ಎಂಟರಲ್ಲಿ ಸೋತು ಗಂಟುಮೂಟೆ ಕಟ್ಟಿದ ಚೆನ್ನೈ!

ಚೆನ್ನೈ: ಈ ಬಾರಿ ಟೂರ್ನಿಯಲ್ಲಿ ಆಡಿರುವ 10 ಪಂದ್ಯಗಳ ಪೈಕಿ 8ರಲ್ಲಿ ಸೋಲನುಭವಿಸಿದ 5 ಬಾರಿ ಚಾಂಪಿಯನ್‌ ಚೆನ್ನೈ ಸೂಪರ್‌ ಕಿಂಗ್ಸ್ ತಂಡ ಪ್ಲೇ-ಆಫ್‌ ರೇಸ್‌ನಿಂದ ಅಧಿಕೃತವಾಗಿ ಹೊರಬಿದ್ದಿದೆ. 

ಬುಧವಾರ ನಿರ್ಣಾಯಕ ಪಂದ್ಯದಲ್ಲಿ ಪಂಜಾಬ್‌ ಕಿಂಗ್ಸ್‌ ವಿರುದ್ಧ 4 ವಿಕೆಟ್‌ ಸೋಲು ಕಂಡ ತಂಡ, ಅಂಕಪಟ್ಟಿಯಲ್ಲಿ ಕೊನೆ ಸ್ಥಾನದಲ್ಲೇ ಬಾಕಿಯಾಯಿತು. ತಂಡ ಇನ್ನುಳಿದ 4 ಪಂದ್ಯದಲ್ಲಿ ಗೆದ್ದರೂ ನಾಕೌಟ್‌ ಪ್ರವೇಶಿಸುವುದಿಲ್ಲ. ಮತ್ತೊಂದೆಡೆ ಪಂಜಾಬ್‌ ಟೂರ್ನಿಯಲ್ಲಿ ಆಡಿದ 10 ಪಂದ್ಯಗಳಲ್ಲಿ 6ನೇ ಗೆಲುವು ಸಾಧಿಸಿದ್ದು, ಪ್ಲೇ-ಆಫ್‌ಗೆ ಮತ್ತಷ್ಟು ಹತ್ತಿರವಾಗಿದೆ.

ಚೆನ್ನೈ ಕೊನೆಗೂ ಬ್ಯಾಟಿಂಗ್‌ನಲ್ಲಿ ಸುಧಾರಿತ ಪ್ರದರ್ಶನ ತೋರಿತು. ಆದರೆ ಕೊನೆ 11 ಎಸೆತಗಳಲ್ಲಿ 6 ವಿಕೆಟ್‌ ಕಳೆದುಕೊಂಡ ತಂಡ 19.2 ಓವರ್‌ಗಳಲ್ಲಿ 190ಕ್ಕೆ ಆಲೌಟಾಯಿತು. ಇದು ಚೆನ್ನೈನಲ್ಲಿ ದೊಡ್ಡ ಮೊತ್ತವೇ ಆಗಿದ್ದರೂ ಪಂಜಾಬ್‌ ಉತ್ತಮ ಬ್ಯಾಟಿಂಗ್‌ ಪ್ರದರ್ಶಿಸಿ 19.4 ಓವರ್‌ಗಳಲ್ಲಿ ಗೆಲುವು ತನ್ನದಾಗಿಸಿಕೊಂಡಿತು.

ಪ್ರಭ್‌ಸಿಮ್ರನ್‌ 36 ಎಸೆತಕ್ಕೆ 54 ರನ್‌ ಗಳಿಸಿದರೆ, ನಾಯಕ ಶ್ರೇಯಸ್‌ ಅಯ್ಯರ್‌ 41 ಎಸೆತಗಳಲ್ಲಿ 72 ರನ್‌ ಬಾರಿಸಿ ತಂಡವನ್ನು ಗೆಲ್ಲಿಸಿದರು. ಪ್ರಿಯಾನ್ಶ್‌ ಆರ್ಯ 23, ಶಶಾಂಕ್‌ ಸಿಂಗ್‌ 23 ರನ್‌ ಕೊಡುಗೆ ನೀಡಿದರು.

ಕರ್ರನ್‌ ಮಿಂಚು: ಚೆನ್ನೈಗೆ ಈ ಪಂದ್ಯದಲ್ಲೂ ಉತ್ತಮ ಆರಂಭ ಸಿಗಲಿಲ್ಲ. ಶೇಖ್‌ ರಶೀದ್‌ 11, ಆಯುಶ್‌ ಮಾಥ್ರೆ 7 ರನ್‌ಗೆ ಔಟಾದರು. ಆದರೆ ಸ್ಯಾಮ್‌ ಕರ್ರನ್‌ ಏಕಾಂಗಿ ಹೋರಾಟ ತಂಡಕ್ಕೆ ನೆರವಾಯಿತು. 18ನೇ ಓವರ್‌ವರೆಗೂ ಕ್ರೀಸ್‌ನಲ್ಲಿದ್ದ ಸ್ಯಾಮ್‌, 47 ಎಸೆತಗಳಲ್ಲಿ 9 ಬೌಂಡರಿ, 4 ಸಿಕ್ಸರ್‌ಗಳೊಂದಿಗೆ 88 ರನ್‌ ಸಿಡಿಸಿ ಔಟಾದರು. ಡೆವಾಲ್ಡ್‌ ಬ್ರೆವಿಸ್‌ 32 ರನ್‌ ಗಳಿಸಿದರು. 18ನೇ ಓವರ್‌ನ 4ನೇ ಎಸೆತದಲ್ಲಿ ಸ್ಯಾಮ್‌ ಔಟಾದ ಬಳಿಕ ಚೆನ್ನೈ ಮುಂದಿನ 10 ಎಸೆತಗಳಲ್ಲಿ 5 ವಿಕೆಟ್‌ ಕಳೆದುಕೊಂಡಿತು. ಸ್ಪಿನ್ನರ್‌ ಚಹಲ್‌ ಹ್ಯಾಟ್ರಿಕ್‌ ವಿಕೆಟ್‌ ಕಿತ್ತರು.

ಸ್ಕೋರ್‌: ಚೆನ್ನೈ 19.2 ಓವರಲ್ಲಿ 190/10 (ಕರ್ರನ್‌ 88, ಬ್ರೆವಿಸ್‌ 32, ಚಹಲ್‌ 4-32, ಅರ್ಶ್‌ದೀಪ್‌ 2-25), ಪಂಜಾಬ್‌ 19.4 ಓವರಲ್ಲಿ 194/6 (ಶ್ರೇಯಸ್‌ 72, ಪ್ರಭ್‌ಸಿಮ್ರನ್‌ 54, ಖಲೀಲ್‌ 2-28)

18 ಆವೃತ್ತಿ ಪೈಕಿ 4

ಬಾರಿ ಪ್ಲೇ-ಆಫ್‌ಗಿಲ್ಲ

ಚೆನ್ನೈ ತಂಡ 18 ಆವೃತ್ತಿಗಳ ಪೈಕಿ ಕೇವಲ 4 ಬಾರಿ ಮಾತ್ರ ಪ್ಲೇ-ಆಫ್‌ ಪ್ರವೇಶಿಸಲು ವಿಫಲವಾಗಿದೆ. ತಂಡ 2020ರಲ್ಲಿ 7ನೇ, 2022ರಲ್ಲಿ 9ನೇ, 2024ರಲ್ಲಿ 5ನೇ ಸ್ಥಾನಿಯಾಗಿತ್ತು. ಉಳಿದಂತೆ ಎಲ್ಲಾ ಬಾರಿ ಪ್ಲೇ-ಆಫ್‌ಗೇರಿರುವ ತಂಡ 5 ಬಾರಿ ಚಾಂಪಿಯನ್‌ ಆಗಿದ್ದರೆ, 5 ಬಾರಿ ರನ್ನರ್‌-ಅಪ್‌ ಆಗಿದೆ.

ಈ ಬಾರಿ ಹೊರಬಿದ್ದ

ಮೊದಲ ತಂಡ ಚೆನ್ನೈ

ಚೆನ್ನೈ ಈ ಬಾರಿ ಟೂರ್ನಿಯಿಂದ ಅಧಿಕೃತವಾಗಿ ಹೊರಬಿದ್ದ ಮೊದಲ ತಂಡ. ಯಾವುದೇ ತಂಡ ಪ್ಲೇ-ಆಫ್‌ಗೇರಲು ಕನಿಷ್ಠ 7 ಗೆಲುವು ಅಗತ್ಯ. ಆದರೆ ಚೆನ್ನೈ ಇನ್ನುಳಿದ 4ರಲ್ಲಿ ಗೆದ್ದರೂ ಒಟ್ಟು 6 ಪಂದ್ಯ ಗೆದ್ದಂತಾಗುತ್ತದೆ. ಹೀಗಾಗಿ ತಂಡ ಹೊರಬಿದ್ದಿದೆ. ಗುರುವಾರ ಸೋತರೆ ರಾಜಸ್ಥಾನ ಕೂಡಾ ಅಧಿಕೃತವಾಗಿ ಹೊರಬೀಳಲಿದೆ.