ಅಬ್ದುಲ್‌ ಕಲಾಂರ ಆತ್ಮಕಥನ ಯುವಜನರಿಗೆ ಸ್ಫೂರ್ತಿ: ಸಂಸದ ಶ್ರೇಯಸ್ ಪಟೇಲ್

ಕಲಾಂ ಜನ್ಮದಿನ । ಉಚಿತ ಆರೋಗ್ಯ ತಪಾಸಣಾ ಶಿಬಿರ । ಸಾರ್ವಜನಿಕರಿಗೆ ಆರೋಗ್ಯ ತಪಾಸಣೆ

ಸರಳತೆ, ಪ್ರಾಮಾಣಿಕತೆ, ಮೇರು ವ್ಯಕ್ತಿತ್ವದ ದೇಶಪ್ರೇಮಿ, ಮಿಸೈಲ್ ಮ್ಯಾನ್ ಆಫ್ ಇಂಡಿಯಾ ಹಾಗೂ ಮಾಜಿ ರಾಷ್ಟ್ರಪತಿ ಎಪಿಜೆ ಅಬ್ದುಲ್ ಕಲಾಂ ಅವರ ವ್ಯಕ್ತಿತ್ವ ಮತ್ತು ನೈತಿಕತೆಯಿಂದ ಕೂಡಿದ ಆದರ್ಶ ಜೀವನ ಅರಿತು ಸಾಗಬೇಕಿದೆ. ಎಪಿಜೆ ಅಬ್ದುಲ್ ಕಲಾಂರ ಆತ್ಮಕಥೆ ‘ವಿಂಗ್ಸ್ ಆಫ್ ಫೈರ್’ ಪುಸ್ತಕ ಓದಿ ಅರ್ಥೈಸಿಕೊಂಡಲ್ಲಿ, ಅದರ ತಾತ್ಪರ್ಯ ನೀಡುವ ಸ್ಫೂರ್ತಿಯು ಸುಂದರ ಬದುಕು ರೂಪಿಸಿಕೊಳ್ಳುವ ಆತ್ಮಸ್ಥೈರ್ಯ ನೀಡುತ್ತದೆ ಎಂದು ಸಂಸದ ಶ್ರೇಯಸ್ ಎಂ.ಪಟೇಲ್ ಅಭಿಪ್ರಾಯ ವ್ಯಕ್ತಪಡಿಸಿದರು.

ಹಾಸನ ಜನಪ್ರಿಯ ಆಸ್ಪತ್ರೆಯ ಡಾ.ಅಬ್ದುಲ್ ಬಷೀರ್ ಮಾತನಾಡಿ, ಶುಗರ್ ಹಾಗೂ ಬಿಪಿ ಸಾಮಾನ್ಯ ಕಾಯಿಲೆಯಾದರೂ ಸಹ ಅಗತ್ಯ ಸಮಯದಲ್ಲಿ ಸೂಕ್ತ ಚಿಕಿತ್ಸೆ ಹಾಗೂ ವೈದ್ಯರ ಸಲಹೆ ಹಾಗೂ ಸೂಚನೆಗಳ ಪಾಲನೆ ಮುಖ್ಯವಾಗಿದೆ. ಒಂದು ಮರಕ್ಕೆ ಗೆದ್ದಿಲು ಹೇಗೆ ಮರವನ್ನು ನಾಶ ಮಾಡುತ್ತೋ ಅದೇ ರೀತಿ ಶುಗರ್ ಅಥವಾ ಮಧುಮೇಹ ಮನುಷ್ಯನಿಗೆ ಗೆದ್ದಿಲು ಹುಳವಿದ್ದಂತೆ. ಆದ್ದರಿಂದ ಅಗತ್ಯ ತಪಾಸಣೆ ಜತೆಗೆ ಔಷಧಿಗಳ ಸೇವನೆಯಿಂದ ಯಾವುದೇ ಭಯ ಇಲ್ಲದೇ ಜೀವನ ನಡೆಸಬಹುದು. ಇಂದಿನ ಕಾರ್ಯಕ್ರಮದ ರೀತಿಯಲ್ಲಿ ತಪಾಸಣೆ ಶಿಬಿರಗಳು ನಡೆಯುವಾಗ ಹೋಗಿ ಒಮ್ಮೆ ತಪಾಸಣೆ ಮಾಡಿಸಿಕೊಂಡಲ್ಲಿ ಹೆಚ್ಚಿನ ಅನಾಹುತ ತಪ್ಪಿಸಲು ಸಾಧ್ಯವಾಗುತ್ತದೆ ಎಂದು ಸಲಹೆ ನೀಡಿದರು.

ಸಾರ್ವಜನಿಕ ಆಸ್ಪತ್ರೆಯ ಡಾ.ನಾಗೇಂದ್ರ, ಡಾ.ಅಶ್ವತಿ, ಡಾ.ಚಿಂತನಾ ಹಾಗೂ ನರ್ಸಿಂಗ್ ಕಾಲೇಜಿನ ವಿದ್ಯಾರ್ಥಿನಿಯರು ಮತ್ತು ಜನಪ್ರಿಯ ಆಸ್ಪತ್ರೆಯ ಡಾ.ಮಹಮದ್ ಫಸಲ್, ಡಾ.ಸಚಿನ್, ಡಾ.ವೈಭವ್, ಡಾ ಶಿವಪ್ರಸಾದ್ ಆರೋಗ್ಯ ತಪಾಸಣೆ ನಡೆಸಿದರು.

ಸೈಯದ್ ಇಂಬ್ರಾನ್ ಪ್ರಾರ್ಥಿಸಿದರು, ಸುಜಾತ್ ಅಲಿ ಸ್ವಾಗತಿಸಿದರು, ಖಧೀರ್ ಅಹಮದ್ ನಿರೂಪಿಸಿದರು ಹಾಗೂ ಫಯಾಜ್ ಪಾಷ ವಂದಿಸಿದರು.