ಇಂದಿನಿಂದ 2 ದಿನ ಕೇಂದ್ರ ಸಚಿವರ ‘ಚಿಂತನ ಶಿಬಿರ’

ನವದೆಹಲಿ: ಸರ್ಕಾರಿ ಕೆಲಸಗಳ ಪ್ರಸ್ತುತ ಸ್ಥಿತಿಗತಿಯನ್ನು ಅವಲೋಕಿಸಿ ಭವಿಷ್ಯದ ಯೋಜನೆಗಳನ್ನು ರೂಪಿಸಲು, ಕೇಂದ್ರ ಸಚಿವರ 2 ದಿನಗಳ ಚಿಂತನ ಶಿಬಿರವು ಬುಧವಾರದಿಂದ ಆರಂಭವಾಗಲಿದೆ. ಪ್ರಧಾನಿ ನರೇಂದ್ರ ಮೋದಿ ಅವರ ನೇತೃತ್ವದ ಈ ಕಾರ್ಯಕ್ರಮವು ಅವರ ನಿವಾಸವಾದ ಸೇವಾತೀರ್ಥದಲ್ಲೇ ನಡೆಯಲಿದೆ.

ಎಲ್ಲಾ ಸಚಿವರು ಭಾಗವಹಿಸಲಿರುವ ಈ ಶಿಬಿರದಲ್ಲಿ ಸರ್ಕಾರಿ ಯೋಜನೆಗಳ ಪ್ರಗತಿ, ನೀತಿಗಳ ಅನುಷ್ಠಾನ, ಸಮಯ ನಿರ್ವಹಣೆ, ಸಚಿವಾಲಯಗಳ ನಡುವಿನ ಸಮನ್ವಯ, ಸಾರ್ವಜನಿಕ ಸೇವೆಗಳ ವಿತರಣೆ ಮುಂತಾದ ವಿಷಯಗಳ ಕುರಿತು ಚರ್ಚೆ ನಡೆಸಲಾಗುವುದು. ಜತೆಗೆ 2047ರ ವೇಳೆಗೆ ವಿಕಸಿತ ಭಾರತದ ಗುರಿ ತಲುಪಲು ಅಗತ್ಯವಾದ ಸುಧಾರಣೆಗಳ ಬಗ್ಗೆ ಚಿಂತನೆ ಮಾಡಲಾಗುವುದು. ಇದಕ್ಕೆ ಅನುಗುಣವಾಗಿ ಅಲ್ಪಾವಧಿಯ ಮತ್ತು ದೀರ್ಘಾವಧಿಯ ಮಾರ್ಗಸೂಚಿ ಸಿದ್ಧಪಡಿಸಲಾಗುವುದು.