‘ಗ್ಯಾರಂಟಿ ಪದ ಪರಿಚಯಿಸಿದ್ದೇ ನಾವು, ಕರ್ನಾಟಕದಲ್ಲಿ ಮೊದಲು ಬಳಕೆ’ : ಕಾಂಗ್ರೆಸ್‌

ನವದೆಹಲಿ: ‘ನುಡಿದಂತೆ ನಡೆಯುತ್ತೇವೆ ಎಂಬುದನ್ನು ಸಾಬೀತುಪಡಿಸಲು 2023ರಲ್ಲಿ ಮೊತ್ತಮೊದಲ ಬಾರಿಗೆ ಕರ್ನಾಟಕದಲ್ಲಿ ಗ್ಯಾರಂಟಿ ಎಂಬ ಪದವನ್ನು ಬಳಸಿದ್ದು ನಾವೇ’ ಎಂದು ಕಾಂಗ್ರೆಸ್‌ ಹೇಳಿದೆ.

ದೆಹಲಿ ವಿಧಾನಸಭೆ ಹಿನ್ನೆಲೆಯಲ್ಲಿ ಪಕ್ಷದ ಪ್ರಣಾಳಿಕೆ ಬಿಡುಗಡೆ ಮಾಡಿ ಮಾತನಾಡಿದ ಕಾಂಗ್ರೆಸ್‌ ಪ್ರಧಾನ ಕಾರ್ಯದರ್ಶಿ ಜೈರಾಂ ರಮೇಶ್‌, ‘ಇಂದು ಎಲ್ಲಾ ಪಕ್ಷಗಳು ಗ್ಯಾರಂಟಿ ಎಂಬ ಪದ ಬಳಸುತ್ತಿವೆ. ಆದರೆ ಇದನ್ನು ಮೊದಲ ಬಾರಿ ನಾವು 2023ರಲ್ಲಿ ಕರ್ನಾಟಕದಲ್ಲಿ ಬಳಸಿದ್ದೆವು. ಈ ಮೂಲಕ, ಕಾಂಗ್ರೆಸ್‌ ಪಕ್ಷ ನುಡಿದಂತೆ ನಡೆಯುತ್ತದೆ ಎಂಬುದನ್ನು ತೋರಿಸಿಕೊಟ್ಟೆವು. ಇದು ಕೇವಲ ಗ್ಯಾರಂಟಿ ಅಲ್ಲ, ಜನರ ಹಕ್ಕು’ ಎಂದರು. ಅಂತೆಯೇ, ಮನಮೋಹನ್‌ ಸಿಂಗ್‌ ಪ್ರಧಾನಿಯಾಗಿದ್ದಾಗ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತರಿ ಕಾಯ್ದೆಯ ಹೆಸರಲ್ಲಿ ಗ್ಯಾರಂಟಿ ಪರಿಚಯಿಸಿದ್ದನ್ನೂ ಉಲ್ಲೇಖಿಸಿದರು.

2023ರ ವಿಧಾನಸಭೆಗೂ ಮುನ್ನ ರಾಜ್ಯ ಕಾಂಗ್ರೆಸ್‌, ಗೃಹಲಕ್ಷ್ಮಿ, ಗೃಹಜ್ಯೋತಿ, ವಿದ್ಯಾನಿಧಿ, ಶಕ್ತಿ ಯೋಜನೆ, ಅನ್ನಭಾಗ್ಯದಂತಹ ಪಂಚ ಗ್ಯಾರಂಟಿಗಳನ್ನು ಘೋಷಿಸಿತ್ತು.