ರೈತ ಬಂಡಾಯಕ್ಕೀಗ 46 ವರ್ಷ!
ಸಾರಾಂಶ
ಇದೀಗ ಮಲಪ್ರಭಾ ತೀರದ ಪ್ರದೇಶದ ಜನರು ಕುಡಿಯುವ ನೀರಿಗಾಗಿ ನಡೆಸುತ್ತಿರುವ ನಿರಂತರ ಹೋರಾಟ 2 ವರ್ಷ ಪೂರೈಸಿ, 3ನೇ ವರ್ಷಕ್ಕೆ ಪದಾರ್ಪಣೆ ಮಾಡಿದ ಈ ವೇಳೆ ಹಿಂದಿನ ಬಂಡಾಯ ನೆನೆಯದೇ ಇರಲಾಗದು. ಆ ರೈತ ಚಳವಳಿಯು ಸರ್ಕಾರವನ್ನೇ ಉರುಳಿಸಿತು ಎಂಬುದು ಈಗ ಇತಿಹಾಸ.
ಫಕೃದ್ದೀನ್ ಎಂ.ಎನ್.
1980 ಜುಲೈ 21 ಬೆಟರ್ಮೆಂಟ್ ಲೇವಿಯ ಅನಗತ್ಯ ಭಾರಕ್ಕೆ ತತ್ತರಿಸಿ ಮಲಪ್ರಭಾ ಅಚ್ಚುಕಟ್ಟು ಪ್ರದೇಶದ ರೈತರು ಆಕ್ರೋಶಗೊಂಡು ಸರ್ಕಾರದ ವಿರುದ್ಧ ಸಿಡಿದೆದ್ದರು. ಆ ವೇಳೆ ಪೊಲೀಸರ ಗುಂಡೇಟಿಗೆ ಇಬ್ಬರು ರೈತರು ಬಲಿಯಾದರು. ರೈತರಿಗೆ ಅದು ಕರಾಳ ದಿನ.
ರೈತರು ತಮಗಾದ ಅನ್ಯಾಯಕ್ಕೆ ಆಕ್ರೋಶಗೊಂಡು ಉಗ್ರರೂಪದ ಪ್ರತಿಭಟನೆ ನಡೆಸಿದರು. ಆಗ ರೈತರ ಗಟ್ಟಿ ದನಿಗೆ ಗುಂಡೂರಾಯರ ಕಾಂಗ್ರೆಸ್ ಸರ್ಕಾರ ಪತನಗೊಂಡು ರೈತ ವಿರೋಧಿ ರಾಜಕಾರಣಕ್ಕೂ ಪಾಠವಾಯಿತೇನೋ ನಿಜ. ಆದರೆ, ಇಂದಿಗೂ ರೈತರ ಜ್ವಲಂತ ಸಮಸ್ಯೆಗಳು ಜೀವಂತವಾಗಿಯೇ ಇದೆ.ಈಗ ಕಳಸಾ, ಬಂಡೂರಿ ನಾಲಾ ಯೋಜನೆ ಕುರಿತಾಗಿ ಹೋರಾಟ ಮತ್ತೆ ರೈತಶಕ್ತಿಯ ಬಲ ಪ್ರದರ್ಶನಕ್ಕೆ ನಾಂದಿ ಹಾಡಿದೆ. ಈಗ ನಡೆಯುತ್ತಿರುವ ಹೋರಾಟದಲ್ಲೂ ಹಲವಾರು ರೈತಪರ ಸಂಘಟನೆಗಳು ಹುಟ್ಟಿಕೊಂಡಿವೆಯಾದರೂ ಎಲ್ಲ ಸಂಘಟನೆಗಳ ಹೋರಾಟದ ಗುರಿ ಕಳಸಾ, ಬಂಡೂರಿ ನಾಲಾ ಯೋಜನೆಗೆ ಮಾತ್ರ ಸೀಮಿತವಾಗಿದೆ.
ಜು. 21ಕ್ಕೆ 46 ವರ್ಷ
ಹುತಾತ್ಮ ರೈತ ಬಸಪ್ಪ ಲಕ್ಕುಂಡಿ ವೀರಗಲ್ಲು ಬಳಿ ಜು. 21ರಂದು ಹುತಾತ್ಮ ರೈತ ದಿನಾಚರಣೆಗಾಗಿ ರೈತ ಸಂಘಟನೆಗಳು, ರಾಜಕೀಯ ಪಕ್ಷಗಳ ನೇತಾರರು ಆಗಮಿಸುತ್ತಾರೆ. ಆದರೆ, ರೈತರ ಬೇಡಿಕೆಗಳು ಹೋರಾಟಕ್ಕೆ ಸೀಮಿತವಾಗಿವೆ. ಮತ್ತೆ ಬಂಡಾಯ ನಡೆದೀತು ಎಂಬ ಕೂಗು ಪ್ರತಿವರ್ಷ ಪ್ರತಿಧ್ವನಿಸುತ್ತಲೇ ಇದೆ. ಆದರೆ, ಹಿಂದಿನ ಅಬ್ಬರ ಈಗ ಇಲ್ಲ.
ರೈತ ಬಂಡಾಯದ ಸಂದರ್ಭದಲ್ಲಿ ರೈತರ ಪ್ರತಿದಾಳಿಗೆ ಪ್ರಾಣ ಕಳೆದುಕೊಂಡು ಪೊಲೀಸರು ಹುತಾತ್ಮರಾದರು. ಇದರ ನೆನಪಿಗೋಸ್ಕರ ನವಲಗುಂದ ಪೊಲೀಸ್ ಠಾಣೆ ಆವರಣದಲ್ಲಿ ಸ್ಮಾರಕ ನಿರ್ಮಾಣಗೊಂಡಿವೆ. ಜು. 21ರಂದು ರೈತರಿಗೆ, ಪೊಲೀಸರಿಗೆ ಗೌರವ ಸಲ್ಲಿಸುವ ಕಾರ್ಯಕ್ರಮ ನಡೆಯಲಿದೆ.