ಬೆಂಗಳೂರು ಓಪನ್‌ನಲ್ಲಿ ಖಲೀನ್ ಜೋಶಿ ಅಬ್ಬರ

ವೃತ್ತಿಜೀವನದ ಶ್ರೇಷ್ಠ 61 ಸ್ಕೋರ್‌ನೊಂದಿಗೆ ಅಗ್ರಸ್ಥಾನ

ಬೆಂಗಳೂರು: ಕರ್ನಾಟಕ ಗಾಲ್ಫ್ ಅಸೋಸಿಯೇಷನ್ (ಕೆಜಿಎ) ಮೈದಾನದಲ್ಲಿ ನಡೆಯುತ್ತಿರುವ ₹1 ಕೋಟಿ ಮೊತ್ತದ ಇಂಡಿಯನ್ಆಯಿಲ್ ಪ್ರಾಯೋಜಿತ ಬೆಂಗಳೂರು ಓಪನ್ 2026 ಟೂರ್ನಿಯಲ್ಲಿ ಬೆಂಗಳೂರಿನ ಖಲೀನ್ ಜೋಶಿ ಭರ್ಜರಿ ಆರಂಭ ಪಡೆದಿದ್ದಾರೆ. ತಮ್ಮ ತವರಿನ ಮೈದಾನದಲ್ಲಿ ಆಡಿದ 34 ವರ್ಷದ ಜೋಶಿ, ಯಾವುದೇ ಬೋಗಿ ಇಲ್ಲದೆ 11-ಅಂಡರ್ 61 ಸ್ಕೋರ್ ದಾಖಲಿಸಿ ಮೊದಲ ಸುತ್ತಿನ ಬಳಿಕ ನಾಲ್ಕು ಶಾಟ್ಗಳ ಮುನ್ನಡೆ ಸಾಧಿಸಿದ್ದಾರೆ.ಪಾರ್-5 11ನೇ ಹೋಲ್ನಲ್ಲಿ ಈಗಲ್ ಸೇರಿದಂತೆ ಒಟ್ಟು ಒಂಬತ್ತು ಬರ್ಡಿಗಳನ್ನು ದಾಖಲಿಸಿದ ಜೋಶಿ, ತಮ್ಮ ವೃತ್ತಿಜೀವನದ ಅತ್ಯಂತ ಕಡಿಮೆ ಸ್ಕೋರ್ ದಾಖಲಿಸಿದರು. ಕಳೆದ ವಾರ ನವಾ ರಾಯ್ಪುರ ಓಪನ್ ಗೆದ್ದು, ಈ ಋತುವಿನಲ್ಲಿ ತಮ್ಮ ಮೂರನೇ DP ವರ್ಲ್ಡ್ PGTI ಪ್ರಶಸ್ತಿಯನ್ನು ಪಡೆದಿದ್ದ ಜೋಶಿ, ಪ್ರಸ್ತುತ ರೇಸ್ ಟು DP ವರ್ಲ್ಡ್ ಇಂಡಿಯಾ ಚಾಂಪಿಯನ್ಶಿಪ್ ಪಟ್ಟಿಯಲ್ಲಿ ಏಳನೇ ಸ್ಥಾನದಲ್ಲಿದ್ದಾರೆ.ಸ್ಥಳೀಯ 18 ವರ್ಷದ ಆಟಗಾರ ಮನೋಜ್ ಎಸ್. ಕೂಡ ಬೋಗಿರಹಿತ ಸುತ್ತು ಆಡಿದರು. ಏಳು ಬರ್ಡಿಗಳೊಂದಿಗೆ 7-ಅಂಡರ್ 65 ಸ್ಕೋರ್ ಮಾಡಿದ ಅವರು ನಾಲ್ಕು ಶಾಟ್ಗಳ ಅಂತರದಲ್ಲಿ ಎರಡನೇ ಸ್ಥಾನದಲ್ಲಿದ್ದಾರೆ.ದೆಹಲಿಯ 23 ವರ್ಷದ ಶೌರ್ಯ ಭಟ್ಟಾಚಾರ್ಯ ಎಂಟು ಬರ್ಡಿ ಹಾಗೂ ಎರಡು ಬೋಗಿಗಳೊಂದಿಗೆ 6-ಅಂಡರ್ 66 ಸ್ಕೋರ್ ಮಾಡಿ ಮೂರನೇ ಸ್ಥಾನ ಪಡೆದರು.ಬೆಂಗಳೂರಿನ ಮಾರಿ ಮುತ್ತು ಆರ್., ಶ್ರೀಲಂಕಾದ ಎನ್. ಥಂಗರಾಜ, ಪ್ರಸ್ತುತ ರೇಸ್ ಟು DP ವರ್ಲ್ಡ್ ಇಂಡಿಯಾ ಚಾಂಪಿಯನ್ಶಿಪ್ ಅಂಕಪಟ್ಟಿಯ ಅಗ್ರಸ್ಥಾನದಲ್ಲಿರುವ ಸಪ್ತಕ್ ತಲ್ವಾರ್ ಹಾಗೂ ದೆಹಲಿಯ ಹಿಮ್ಮತ್ ಸಿಂಗ್ ರೈ ತಲಾ 5-ಅಂಡರ್ 67 ಸ್ಕೋರ್ನೊಂದಿಗೆ ನಾಲ್ಕನೇ ಸ್ಥಾನ ಹಂಚಿಕೊಂಡಿದ್ದಾರೆ.ಇನ್ನೂ ಆರು ಆಟಗಾರರು 4-ಅಂಡರ್ 68 ಸ್ಕೋರ್ನೊಂದಿಗೆ ಎಂಟನೇ ಸ್ಥಾನದಲ್ಲಿದ್ದಾರೆ. ಇವರಲ್ಲಿ ವೀರ್ ಅಹ್ಲಾವತ್, ಸುನೀತ್ ಚೌರಾಸಿಯಾ, ದಕ್ಷಿಣ ಆಫ್ರಿಕಾದ ಗೆರ್ಹಾರ್ಡಸ್ ಜಾಕೋಬಸ್ ಪೆಪ್ಲರ್, ಗುರ್ಕಿ ಶೆರ್ಗಿಲ್, ಯುವರಾಜ್ ಸಿಂಗ್ ಹಾಗೂ ಸೌರವ್ ರಾಠಿ ಸೇರಿದ್ದಾರೆ.ತಮ್ಮ ಪ್ರದರ್ಶನದ ಬಗ್ಗೆ ಮಾತನಾಡಿದ ಜೋಶಿ, ‘ನನ್ನ ತವರಿನ ಮೈದಾನದಲ್ಲಿ ಆಡುವಾಗ ನನಗೆ ತುಂಬಾ ಆರಾಮದಾಯಕವಾಗಿರುತ್ತದೆ. ಕಳೆದ ವಾರದಿಂದ ಉತ್ತಮ ಫಾರ್ಮ್ ಮುಂದುವರಿದಿರುವುದು ಸಂತಸ ತಂದಿದೆ.ಇಂದು ನಾನು ಆಡಿದ ರೀತಿ ಮತ್ತು ಸಂಯಮದಿಂದ ಆಡಿದ ಬಗ್ಗೆ ಖುಷಿಯಾಗಿದೆ’ ಎಂದರು.

ಸುಮಾರು ಎರಡು ತಿಂಗಳ ಬಳಿಕ ತವರಿಗೆ ಮರಳಿರುವುದು ಸಂತಸ ತಂದಿದೆ ಎಂದು ಹೇಳಿದ ಅವರು, ಕುಟುಂಬದೊಂದಿಗೆ ಸಮಯ ಕಳೆಯುವುದರಿಂದ ಉತ್ತಮ ಉತ್ಸಾಹ ದೊರೆತಿದೆ ಎಂದರು.ಬೆಂಗಳೂರು ಓಪನ್ 2026, 2026ರ DP ವರ್ಲ್ಡ್ PGTI ಆರ್ಡರ್ ಆಫ್ ಮೆರಿಟ್ನ ಅಗ್ರ 60 ಆಟಗಾರರನ್ನು ಅಂತಿಮಗೊಳಿಸುವ ಮುನ್ನ ನಡೆಯುವ ಕೊನೆಯ ಟೂರ್ನಿಯಾಗಿದೆ. ಟೂರ್ನಿಯ ಅಂತ್ಯದಲ್ಲಿ ಅಗ್ರ 60ರಲ್ಲಿ ಸ್ಥಾನ ಪಡೆಯುವ ಆಟಗಾರರು 2026-27ರ ಋತುವಿಗೆ ತಮ್ಮ ಆಟದ ಹಕ್ಕುಗಳನ್ನು ಉಳಿಸಿಕೊಳ್ಳಲಿದ್ದಾರೆ.