ಸದನ ಮುಗಿವವರೆಗೆ ಕೈ ಕದನ ವಿರಾಮ! ಮಹತ್ವದ ‘ಬ್ರೇಕ್‌ಫಾಸ್ಟ್‌’ ಮೀಟಿಂಗ್‌

 ಬೆಂಗಳೂರು :  ‘ಬ್ರೇಕಿಂಗ್‌ ಪಾಯಿಂಟ್’ ಘಟ್ಟ ಮುಟ್ಟಿದಂತಿದ್ದ ಸಿಎಂ-ಡಿಸಿಎಂ ನಡುವಿನ ಕುರ್ಚಿ ಗುದ್ದಾಟಕ್ಕೆ ‘ಬ್ರೇಕ್ ಫಾಸ್ಟ್ ಮೀಟಿಂಗ್‌’ ಮೂಲಕ ತಾತ್ಕಾಲಿಕ ಶಾಂತಿ ಮೂಡಿಸುವಲ್ಲಿ ಕಾಂಗ್ರೆಸ್‌ ಹೈಕಮಾಂಡ್‌ ಯಶಸ್ವಿಯಾಗಿದೆ. ವಿಧಾನ ಮಂಡಲ ಹಾಗೂ ಸಂಸತ್‌ ಅಧಿವೇಶನ ಮುಗಿಯುವವರೆಗೂ ತಾತ್ಕಾಲಿಕ ಕದನ ವಿರಾಮ ಘೋಷಣೆಯಾಗಿದೆ.

ಅಷ್ಟೇ ಅಲ್ಲ, ವಿಧಾನಮಂಡಲ ಅಧಿವೇಶನದಲ್ಲಿ ಅವಿಶ್ವಾಸ ನಿರ್ಣಯ ತಂದು ಆಡಳಿತ ಪಕ್ಷವನ್ನು ಇಕ್ಕಟ್ಟಿಗೆ ಸಿಲುಕಿಸುವ ಬಿಜೆಪಿ ತಂತ್ರಗಾರಿಕೆ ವಿರುದ್ಧ ಪ್ರಬಲ ಪ್ರತಿರೋಧ ತೋರುವ ಒಗ್ಗಟ್ಟು ಸಹ ಮುಖ್ಯಮಂತ್ರಿ ಸಿದ್ದರಾಮಯ್ಯ ಹಾಗೂ ಉಪ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್‌ ಮತ್ತು ಅವರ ಬಣಗಳ ನಡುವೆ ನೆಲೆಗೊಂಡಿದೆ.

ಆದರೆ, ನಾಯಕತ್ವಕ್ಕೆ ಸಂಬಂಧಿಸಿದ ತಮ್ಮ ನಿಲುವಿನಲ್ಲಿ ಉಭಯ ನಾಯಕರು ಯಾವುದೇ ಬದಲಾವಣೆ ಮಾಡಿಕೊಂಡಿಲ್ಲ. ಈ ಬಗ್ಗೆ ಹೈಕಮಾಂಡ್‌ ಅದಾವುದೇ ನಿರ್ಧಾರ ಕೈಗೊಂಡರೂ ಅದಕ್ಕೆ ಬದ್ಧರಾಗುವ ತೀರ್ಮಾನವನ್ನು ಜಂಟಿಯಾಗಿ ಘೋಷಿಸಿದ್ದಾರೆ. ಹೀಗಾಗಿ ಪಿಕ್ಚರ್ ಅಭಿ ಬಾಕಿ ಹೈ!

ರಾಗಾ-ಖರ್ಗೆ ಚರ್ಚೆ:

ಬ್ರೇಕ್ ಫಾಸ್ಟ್ ಮೀಟಿಂಗ್ ಮುಗಿಯುತ್ತಿದ್ದಂತೆಯೇ ಅತ್ತ ದೆಹಲಿಯಲ್ಲಿ ಈ ಪಿಕ್ಚರ್‌ನ ಮುಂದಿನ ಭಾಗದಲ್ಲಿ ತಮ್ಮ ಪಾತ್ರವನ್ನು ನಿರ್ಧರಿಸಲು ಹೈಕಮಾಂಡ್ ನ ವರಿಷ್ಠರಾದ ಮಲ್ಲಿಕಾರ್ಜುನ ಖರ್ಗೆ ಹಾಗೂ ರಾಹುಲ್ ಗಾಂಧಿ ಅವರು ಸುಮಾರು 40 ನಿಮಿಷಕ್ಕೂ ಹೆಚ್ಚಿನ ಅವಧಿ ಚರ್ಚಿಸಿದ್ದಾರೆ. ಈ ಚರ್ಚೆ ವೇಳೆ ಅಧಿಕಾರ ಹಸ್ತಾಂತರ ಮಾತ್ರವಲ್ಲದೆ, ಸಚಿವ ಸಂಪುಟ ವಿಸ್ತರಣೆ, ಪಿಸಿಸಿ ಅಧ್ಯಕ್ಷರ ಬದಲಾವಣೆ ಸೇರಿದಂತೆ ರಾಜ್ಯಕ್ಕೆ ಸಂಬಂಧಿಸಿದ ಪ್ರತಿಯೊಂದು ವಿಚಾರ ಚರ್ಚೆಯಾಗಿದೆ.

ಆದರೆ, ಸದ್ಯಕ್ಕೆ ಯಾವುದೇ ತೀರ್ಮಾನಕ್ಕೆ ಬರಲಾಗಿಲ್ಲ. ಸೋನಿಯಾ ಗಾಂಧಿ ಅವರೊಂದಿಗೆ ಚರ್ಚಿಸಿ ರಾಜ್ಯ ನಾಯಕರನ್ನು ದೆಹಲಿಗೆ ಕರೆಸುವ ನಿರ್ಧಾರ ಮಾಡಲಾಗಿದೆ ಎಂದು ತಿಳಿದುಬಂದಿದೆ.

ಆದರೆ, ಈ ಕರೆ ವಿಧಾನಮಂಡಲ ಅಧಿವೇಶನದೊಳಗೆ ಬರುವುದೋ ಅಥವಾ ಅನಂತರ ಬರುವುದೋ ಎಂಬುದು ಸ್ಪಷ್ಟವಾಗಿಲ್ಲ.

ಇವು- ಕರುನಾಡಿನ ರಾಜಕಾರಣ ವಲಯವನ್ನು ತುದಿಗಾಲಿನಲ್ಲಿ ನಿಲ್ಲಿಸಿದ್ದ ಮುಖ್ಯಮಂತ್ರಿ ಸಿದ್ದರಾಮಯ್ಯ ಹಾಗೂ ಉಪ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್‌ ನಡುವಿನ ಬ್ರೇಕ್ ಫಾಸ್ಟ್ ಮೀಟಿಂಗ್‌ ಹಾಗೂ ಅನಂತರದ ಒಟ್ಟಾರೆ ಬೆಳವಣಿಗೆಗಳು.

ವರ್ಡ್ ವಾರ್‌ನಲ್ಲಿದ್ದವರಿಂದ ಶಾಂತಿಮಂತ್ರ!:

ಆಡಿದ ಮಾತಿಗೆ ಬದ್ಧರಾಗಿರುವ ವಿಚಾರಕ್ಕೆ ಸಂಬಂಧಿಸಿದಂತೆ ಟ್ವೀಟರ್ ಅಂಗಳದಲ್ಲಿ ವರ್ಡ್ ವಾರ್ ಆರಂಭಿಸಿದ್ದ ಮುಖ್ಯಮಂತ್ರಿ ಹಾಗೂ ಉಪ ಮುಖ್ಯಮಂತ್ರಿ ನಡುವಿನ ಶೀತಲ ಸಮರ ವಿಧಾನಮಂಡಲ ಅಧಿವೇಶನದಲ್ಲಿ ಹಾಹಾಕಾರ ನಿರ್ಮಾಣ ಮಾಡುವ ಆಶಂಕೆ ಕಾಂಗ್ರೆಸ್ ಹೈಕಮಾಂಡ್‌ಗಿತ್ತು. ಹೀಗಾಗಿಯೇ ಬ್ರೇಕ್ ಫಾಸ್ಟ್ ಮೀಟಿಂಗ್‌ ಮೂಲಕ ಸಾಮರಸ್ಯದ ಸಂದೇಶ ಸಾರುವಂತೆ ಹೈಕಮಾಂಡ್‌ ತಾಕೀತು ಮಾಡಿತ್ತು.

ಅದರಂತೆ ನಡೆದ ಈ ಉಪಾಹಾರ ಸಭೆ ಸಾಕಷ್ಟು ಸೌಹಾರ್ದಯುತವಾಗಿಯೇ ಇತ್ತು. ಶನಿವಾರ ಬೆಳಗ್ಗೆ ಸರಿಯಾಗಿ 9.58ಕ್ಕೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರ ಅಧಿಕೃತ ನಿವಾಸ ಕಾವೇರಿಗೆ ಆಗಮಿಸಿದ ಉಪ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರನ್ನು ಸಿಎಂ ಅವರು ಮುಂಬಾಗಿಲಿನವರೆಗೂ ಆಗಮಿಸಿ ಸ್ವಾಗತಿಸಿದರು. ಈ ವೇಳೆ ಮುಖ್ಯಮಂತ್ರಿಯವರ ಕಾನೂನು ಸಲಹೆಗಾರ ಎ.ಎಸ್. ಪೊನ್ನಣ್ಣ ಅವರು ಇದ್ದರು.

ಅನಂತರ ಸಿಎಂ-ಡಿಸಿಎಂ ಹಾಗೂ ಪೊನ್ನಣ್ಣ ಅವರು ಸಮಾರು 20 ನಿಮಿಷ ಇಡ್ಲಿ, ಉಪ್ಪಿಟ್ಟು, ಚಹಾ ಸೇವಿಸಿದರು. ಅನಂತರ ಸಿಎಂ-ಡಿಸಿಎಂ ಪ್ರತೇಕವಾಗಿ ಹತ್ತಾರು ನಿಮಿಷ ಚರ್ಚೆ ನಡೆಸಿದರು. ಬೆಳಗ್ಗೆ 11.05ರವರೆಗೆ ಮಾತುಕತೆ ನಡೆಯಿತು.

ಇದಾದ ನಂತರ ಬೆಳಗ್ಗ 11.10ಕ್ಕೆ ಜಂಟಿ ಪತ್ರಿಕಾಗೋಷ್ಠಿ ನಡೆಸಿ ಹೈಕಮಾಂಡ್‌ ನಿರ್ಧಾರಕ್ಕೆ ಬದ್ಧರಾಗಿರುವ ಹಾಗೂ ಅಧಿವೇಶನದಲ್ಲಿ ಒಗ್ಗಟ್ಟಾಗಿ ಪ್ರತಿಪಕ್ಷವನ್ನು ಎದುರಿಸುವ ತಮ್ಮ ತೀರ್ಮಾನ ಪ್ರಕಟಿಸಿದರು. ಬೆಳಗ್ಗೆ 11.31ಕ್ಕೆ ಪತ್ರಿಕಾಗೋಷ್ಠಿ ಮುಕ್ತಾಯವಾಯಿತು.

ಮೂಲಗಳ ಪ್ರಕಾರ, ಉಪಾಹಾರದ ಚರ್ಚೆಯ ವೇಳೆ ಸಿಎಂ ಹಾಗೂ ಡಿಸಿಎಂ ಅವರು ನಾಯಕತ್ವ ಬದಲಾವಣೆ ವಿಚಾರದಲ್ಲಿ ತಮ್ಮ ನಿಲುವಿನ ಬಗ್ಗೆ ವಿಸ್ತೃತ ಚರ್ಚೆಗೆ ಇಳಿಯಲೇ ಇಲ್ಲ. ಬದಲಾಗಿ, ಈ ವಿಚಾರದಿಂದ ನಿರ್ಮಾಣವಾಗಿರುವ ಗೊಂದಲ ಹಾಗೂ ಅದನ್ನು ಲಾಭ ಮಾಡಿಕೊಳ್ಳಲು ಬಿಜೆಪಿ-ಜೆಡಿಎಸ್‌ ನಡೆಸುತ್ತಿರುವ ಪ್ರಯತ್ನಗಳನ್ನು ತಡೆಗಟ್ಟುವುದಕ್ಕೆ ಸಭೆ ಸೀಮಿತವಾಗಿದೆ.

ವಿಧಾನ ಮಂಡಲ ಹಾಗೂ ಸಂಸತ್‌ ಅಧಿವೇಶನ ಶೀಘ್ರದಲ್ಲೇ ನಡೆಯಲಿರುವುದರಿಂದ ತಮ್ಮ ನಡುವಿನ ಈ ಗೊಂದಲ ಪಕ್ಷ ಮತ್ತು ಸರ್ಕಾರವನ್ನು ತೀವ್ರ ಇಕ್ಕಟ್ಟಿಗೆ ಸಿಲುಕಿಸುವ ಸಾಧ್ಯತೆ ಹೆಚ್ಚಿದೆ. ಇದಕ್ಕೆ ಆಸ್ಪದ ನೀಡಬಾರದು ಎಂಬ ಬಗ್ಗೆ ಉಭಯ ನಾಯಕರಲ್ಲಿ ಒಮ್ಮತ ಮೂಡಿದೆ.

ಈ ಒಮ್ಮತ ಮೂಡಿರುವ ಸಂದೇಶವನ್ನು ತಮ್ಮ ಬಣದ ಇತರ ಸದಸ್ಯರಿಗೂ ರವಾನಿಸಿ ಹೈಕಮಾಂಡ್‌ ಈ ವಿಚಾರದ ಬಗ್ಗೆ ತನ್ನ ತೀರ್ಮಾನ ಕೈಗೊಳ್ಳುವವರೆಗೂ ಉಭಯ ಬಣಗಳಲ್ಲಿ ಯಾರೂ ಗೊಂದಲದ ಹೇಳಿಕೆ ಅಥವಾ ನಡವಳಿಕೆ ತೋರಬಾರದು ಎಂದು ನಿರ್ಧರಿಸಲಾಗಿದೆ.

ಅಧಿವೇಶನದಲ್ಲಿ ಬಿಜೆಪಿ-ಜೆಡಿಎಸ್‌ ಜಂಟಿಯಾಗಿ ರೂಪಿಸುವ ತಂತ್ರಗಳಿಗೆ ಪ್ರಬಲ ಪ್ರತಿರೋಧವೊಡ್ಡಲು ಹಾಗೂ ಸುಸೂತ್ರವಾಗಿ ಅಧಿವೇಶನ ನಡೆಯಲು ಸಂಪೂರ್ಣ ಸಹಕಾರ ನೀಡಲು ನಿರ್ಧರಿಸಲಾಗಿದೆ.

ಇನ್ನು ನಾಯಕತ್ವ ವಿಚಾರಕ್ಕೆ ಸಂಬಂಧಿಸಿದಂತೆ ಹೈಕಮಾಂಡ್‌ ಯಾವುದೇ ತೀರ್ಮಾನ ಕೈಗೊಂಡರೂ ಅದಕ್ಕೆ ಬದ್ಧರಾಗಿರಬೇಕು ಎಂಬ ನಿಲುವನ್ನು ಪಾಲಿಸಲು ಉಭಯ ನಾಯಕರು ಒಪ್ಪಿಕೊಂಡರು ಎಂದು ಹೇಳಲಾಗಿದೆ.