17 ಭಾರತೀಯರಿದ್ದ ಹಡಗಿನ ಮೇಲೆ ಇರಾನ್ ಪಡೆ ಗುಂಡು
ಸಾರಾಂಶ
ಹೋರ್ಮುಜ್ ಜಲಸಂಧಿ ಮೇಲಿನ ನಿಯಂತ್ರಣಕ್ಕಾಗಿ, ಅಮೆರಿಕ ಮತ್ತು ಇರಾನ್ ನಡುವೆ ತಿಕ್ಕಾಟ ಮುಂದುವರಿದಿರುವ ನಡುವೆಯೇ, ಜಲಸಂಧಿಯ ಸಮೀಪ ಇರಾನ್ನ ಕರಾವಳಿ ಕಾವಲು ಪಡೆಯು ಶನಿವಾರ ಹಡಗುಗಳ ಸಮೂಹದ ಮೇಲೆ ಎಚ್ಚರಿಕೆಯ ಗುಂಡಿನ ದಾಳಿ ನಡೆಸಿದೆ.
ಟೆಹ್ರಾನ್: ಹೋರ್ಮುಜ್ ಜಲಸಂಧಿ ಮೇಲಿನ ನಿಯಂತ್ರಣಕ್ಕಾಗಿ, ಅಮೆರಿಕ ಮತ್ತು ಇರಾನ್ ನಡುವೆ ತಿಕ್ಕಾಟ ಮುಂದುವರಿದಿರುವ ನಡುವೆಯೇ, ಜಲಸಂಧಿಯ ಸಮೀಪ ಇರಾನ್ನ ಕರಾವಳಿ ಕಾವಲು ಪಡೆಯು ಶನಿವಾರ ಹಡಗುಗಳ ಸಮೂಹದ ಮೇಲೆ ಎಚ್ಚರಿಕೆಯ ಗುಂಡಿನ ದಾಳಿ ನಡೆಸಿದೆ. ಆ ಗುಂಪಿನಲ್ಲಿ ಟೋಗೋ ಧ್ವಜ ಹೊತ್ತ ರಾಸಾಯನಿಕ ಹಡಗು ಚಿರೋನ್ 7 ಸಹ ಇತ್ತು. ಆ ಹಡಗಿನಲ್ಲಿ 17 ಭಾರತೀಯ ನಾವಿಕರಿದ್ದರು. ಆದರೆ ಅವರೆಲ್ಲರೂ ಸುರಕ್ಷಿತವಾಗಿದ್ದಾರೆ ಎಂದು ಕೇಂದ್ರ ಬಂದರು ಸಚಿವಾಲಯದ ನಿರ್ದೇಶಕ ಮನ್ದೀಪ್ ಸಿಂಗ್ ರಾಂಧಾವಾ ಮಾಹಿತಿ ನೀಡಿದ್ದಾರೆ.
‘17 ಭಾರತೀಯ ನಾವಿಕರನ್ನು ಹೊತ್ತಿದ್ದ ಈ ವಾಣಿಜ್ಯ ಹಡಗು
‘17 ಭಾರತೀಯ ನಾವಿಕರನ್ನು ಹೊತ್ತಿದ್ದ ಈ ವಾಣಿಜ್ಯ ಹಡಗು, ಇತರ ಹಡಗುಗಳ ಗುಂಪಿನೊಂದಿಗೆ ಹೋರ್ಮುಜ್ ಸಮೀಪ ಪ್ರಯಾಣಿಸುತ್ತಿತ್ತು. ಇರಾನ್ ಕರಾವಳಿ ಕಾವಲು ಪಡೆ ಈ ಹಡಗುಗಳನ್ನು ನಿಲ್ಲಿಸುವಂತೆ ತಿಳಿಸಿತ್ತು. ಅದಕ್ಕಾಗಿ ಕೆಲವು ಎಚ್ಚರಿಕೆ ಗುಂಡುಗಳನ್ನು ಹಾರಿಸಿತು. ಈ ಘಟನೆ ಒಮಾನ್ನ ಶಿನಾಸ್ ಬಂದರಿನ ಹತ್ತಿರ ನಡೆದಿದೆ. ಎಲ್ಲಾ ಭಾರತೀಯ ನಾವಿಕರು ಸುರಕ್ಷಿತರಾಗಿದ್ದಾರೆ. ನಮ್ಮ ಸಚಿವಾಲಯವು ವಿದೇಶಾಂಗ ಸಚಿವಾಲಯ, ಭಾರತೀಯ ದೂತಾವಾಸಗಳು ಮತ್ತು ಸಂಬಂಧಿತ ಅಧಿಕಾರಿಗಳೊಂದಿಗೆ ನಿರಂತರ ಸಂಪರ್ಕದಲ್ಲಿದೆ’ ಎಂದು ರಾಂಧಾವಾ ತಿಳಿಸಿದ್ದಾರೆ.
ಹೊಂಡೂರಸ್ ನಿರ್ವಹಣೆಯ ಹಡಗು:
ಹಡಗಿನ ಟ್ರ್ಯಾಕಿಂಗ್ ಮಾಹಿತಿ ಪ್ರಕಾರ, ಚಿರೋನ್ 7 ಹಡಗು ಕಳೆದ ಸುಮಾರು 10 ದಿನಗಳಿಂದ ತನ್ನ ಸ್ಥಳವನ್ನು ತೋರಿಸುವ ಟ್ರಾನ್ಸ್ಪಾಂಡರ್ ಅನ್ನು ಆನ್ ಮಾಡಿಲ್ಲ. ಕಳೆದ ವಾರ ಇದು ಪರ್ಷಿಯನ್ ಕೊಲ್ಲಿಯಿಂದ (ಹೋರ್ಮುಜ್ ಜಲಸಂಧಿಯ ಪೂರ್ವ ಭಾಗ) ಹೊರಗೆ ಬರಲು ಪ್ರಯತ್ನಿಸುತ್ತಿತ್ತು. ಶಿನಾಸ್ ಬಂದರು ಜಲಸಂಧಿಯ ಇನ್ನೊಂದು ಬದಿಯಲ್ಲಿರುವುದರಿಂದ, ಈ ಹಡಗು ಹೋರ್ಮುಜ್ ಅನ್ನು ದಾಟಿರಬಹುದು ಎಂದು ಅಂದಾಜಿಸಲಾಗಿದೆ. ಈಗ ಹಡಗು ಎಲ್ಲಿದೆ ಮತ್ತು ಅದರ ಸ್ಥಿತಿ ಏನು ಎಂಬುದರ ಬಗ್ಗೆ ಮಾಹಿತಿ ದೊರೆತಿಲ್ಲ. ಗ್ಲೋಬಲ್ ಶಿಪ್ಪಿಂಗ್ ದತ್ತಾಂಶಗಳ ಪ್ರಕಾರ, ಈ ಹಡಗನ್ನು ಹೊಂಡೂರಸ್ ದೇಶದ ಒಂದು ಶಿಪ್ಪಿಂಗ್ ಕಂಪನಿ ನಿರ್ವಹಿಸುತ್ತಿದೆ.