ತಿರುಪತಿ ಬಳಿಕ ಶಬರಿಮಲೆಯಲ್ಲೂ ಕಳಪೆ ತುಪ್ಪದ ಪೂರೈಕೆ ಹಗರಣ! 11000 ಟನ್‌ ಅಸಲಿ ತುಪ್ಪ ಬೇರೆಡೆ ವರ್ಗ
;Resize=(412,232))
ಸಾರಾಂಶ
ತಿರುಪತಿ ಆಯ್ತು, ಈಗ ಶಬರಿಮಲೆ ಅಯ್ಯಪ್ಪ ದೇವಸ್ಥಾನಕ್ಕೂ ಪೂರೈಸಿದ ತುಪ್ಪ ಕಳಪೆ ಗುಣಮಟ್ಟದ್ದಾಗಿತ್ತು ಎಂಬುದು ತನಿಖೆಯಿಂದ ಬೆಳಕಿಗೆ ಬಂದಿದೆ. ದೇವಸ್ಥಾನಕ್ಕೆ ಅರವಣ ಪ್ರಸಾದ ತಯಾರಿಸಲು ಸಾಗಿಸಬೇಕಿದ್ದ 11 ಸಾವಿರ ಲೀಟರ್‌ ಮಿಲ್ಮಾ ತುಪ್ಪದ ಬದಲು ಕಡಿಮೆ ಗುಣಮಟ್ಟದ ತುಪ್ಪ ಪೂರೈಕೆ
ತಿರುವನಂತಪುರಂ : ತಿರುಪತಿ ಆಯ್ತು, ಈಗ ಶಬರಿಮಲೆ ಅಯ್ಯಪ್ಪ ದೇವಸ್ಥಾನಕ್ಕೂ ಪೂರೈಸಿದ ತುಪ್ಪ ಕಳಪೆ ಗುಣಮಟ್ಟದ್ದಾಗಿತ್ತು ಎಂಬುದು ತನಿಖೆಯಿಂದ ಬೆಳಕಿಗೆ ಬಂದಿದೆ. ದೇವಸ್ಥಾನಕ್ಕೆ ಅರವಣ ಪ್ರಸಾದ ತಯಾರಿಸಲು ಸಾಗಿಸಬೇಕಿದ್ದ 11 ಸಾವಿರ ಲೀಟರ್‌ ಮಿಲ್ಮಾ ತುಪ್ಪದ ಬದಲು ಕಡಿಮೆ ಗುಣಮಟ್ಟದ ತುಪ್ಪ ಪೂರೈಸುವ ಮೂಲಕ ತಿರುವಾಂಕೂರು ದೇವಸ್ವಂ ಮಂಡಳಿಗೆ (ಟಿಡಿಬಿ) 2.5 ಕೋಟಿ ರು. ನಷ್ಟ ಉಂಟು ಮಾಡಿದ ಆರೋಪಕ್ಕೆ ಸಂಬಂಧಿಸಿ ಲಾರಿ ಗುತ್ತಿಗೆದಾರರೊಬ್ಬರನ್ನು ಬಂಧಿಸಲಾಗಿದೆ.
ಬಂಧಿತ ಎಸ್‌.ಎಸ್‌.ಬಿನು
ಬಂಧಿತನನ್ನು ಎಸ್‌.ಎಸ್‌.ಬಿನು ಎಂದು ಗುರುತಿಸಲಾಗಿದ್ದು, ಈತ 2025ರಿಂದ ಶಬರಿಮಲೆ ದೇಗುಲಕ್ಕೆ ಮಿಲ್ಮಾ ಡೈರಿಯಿಂದ ತುಪ್ಪ ಸಾಗಿಸುವ ಗುತ್ತಿಗೆ ಪಡೆದಿದ್ದ. ತುಪ್ಪ ಪೂರೈಕೆಯಲ್ಲಿ ಭಾರೀ ಅಕ್ರಮದ ಆರೋಪ ಕೇಳಿಬಂದ ಹಿನ್ನೆಲೆಯಲ್ಲಿ ಕೇರಳ ಹೈಕೋರ್ಟ್‌ ಉಸ್ತುವಾರಿಯಲ್ಲಿ ತನಿಖೆ ನಡೆಸುತ್ತಿರುವ ವಿಚಕ್ಷಣ ಹಾಗೂ ಭ್ರಷ್ಟಾಚಾರ ನಿಗ್ರಹ ದಳದ ಅಧಿಕಾರಿಗಳು ಶುಕ್ರವಾರ ಬಿನುನನ್ನು ಬಂಧಿಸಿದ್ದಾರೆ.
ಮಿಲ್ಮಾ ಬ್ರ್ಯಾಂಡ್‌ನಡಿ ಹಾಲು ಮತ್ತು ಹಾಲಿನ ಉತ್ಪನ್ನಗಳನ್ನು ಮಾರಾಟ
ಕರ್ನಾಟಕದ ಕೆಎಂಎಫ್‌ನ ನಂದಿನಿ ಬ್ರ್ಯಾಂಡ್‌ನಂತೆ ಕೇರಳದ ಸಹಕಾರಿ ಹಾಲು ಒಕ್ಕೂಟವು ಮಿಲ್ಮಾ ಬ್ರ್ಯಾಂಡ್‌ನಡಿ ಹಾಲು ಮತ್ತು ಹಾಲಿನ ಉತ್ಪನ್ನಗಳನ್ನು ಮಾರಾಟ ಮಾಡುತ್ತದೆ. ಶಬರಿಮಲೆಯ ಅರವಣ (ಸಿಹಿ) ಪ್ರಸಾದಕ್ಕಾಗಿ ಟಿಡಿಬಿಯು ಪಟ್ಟಣಂತಿಟ್ಟ ಮಿಲ್ಮಾ ಡೈರಿ ಜತೆ ನೇರ ಒಪ್ಪಂದ ಮಾಡಿಕೊಂಡಿತ್ತು. ಡೈರಿಯಿಂದ ತುಪ್ಪವನ್ನು ಸಾಗಿಸುವ ಗುತ್ತಿಗೆಯನ್ನು ಆರೋಪಿ ಬಿನುಗೆ ನೀಡಲಾಗಿತ್ತು. ಆದರೆ ಆರೋಪಿ ಬಿನು ಮಿಲ್ಮಾ ಡೈರಿಯಿಂದ ಲಾರಿಗೆ ತುಂಬುತ್ತಿದ್ದ ನೈಜ ತುಪ್ಪವನ್ನು ಬೇರೆಡೆ ವರ್ಗಾಯಿಸಿ, ಶಬರಿಮಲೆಗೆ ಕಡಿಮೆ ಗುಣಮಟ್ಟದ ತುಪ್ಪ ಪೂರೈಸಿದ್ದ. ತಮಿಳುನಾಡಿನ ಶ್ರೀ ವೆಂಕಟೇಶ್ವರ ಟ್ರೇಡರ್ಸ್‌ ಮತ್ತು ಲಿಯೋ ಟ್ರೇಡರ್ಸ್‌ಗೆ ನೈಜ ಮಿಲ್ಮಾ ತುಪ್ಪವನ್ನು ನಕಲಿ ದಾಖಲೆಗಳನ್ನು ಬಳಸಿ ಸಾಗಿಸಲಾಗಿದೆ ಎಂಬ ಆರೋಪವಿದೆ.