ಕಲ್ಬಿಗಿರಿ, ಅರೆಹಳ್ಳಿ, ಫಲವನಹಳ್ಳಿ ದೇವರುಗಳ ಬನ್ನಿ ಉತ್ಸವ
ಸಾರಾಂಶ
ನ್ಯಾಮತಿ ತಾಲೂಕಿನ ಕಲ್ಬಿಗಿರಿ ಬೆಟ್ಟದ ಮೇಲಿರುವ ಶ್ರೀ ಲಕ್ಷ್ಮೀರಂಗನಾಥ ಸ್ವಾಮಿ, ಅರೆಹಳ್ಳಿಯ ಶ್ರೀ ತಿರುಮಲ ರಂಗನಾಥ ಸ್ವಾಮಿ, ಫಲವನಹಳ್ಳಿಯ ಶ್ರೀ ರಂಗನಾಥ ಸ್ವಾಮಿ ಗ್ರಾಮ ದೇವರುಗಳ ಬನ್ನಿ ಉತ್ಸವ ಸಾವಿರಾರು ಭಕ್ತರ ಸಮ್ಮುಖ ವಿಜೃಂಭಣೆಯಿಂದ ನಡೆಯಿತು.
- ಸಾವಿರಾರು ಭಕ್ತರ ಸಮ್ಮುಖ ವಿಜೃಂಭಣೆ ಆಚರಣೆ । ರೊಟ್ಟಿಬುತ್ತಿ ಪ್ರಸಾದ ಸೇವೆ ವಿಶೇಷ
ಕನ್ನಡಪ್ರಭ ವಾರ್ತೆ ನ್ಯಾಮತಿ
ತಾಲೂಕಿನ ಕಲ್ಬಿಗಿರಿ ಬೆಟ್ಟದ ಮೇಲಿರುವ ಶ್ರೀ ಲಕ್ಷ್ಮೀರಂಗನಾಥ ಸ್ವಾಮಿ, ಅರೆಹಳ್ಳಿಯ ಶ್ರೀ ತಿರುಮಲ ರಂಗನಾಥ ಸ್ವಾಮಿ, ಫಲವನಹಳ್ಳಿಯ ಶ್ರೀ ರಂಗನಾಥ ಸ್ವಾಮಿ ಗ್ರಾಮ ದೇವರುಗಳ ಬನ್ನಿ ಉತ್ಸವ ಸಾವಿರಾರು ಭಕ್ತರ ಸಮ್ಮುಖ ವಿಜೃಂಭಣೆಯಿಂದ ನಡೆಯಿತು.ಕಲ್ಬಿಗಿರಿ ಬೆಟ್ಟದ ಮೇಲಿರುವ ಶ್ರೀ ಲಕ್ಷ್ಮೀರಂಗನಾಥಸ್ವಾಮಿ, ಅರೆಹಳ್ಳಿ ಗ್ರಾಮದ ಶ್ರೀ ರುದ್ರೇಶ್ವರಸ್ವಾಮಿ, ಶ್ರೀ ತಿರುಮಲ ರಂಗನಾಥಸ್ವಾಮಿ, ಶ್ರೀ ಚೌಡಮ್ಮ ಮತ್ತು ಮಾತೆಂಗಮ್ಮ, ಫಲವನಹಳ್ಳಿ ಗ್ರಾಮದ ಶ್ರೀ ರಂಗನಾಥಸ್ವಾಮಿ, ಶ್ರೀ ಆಂಜನೇಯಸ್ವಾಮಿ, ಗಂಗಾಪರಮೇಶ್ವರಿ, ಸೇವಾಲಾಲ್‌ ಹಾಗೂ ಮರಿಯಮ್ಮ ದೇವರುಗಳ ಪಾಲ್ಗೊಂಡವು.
ಭಾನುವಾರ ಬೆಳಗ್ಗೆ ಅಭಿಷೇಕ, ಹೋಮ, ಪೂಜೆ, ಮಕ್ಕಳ ಜವಳ, ಮುದ್ರೆ ಹಾಕುವ ಕಾರ್ಯಕ್ರಮ ನಡೆದು ಬೆಟ್ಟದ ಭೂತಪ್ಪ ದೇವರು ಹಾಗೂ ದಾಸಪ್ಪಗಳೊಂದಿಗೆ ಉತ್ಸವ ಮೂರ್ತಿಯನ್ನು ಶಂಖ, ಜಾಗಟೆಯ ಹಾಗೂ ಮಂಗಳ ವಾಧ್ಯಗಳೊಂದಿಗೆ ಭಕ್ತಸಮೂಹ ಗೋವಿಂದಾ ನಾಮಸ್ಮರಣೆ ಮಾಡುತ್ತ ಉತ್ಸವ ಮೂರ್ತಿಯ ಮೆರವಣಿಗೆಯನ್ನು ಬನ್ನಿ ಮಂಟಪದವರೆಗೆ ನಡೆಸಿ ದಾಸಯ್ಯ ಹಾಗೂ ಭೂತಪ್ಪ ದೇವರ ಮಣೆವು ಸೇವೆ ನೆಡೆದ ನಂತರ ಬಿಲ್ಲಿಗೆ ಭಾಣ ಹೂಡಿ ಅಂಬು ಕಡಿದು ನೆರೆದಿದ್ದ ಭಕ್ತರಿಗೆ ಬನ್ನಿಪತ್ರೆ ಪ್ರಸಾದವಾಗಿ ಹಂಚಲಾಯಿತು.
ಅರೆಹಳ್ಳಿ ಗ್ರಾಮದ ಶ್ರೀ ರುದ್ರೇಶ್ವರ ಸ್ವಾಮಿ, ಶ್ರೀ ತಿರುಮಲ ರಂಗನಾಥ ಸ್ವಾಮಿ, ಶ್ರೀ ಚೌಡಮ್ಮ ಮತ್ತು ಶ್ರೀ ಮಾತೆಂಗಮ್ಮ ದೇವಿಯ ಉತ್ಸವ ಮೂರ್ತಿಗಳನ್ನು ಹೊತ್ತ ಭಕ್ತರು ಗ್ರಾಮದ ಬೀದಿಗಳಲ್ಲಿ ಮೆರವಣಿಗೆ ಮೂಲಕ ಬನ್ನಿ ವೃಕ್ಷಕ್ಕೆ ತೆರಳಿ ಅರ್ಚಕರು, ಗ್ರಾಮದ ಹಿರಿಯರು ಬನ್ನಿ ವೃಕ್ಷಕ್ಕೆ ಪೂಜೆ ಸಲ್ಲಿಸಿ ಬನ್ನಿ ಮುಡಿದರು.
ಪಲವನಹಳ್ಳಿ ಗ್ರಾಮದಲ್ಲಿ ಶ್ರೀ ರಂಗನಾಥ ಸ್ವಾಮಿ, ಶ್ರೀ ಆಂಜನೇಯ ಸ್ವಾಮಿ, ಗಂಗಾಪರಮೇಶ್ವರಿ, ಸೇವಾಲಾಲ್‌ ಹಾಗೂ ಮರಿಯಮ್ಮ ದೇವರುಗಳ ಉತ್ಸವ ಮೂರ್ತಿಗಳನ್ನು ಅಲಂಕರಿಸಿ ಹೊತ್ತ ಭಕ್ತರು ಬನ್ನಿವೃಕ್ಷಕ್ಕೆ ತೆರಳಿ ಅಂಬು ಹೊಡೆದು ಬನ್ನಿ ಪೂಜಿಸಿದ ನಂತರ ಬನ್ನಿ ವಿತರಣೆ ಮಾಡಲಾಯಿತು.
-ಚಿತ್ರ: ಕಲ್ಬಿಗಿರಿ ಬೆಟ್ಟದ ಮೇಲಿರುವ ಶ್ರೀ ಲಕ್ಷ್ಮೀರಂಗನಾಥ ಸನ್ನಿಧಿಯಲ್ಲಿ ಸಕಲ ಭಕ್ತರು ಗೋವಿಂದ ನಾಮಸ್ಮರಣೆ ಮಾಡುತ್ತ ದೇವರುಗಳೊಂದಿಗೆ ಬನ್ನಿ ಸಂಭ್ರಮ ಆಚರಿಸಿದರು.