ತಟ್ಟೆಯಲ್ಲಿ ಅರ್ಧ ತಿಂದ ಊಟ, ನೆಲದಲ್ಲಿ ಬಿದ್ದ ಸುಟ್ಟ ಶವಗಳು

ಅಹಮದಾಬಾದ್‌: ಟೇಕ್‌ ಆಫ್‌ ಆದ ಕೆಲವೇ ನಿಮಿಷಗಳಲ್ಲಿ ಏರಿಂಡಿಯಾದ ವಿಮಾನವು, ರನ್‌ವೇನ ಸಮೀಪವೇ ಇದ್ದ ಮೆಡಿಕಲ್‌ ಕಾಲೇಜಿಗೆ ಅಪ್ಪಳಿಸಿ ಬೆಂಕಿಯುಂಡೆಯಾಗಿತ್ತು. ಕೆಲವೇ ಕ್ಷಣದಲ್ಲಿ ನಡೆದ ಈ ಘಟನೆಯು, ವಿಮಾನದಲ್ಲಿದ್ದವರ ಜತೆಗೆ ಕಟ್ಟಡದಲ್ಲಿದ್ದ ಹಲವು ವೈದ್ಯರ ಪ್ರಾಣವನ್ನೂ ಆಹುತಿ ಪಡೆದಿದೆ. ಅದು ಮಧ್ಯಾಹ್ನದ ಹೊತ್ತಾಗಿದ್ದರಿಂದ ಬಿಜೆ ಮೆಡಿಕಲ್‌ ಕಾಲೇಜಿನ ವೈದ್ಯಕೀಯ ವಿದ್ಯಾರ್ಥಿಗಳೆಲ್ಲ ಊಟಕ್ಕೆ ಕುಳಿತಿದ್ದರು. ಇನ್ನೇನು ಅನ್ನಕ್ಕೆ ಕೈ ಇಡಬೇಕು ಎನ್ನುವಷ್ಟರಲ್ಲಿ ವೇಗವಾಗಿ ಹಾರಿಬಂದ ವಿಮಾನ ಆ ಕಟ್ಟಡಕ್ಕೆ ಅಪ್ಪಳಿಸಿದೆ. ಇದರಿಂದ ಅಲ್ಲಿದ್ದ ಬಹುತೇಕರು ಗಂಭೀರವಾಗಿ ಗಾಯಗೋಂಡಿದ್ದಾರೆ. ಹಲವರು ಸ್ಥಳದಲ್ಲೇ ಪ್ರಾಣ ಕಳೆದುಕೊಂಡಿದ್ದಾರೆ. ಭೋಜನ ಸ್ಥಳದಲ್ಲಿ ಊಟವಿರುವ ತಟ್ಟೆಗಳು ಹಾಗೆಯೇ ಇರುವ, ನೆಲದಲ್ಲಿ ಬಿದ್ದಿರುವ ಸುಟ್ಟ ಶವಗಳ ದೃಶ್ಯಗಳು ಮನ ಕಲಕುವಂತಿವೆ.