ಹರ್ಯಾಣ ವಿಧಾನಸಭಾ ಚುನಾವಣೆಗೆ ಕಾಂಗ್ರೆಸ್ ಪ್ರಣಾಳಿಕೆಯಲ್ಲಿ ಉಚಿತ ಕೊಡುಗೆಗಳ ಸುರಿಮಳೆ

ನವದೆಹಲಿ: ಕರ್ನಾಟಕ ಮತ್ತು ತೆಲಂಗಾಣದಲ್ಲಿ ಭರ್ಜರಿಯಾಗಿ ಫಲ ಕೊಟ್ಟಿರುವ ಉಚಿತ ಕೊಡುಗೆಗಳ ಸರಣಿಯನ್ನು ಮುಂಬರುವ ಹರ್ಯಾಣ ವಿಧಾನಸಭಾ ಚುನಾವಣೆಯಲ್ಲೂ ಮುಂದುವರೆಸಲು ಕಾಂಗ್ರೆಸ್‌ ನಿರ್ಧರಿಸಿದೆ. ಈ ಸಂಬಂಧ ಹಲವು ಉಚಿತ ಕೊಡುಗೆಗಳನ್ನು ಒಳಗೊಂಡ ಚುನಾವಣಾ ಪ್ರಣಾಳಿಕೆಯನ್ನು ಪಕ್ಷ ಬುಧವಾರ ಬಿಡುಗಡೆ ಮಾಡಿದೆ.

ಪಕ್ಷದ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಬಿಡುಗಡೆ ಮಾಡಿದ ಪ್ರಣಾಳಿಕೆಯಲ್ಲಿ 7 ಪ್ರಮುಖ ಗ್ಯಾರಂಟಿಗಳನ್ನು ಪ್ರಸ್ತಾಪಿಸಲಾಗಿದೆ. ಅದರಲ್ಲಿ ಬಡವರಿಗೆ ಉಚಿತ ಸೈಟ್‌, ಮನೆ ನಿರ್ಮಾಣ, ಜಾತಿ ಗಣತಿ, ಕರ್ನಾಟಕದ ಗೃಹ ಲಕ್ಷ್ಮೀ ಮಾದರಿ ಮಹಿಳೆಯರಿಗೆ ಮಾಸಿಕ 2000 ರು. ನೆರವಿನ ಅಂಶಗಳು ಸೇರಿವೆ.

ಏನೇನು ಕೊಡುಗೆ?:

ಬಡವರು: ಬಡವರಿಗೆ ಉಚಿತವಾಗಿ 900 ಚದರಡಿ ಜಾಗ, 2 ಕೊಠಡಿಯ 3.5 ಲಕ್ಷ ರು.ವೆಚ್ಚದ ಮನೆ ನಿರ್ಮಾಣ

ಕುಟುಂಬಕ್ಕೆ: ಮಾಸಿಕ 300 ಯುನಿಟ್‌ ಉಚಿತ ವಿದ್ಯುತ್‌, 25 ಲಕ್ಷ ರು.ವರೆಗೆ ಉಚಿತ ಆರೋಗ್ಯ ವಿಮೆ.

ಮಹಿಳಾ ಸಬಲೀಕರಣ: ಮಹಿಳೆಯರಿಗೆ ಮಾಸಿಕ 2000 ರು.; 500 ರು.ಗೆ ಎಲ್‌ಪಿಜಿ ಸಿಲಿಂಡರ್‌.

ಯುವಸಮೂಹ: 2 ಲಕ್ಷ ನೇಮಕಾತಿ; ಡ್ರಗ್‌ ಮುಕ್ತ ರಾಜ್ಯ ನಿರ್ಮಾಣ.

ಸಾಮಾಜಿಕ ಭದ್ರತೆ: ವೃದ್ದರಿಗೆ, ಅಂಗವಿಕಲರಿಗೆ, ವಿಧವೆಯರಿಗೆ ಮಾಸಿಕ 6000 ರು.ಪಿಂಚಣಿ. ಹಳೆ ಪಿಂಚಣಿ ಮರು ಜಾರಿ.

ಹಿಂದುಳಿದ ಸಮುದಾಯ: ಜಾತಿ ಗಣತಿ; ಮೀಸಲಿಗೆ ಇರುವ ಕೆನೆಪದರ ಮಿತಿ 10 ಲಕ್ಷರು.ಗೆ ಏರಿಕೆ

ರೈತರು: ಬೆಳೆಗಳಿಗೆ ಕನಿಷ್ಠ ಬೆಂಬಲ ಬೆಲೆ, ತಕ್ಷಣ ಬೆಳೆ ಪರಿಹಾರ