ಸುಲ್ತಾನ್‌- ಮಹಮ್ಮದ್‌ ಬಿನ್‌ ತುಘಲಕ್‌ ವ್ಯಕ್ತಿತ್ವ, ಆಡಳಿತ ಕುರಿತ ಐತಿಹಾಸಿಕ ಕಾದಂಬರಿ

ಕನ್ನಡಪ್ರಭ ವಾರ್ತೆ ಮೈಸೂರು

ಮಧ್ಯಕಾಲೀನ ಭಾರತವನ್ನು ಆಳಿದ ದೆಹಲಿಯ ಸುಲ್ತಾನರ ಪೈಕಿ ಅತ್ಯಂತ ವಿವಾದಾಸ್ವದ ವ್ಯಕ್ತಿ ಎಂದರೇ ಮಹಮ್ಮದ್‌ ಬಿನ್‌ ತುಘಲಕ್‌. 14ನೇ ಶತಮಾನದ ಈ ಸುಲ್ತಾನನ್ನು ಈಗಲೂ ‘ತುಘಲಕ್‌ ಆಡಳಿತ’ ಎಂದು ವ್ಯಂಗ್ಯವಾಗಿ ನೆನಪಿಸಿಕೊಳ್ಳಲಾಗುತ್ತದೆ.

ಇತಿಹಾಸದ ವಿದ್ಯಾರ್ಥಿಯಾದ ರಾಘವೇಂದ್ರ ಪ್ರಸನ್ನ ಅವರು ಇಂತಹ ವಿಚಿತ್ರ ವ್ಯಕ್ತಿಯ ತುಘಲಕ್‌ನ ವ್ಯಕ್ತಿತ್ವ, ಆಡಳಿತ ಶೈಲಿ, ಯುದ್ಧ, ಅವನೊಳಗಿನ ಆಂತರಿಕ ಯುದ್ಧ, ಮಾನಸಿಕ ತೊಳಲಾಟ, ಸೋಲು-ಗೆಲವು ಸೇರಿದಂತೆ ಒಟ್ಟಾರೆ ಜೀವನ ಚರಿತ್ರೆಯನ್ನು 10 ಅಧ್ಯಾಯಗಳಲ್ಲಿ ಕಟ್ಟಿಕೊಡುವ ಪ್ರಯತ್ನ ಮಾಡಿದ್ದಾರೆ.

ಮೂಲತಃ ಚಿಕ್ಕಮಗಳೂರು ಜಿಲ್ಲೆ ಕಡೂರು ತಾಲೂಕು ಸಿಂಗಟಗೆರೆಯವರಾದ ರಾಘವೇಂದ್ರ ಪ್ರಸನ್ನ ಮೈಸೂರಿನ ಮಹಾರಾಜ ಕಾಲೇಜಿನಲ್ಲಿ ಮೂರನೇ ರ್ಯಾಂಕ್‌ನೊಂದಿಗೆ ಪದವಿ, ಮಾನಸ ಗಂಗೋತ್ರಿ ಸಮಾಜಕಾರ್ಯ ವಿಭಾಗದಲ್ಲಿ ಸ್ನಾತಕೋತ್ತರ ಪದವಿ ಪಡೆದವರು. ನಂತರ ‘ಗಾರ್ಡ್‌’ ಸ್ವಯಂಸೇವಾ ಸಂಸ್ಥೆಯಲ್ಲಿ ಹಲವು ಪರ್ಷಗಳ ಕಾಲ ಕೆಲಸ ಮಾಡಿದರು. ಇದೀಗ ಮೈಸೂರು ಜಿಲ್ಲೆಯ ಎಚ್.ಡಿ,. ಕೋಟೆ ತಾಲೂಕಿನಲ್ಲಿ ಪಂಚಾಯ್ತಿ ಅಭಿವೃದ್ಧಿ ಅಧಿಕಾರಿಯಾಗಿದ್ದಾರೆ.

ಸುದೀರ್ಘ 26 ವರ್ಷಗಳ ಕಾಲ ಆಳ್ವಿಕೆ ನಡೆಸಿದ ತುಘಲಕ್‌ ಒಬ್ಬ ಐಲು ದೊರೆ, ಹುಚ್ಚ, ವಿಲಕ್ಷಣ ವ್ಯಕ್ತಿತ್ವವುಳ್ಳವನು ಎಂದು ಕೆಲವು ಇತಿಹಾಸಕಾರರು ಗುರುತಿಸಿದ್ದರೆ ಮತ್ತೆ ಕೆಲವರು ಆತ ಮೇಧಾವಿ, ದೂರದೃಷ್ಟಿವುಳ್ಳ ಆಡಳಿತಗಾರ, ಪರ್ಷಿಯನ್‌, ಅರೇಬಿಕ್‌ ಭಾಷೆಗಳ ಪಂಡಿತ, ತರ್ಕಶಾಸ್ತ್ರ, ಖಗೋಳ, ಗಣಿತ ಮೊದಲಾದ ವಿಷಯಗಳಲ್ಲೂ ಪರಿಣತ. ಮದ್ಯಪಾನ, ಜೂಜು, ಸ್ತ್ರೀವ್ಯಾಮೋಹಗಳಿಂದ ಮುಕ್ತನಾಗಿ ಶ್ರದ್ಧಾವಂತ ಮುಸಲ್ಮಾನ ಎನಿಸಿಕೊಂಡಿದ್ದ. ದೂರದೃಷ್ಟಿಯಿಂದ ಆತ ರೂಪಿಸಿದ್ದ ಹತ್ತು ಹಲವು ಯೋಜನೆಗಳು ವೈಜ್ಞಾನಿಕವಾಗಿದ್ದವು ಹಾಗೂ ಆ ಕಾಲಘಟ್ಟಕಿಂತ ಮುಂದಿದ್ದವು. ಯೋಜನೆಗಳ ಜಾರಿಯಲ್ಲಿ ಆತ ತೆಗೆದುಕೊಂಡ ನಿರ್ಣಯಗಳು ಪ್ರಜೆಗಳಿಗೆ ಹಿಡಿಸಲಿಲ್ಲ.

ಕ್ಷಾಮದ ಸಂದರ್ಭದಲ್ಲಿ ಜಾರಿ ಮಾಡಿದ ಪ್ರತ್ಯೇಕ ತೆರಿಗೆ ಪದ್ಧತಿ, ಉತ್ತರದ ದೆಹಲಿಯ ಬದಲು ದಕ್ಷಿಣದ ದೇವಗಿರಿಗೆ ರಾಜಧಾನಿ ಬದಲಾವಣೆ, ನಾಣ್ಯಗಳ ಬದಲಾವಣೆ, ಖುರಾಸನ್‌ ವಶಕ್ಕೆ ಹೊರಟ ವಿಚಾರ, ಕರಾಚಿಲ್‌ ಮೇಲಿನ ದಾಳಿ ಹೀಗೆ ಎಲ್ಲಾ ದುಡುಕಿನ ನಿರ್ಣಯಗಳು ಹಾಗೂ ತರ್ಕಕ್ಕೆ ನಿಲುಕದ ಆಡಳಿತ ನೀತಿಗಳಿಂದ ಆತ ಜನರಿಗೆ ಅಪ್ರಿಯನಾಗಿ ಪ್ರಜಾಪೀಡಕ ಎನಿಸಿಕೊಂಡ. ಇದರಿಂದ ಉಂಟಾದ ಆಡಳಿತ ವಿರೋಧಿ ನಿಗ್ರಹಕ್ಕೆ ಆತನ ಸಮಯವೆಲ್ಲವೂ ವ್ಯರ್ಥವಾಯಿತು. ದೆಹಲಿಯ ಹಿಂದಿನ 17 ಸುಲ್ತಾನರಿಗಿಂತ ಹೆಚ್ಚು ಭೂಪ್ರದೇಶವನ್ನು ಸುದೀರ್ಘ ಅವಧಿಗೆ ಆಳಿದರೂ ಒಂದು ದಿನವೂ ನೆಮ್ಮದಿಯಿಂದ ಇರಲಾಗಲಿಲ್ಲ.

ಇಂತಹ ತುಘಲಕ್‌ ಬಗ್ಗೆ ರಾಘವೇಂದ್ರ ಪ್ರಸನ್ನ ಕುತೂಹಲ ಬೆಳೆಸಿಕೊಂಡು ಐತಿಹಾಸಿಕ ಕಾದಂಬರಿ ರಚಿಸುವ ಪ್ರಯತ್ನ ಮಾಡಿದ್ದಾರೆ. ಇದು ಆ ಕಾಲಘಟ್ಟದ ನಿಖರ ಇತಿಹಾಸದ ಪ್ರತಿಬಿಂಬವಲ್ಲವಾದರೂ ನೈಜಸಂಗತಿಗಳನ್ನು ಆಧರಿಸಿ, ನಡೆದಿದ್ದೇನು? ಎಂಬುದನ್ನು ರಾಘವೇಂದ್ರ ಪ್ರಸನ್ನ ಅವರು ಕಾಲ್ಪನಿಕವಾಗಿ ದಾಖಲಿಸುವ ಕೆಲಸ ಮಾಡಿದ್ದಾರೆ.

ಓದುತ್ತಾ ಹೋದಂತೆ ಇದು ಮಹಮ್ಮದ್‌ ಬಿನ್‌ ತುಘಲಕ್‌ನ ತಪ್ಪೇ ಅಥವಾ ಕಾಲವೇ ಆತನಿಗೆ ವಿರುದ್ಧವಾಗಿ ತಿರುಗಿಬಿದ್ದಿತೆ? ಎಂಬ ಗೊಂದಲ ಕಾಡದಿರದು. ಇತಿಹಾಸದ ಬಗ್ಗೆ ಅದರಲ್ಲೂ ಮಹಮ್ಮದ್‌ ಬಿನ್‌ ತುಘಲಕ್‌ ಬಗ್ಗೆ ಆಸಕ್ತಿ ಇರುವ ಪ್ರಾಧ್ಯಾಪಕರು, ಸಂಶೋಧಕರು, ವಿದ್ಯಾರ್ಥಿಗಳಿಗೆ ಉಪಯುಕ್ತ ಕೃತಿ ಇದು.

ಈ ಕೃತಿಯನ್ನು ಸಂವಹನ ಪ್ರಕಾಶನ ಪ್ರಕಟಿಸಿದೆ. ಮೈವಿವಿ ವಿಶ್ರಾಂತ ಕುಲಸಚಿವ ಪ್ರೊ.ಆರ್‌. ರಾಜಣ್ಣ ಮುನ್ನುಡಿ ಬರೆದಿದ್ದಾರೆ. ಆಸಕ್ತರು ಪ್ರಕಾಶಕ ಡಿ.ಎನ್‌. ಲೋಕಪ್ಪ, ಮೊ.99026 39593 ಅಥವಾ ಲೇಖಕ ರಾಘವೇಂದ್ರ ಪ್ರಸನ್ನ, ಮೊ. 88846 63633 ಸಂಪರ್ಕಿಸಬಹುದು.