಕ್ಕೂ ಹೆಚ್ಚು ಲೀಟರ್ ಸಂಗ್ರಹಣೆಯಲ್ಲಿ ನಿಮ್ಮೆಲ್ಲರ ಪರಿಶ್ರಮವಿದೆ. ನಿಮ್ಮ ಸಂಘಗಳು ಬೆಳೆಯಬೇಕು. ರೈತರ ಕೆಲಸ ಎಲ್ಲರಿಗೂ ಸಿಗುವುದಿಲ್ಲ. ನಿಮಗೆ ಸಿಕ್ಕಿದೆ. ರೈತರ ಸಂಸ್ಥೆಯಾಗಿರುವ ಕಾರಣಕ್ಕೆ ಮನೆಗೂ ಹಾಲು ಇರಿಸಿಕೊಳ್ಳದೇ ಹಾಲು ಹಾಕುವವರು ಇದ್ದಾರೆ ಎಂದು ಅವರು ಹೇಳಿದರು.
ಇಂದು ಪ್ರತಿ ಬೆಲೆಯೂ ಏರಿಕೆ ಆಗುತ್ತಿದೆ. ಪಶು ಆಹಾರ, ಔಷಧಿ ಹಾಗೂ ರೈತರ ದಿನ ಬಳಕೆಯ ಪ್ರತಿಯೊಂದರ ಬೆಲೆಯೂ ಜಾಸ್ತಿ ಆಗುತ್ತಿದೆ. ಈ ಹೈನುಗಾರಿಕೆ ಎಲ್ಲರೂ ಉಪಕಸುಬಿನಂತೆ ಬೆಳೆಸಿಕೊಂಡು ಹೋಗುತ್ತಿದ್ದಾರೆ. ಇದೊಂದು ಉದ್ಯೋಗವಾಗಿ ಬೆಳೆಯಬೇಕಾದರೆ ಹಾಲಿನ ದರ ಸಹ ಹೆಚ್ಚಳ ಆಗಬೇಕಿದೆ ಎಂದರು.ಇಡೀ ಕರ್ನಾಟಕ ದಕ್ಷಿಣ ಕನ್ನಡ ಬಿಟ್ಟರೆ ಅತಿಹೆಚ್ಚು ಹಾಲಿನ ದರವನ್ನು ಕೊಡುವುದಿದ್ದರೆ ಅದು ಮೈಮುಲ್ ಹಾಲು ಒಕ್ಕೂಟ ಆಗಿದೆ. ಇದರ ರೈತರ ಸಮಸ್ಯೆ ಮುಂದಿನ ದಿನಗಳಲ್ಲಿ ನಿಮ್ಮೆಲ್ಲರ ಸಹಕಾರದಿಂದ ಅತಿಹೆಚ್ಚು ಹಾಲಿನ ದರ ಕೊಡುವ ಕೆಲಸ ಮಾಡೋಣ ಎಂದು ಅವರು ತಿಳಿಸಿದರು.
ಮೈಮುಲ್ ನಿರ್ದೇಶಕ ಎ.ಟಿ. ಸೋಮಶೇಖರ್ ಮಾತನಾಡಿ, ಒಕ್ಕೂಟದ ಇತಿಹಾಸದಲ್ಲೇ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಗಳಿಗೆ ಇದೊಂದು ಐತಿಹಾಸಿಕ ಕಾರ್ಯಕ್ರಮವಾಗಿದೆ. ಅತ್ಯಂತ ಒತ್ತಡದಲ್ಲಿ ಕೆಲಸ ಮಾಡುವವರು ಸಿಬ್ಬಂದಿ. ನಿಮಗೆ ನೆಮ್ಮದಿ, ಒಕ್ಕೂಟದಲ್ಲಿಯೂ ಪಾಲ್ಗೊಳ್ಳುವಿಕೆ ಹೆಚ್ಚಿಸಲು ಕಾರ್ಯಕ್ರಮ ಆಯೋಜಿಸಿದ್ದೇವೆ. ಮುಂದೆ ಎಲ್ಲಾ ರೀತಿಯ ಆಟೋಟಗಳನ್ನು ಆಡಿಸಲು ಕ್ರಮ ವಹಿಸಲಾಗುವುದು. ಆರೋಗ್ಯ ವೃದ್ಧಿಗೆ ನಶಿಸುತ್ತಿರುವ ಗ್ರಾಮೀಣ ಆಟಗಳನ್ನು ಮರು ಚಾಲನೆ ನೀಡಬೇಕಿದೆ. ಗುಣಮಟ್ಟದ ಹಾಲಿನ ಸರಬರಾಜಿಗೆ ಕ್ರಮ ವಹಿಸಿ ಎಂದರು.ನಿರ್ದೇಶಕ ಬಿ.ಎನ್. ಸದಾನಂದ ಮಾತನಾಡಿ, ಹೊಸ ಆವಿಷ್ಕಾರಕ್ಕೆ ಮಾರು ಹೋಗಿ ಹೊಸ ಕಾಯಿಲೆಗೆ ಹೋಗುತ್ತಿದ್ದೇವೆ. ಗ್ರಾಮೀಣ ಕ್ರೀಡೆಗಳನ್ನು ಮರೆತಿದ್ದೇವೆ ಎಂದು ಹೇಳಿದರು.
ಮೈಮುಲ್ ಆಡಳಿತ ಮಂಡಳಿಯ ನಿರ್ದೆಶಕರಾದ ಕೆ.ಜಿ. ಮಹೇಶ್, ಕೆ. ಉಮಾಶಂಕರ್, ಸಿ. ಓಂಪ್ರಕಾಶ್, ಪಿ.ಎಂ. ಪ್ರಸನ್ನ, ಕೆ. ಈರೇಗೌಡ, ಕೆ.ಎಸ್. ಕುಮಾರ್, ದ್ರಾಕ್ಷಯಿಣಿ ಬಸವರಾಜಪ್ಪ, ಲೀಲಾಂಬಿಕೆ ನಾಗರಾಜು, ನೀಲಾಂಬಿಕೆ ಮಹೇಶ್ ಕುರಹಟ್ಟಿ, ಶಿವಗಾಮಿ ಷಣ್ಮುಗಂ, ಬಿ. ಗುರುಸ್ವಾಮಿ, ಬಿ.ಎ. ಪ್ರಕಾಶ್, ಎ.ಬಿ. ಮಲ್ಲಿಕಾ ರವಿಕುಮಾರ್, ವ್ಯವಸ್ಥಾಪಕ ನಿರ್ದೇಶಕ ಕೆ.ಎನ್. ಸುರೇಶ್ ನಾಯ್ಕ್, ಮಾರ್ಕೇಟಿಂಗ್ ಮ್ಯಾನೇಜರ್ ಎಚ್.ಕೆ. ಜಯಶಂಕರ್, ಪಿ ಅಂಡ್ ಐ ವ್ಯವಸ್ಥಾಪಕ ಕರಿಬಸವರಾಜು ಮೊದಲಾದವರು ಇದ್ದರು.----
ಬಾಕ್ಸ್...ಬಹುಮಾನ ವಿತರಣೆ
ಜಿಲ್ಲೆಯ 1200 ಮಂದಿ ಕಾರ್ಯನಿರ್ವಾಹಕ ಅಧಿಕಾರಿಗಳ ಪೈಕಿ ತಾಲೂಕು ಮಟ್ಟದಲ್ಲಿ ವಿಜೇಯರಾದ 195 ಮಂದಿಗೆ ಪದಕಗಳ ನೀಡಿ ಸನ್ಮಾನಿಸಲಾಯಿತು. ಜಿಲ್ಲಾ ಮಟ್ಟದ ಹಗ್ಗಾ ಜಗ್ಗಾಟದಲ್ಲಿ ಪಿರಿಯಾಪಟ್ಟಣ ಮೊದಲ ಹಾಗೂ ಹುಣಸೂರು ದ್ವಿತೀಯ ಸ್ಥಾನ ಪಡೆದು ಪ್ರಶಸ್ತಿ ಪಡೆದುಕೊಂಡಿತು.ರಂಗೋಲಿ ಸ್ಪರ್ಧೆಯಲ್ಲಿ ಮೈಸೂರು ತಾಲೂಕು ಮೈದಾನಹಳ್ಳಿ ಸುಮಲತಾ(ಪ್ರಥಮ), ಎಚ್.ಡಿ. ಕೋಟೆ ಮುದ್ದಯ್ಯನಹುಂಡಿ ರೇಣುಕಾ (ದ್ವಿತೀಯ) ಮತ್ತು ಹುಣಸೂರು ತಾಲೂಕಿನ ಹಂಚ್ಯಾದ ಕವಿತಾ (ತೃತೀಯ) ಬಹುಮಾನ ಪಡೆದರು.
----ಕೋಟ್...
ಮೈಮುಲ್ ರೈತರ ಸಂಸ್ಥೆಯಾಗಿದ್ದು ಇದನ್ನು ಬೆಳೆಸಲು ಎಲ್ಲರ ಪ್ರಯತ್ನ ಮುಖ್ಯವಾಗಿದೆ. ಈ ದಿಸೆಯಲ್ಲಿ ಗ್ರಾಮಾಂತರ ಭಾಗದಲ್ಲಿ ನೀವು ಹಾಲು ಶೇಖರಣೆ ಮಾಡಿದರಷ್ಟೇ ಸಾಲದು. ಹಾಲಿನ ಗುಣಮಟ್ಟ ಉಳಿಸಿಕೊಳ್ಳಿ. ಪ್ರಮುಖವಾಗಿ ಗ್ರಾಮಾಂತರ ಭಾಗದ ಜನರಿಗೆ ಅತಿ ಹೆಚ್ಚು ನಂದಿನಿ ಉತ್ಪನ್ನಗಳನ್ನೇ ಬಳಸುವಂತೆ ಅರಿವು ಮೂಡಿಸಿ, ಆಗ ಮಾತ್ರವೇ ನಾವು ನೀವು ಹಾಗೂ ರೈತರೆಲ್ಲರೂ ಉಳಿಯಲು ಸಾಧ್ಯ.- ಬಿ.ಎನ್. ಸದಾನಂದ, ಮೈಮುಲ್ ನಿರ್ದೇಶಕ