ಭೂ ತಾಯಿಗೆ ಪೂಜೆ ಸಲ್ಲಿಸಿ ಶೀಗೆ ಹುಣ್ಣಿಮೆ ಆಚರಣೆ

ಧಾರವಾಡ:

ತೀವ್ರ ಮಳೆ ಕೊರತೆಯಿಂದ ಇನ್ನೇನು ಬರ ಬೀಳಲಿದ್ದು ಶೀಗೆ ಹುಣ್ಣಿಮೆ ಆಚರಣೆ ಹೇಗೆ ಎಂದ ರೈತರಿಗೆ ಎರಡು ದಿನಗಳ ಹಿಂದೆ ಬಂದ ಮಳೆರಾಯನ ಆಗಮನದಿಂದ ಸೋಮವಾರ ಹಬ್ಬ ಕಳೆಗಟ್ಟಿತ್ತು.

ರೈತರು ತಮ್ಮ ಕುಟುಂಬದೊಂದಿಗೆ ಟ್ರ್ಯಾಕ್ಟರ್‌, ಚಕ್ಕಡಿ ಮೂಲಕ ತಮ್ಮ ತಮ್ಮ ಹೊಲಗಳಿಗೆ ಹೋಗಿ ಭೂಮಿ ತಾಯಿ ಪೂಜೆ ಮಾಡಿ ಚರಗಾ ಎಲ್ಲಿ ಹಬ್ಬವನ್ನು ಆಚರಿಸಿದರು. ಭೂಮಿ ತಾಯಿಯ ಸೀಮಂತ ಎಂದೇ ಕರೆಯುವ ಶೀಗೆ ಹುಣ್ಣಿಮೆಯ ಆಚರಣೆ ಉತ್ತರ ಕರ್ನಾಟಕದಲ್ಲಿ ಅದರಲ್ಲೂ ಧಾರವಾಡ ಭಾಗದಲ್ಲಿ ಸಂಭ್ರಮದಿಂದ ಜರುಗಿತು.

ತಾಲೂಕಿನ ಲಕಮಾಪೂರ, ಕಮಲಾಪೂರ, ಅಮ್ಮಿನಬಾವಿ, ಉಪ್ಪಿನ ಬೆಟಗೇರಿ, ನರೇಂದ್ರ, ಗರಗ, ಯಾದವಾಡ, ನಿಗದಿ, ದೇವರ ಹುಬ್ಬಳ್ಳಿ ಸೇರಿದಂತೆ ಗ್ರಾಮೀಣ ಭಾಗದಲ್ಲಿ ಕುಟುಂಬ ಸಮೇತ ಹಬ್ಬವನ್ನು ಆಚರಿಸಿದರು. ಈ ಸಂಭ್ರಮಕ್ಕೆ ಜೋಳದ ರೊಟ್ಟಿ, ಸಜ್ಜೆ ರೊಟ್ಟಿ, ಹುರಕ್ಕಿ ಹೋಳಿಗೆ, ವಿವಿಧ ಬಗೆಯ ಚಟ್ನಿ, ಪಲ್ಯ, ಹಪ್ಪಳ, ಸಂಡಿಗೆ, ಜೋಳದ ವಡೆ ಸೇರಿದಂತೆ ಹಲವು ಖಾದ್ಯಗಳು ಮತ್ತಷ್ಟು ಮರೆಗು ನೀಡಿದವು. ಮಕ್ಕಳು ಹೊಲದ ಬಯಲಿನಲ್ಲಿ ಗಾಳಿಪಟ ಹಾರಿಸಿ ಖುಷಿಪಟ್ಟರು.

ವಿಶೇಷ ಎಂದರೆ ಬರೀ ಗ್ರಾಮೀಣ ಜನರು ಮಾತ್ರವಲ್ಲದೇ ನಗರದ ಜನರು ಸಹ ಈ ಹಬ್ಬವನ್ನು ಆಚರಿಸಿದರು. ಕೆಲವರು ತಮ್ಮದೇ ತೋಟಗಳಿಗೆ ತೆರಳಿದರೆ, ಮತ್ತೆ ಕೆಲವರು ತಮ್ಮ ಸ್ನೇಹಿತರ, ಸಂಬಂಧಿಗಳ ಹೊಲಗಳಿಗೆ ಹೋಗಿ ಅವರೊಂದಿಗೆ ಹಬ್ಬ ಆಚರಿಸಿದರು. ಇನ್ನು ಕೆಲವರು ನಗರದ ಉದ್ಯಾನವನಗಳಿಗೆ ಹೋಗಿ ಕುಟುಂಬ ಸಮೇತ ಊಟ ಮಾಡಿ ಹಬ್ಬ ಆಚರಿಸಿದರು.

ಬೆಳೆ ಬೆಳೆಯಲು ಅವಕಾಶ ನೀಡಿದ ಭೂಮಿಗೆ ಕೃತಜ್ಞತೆ ಸಲ್ಲಿಸುವ ಜತೆಗೆ ಮುಂದಿನ ದಿನಗಳಲ್ಲಿಯೂ ಉತ್ತಮ ಮಳೆ, ಸಮೃದ್ಧ ಬೆಳೆ ಮತ್ತು ರೈತ ಕುಟುಂಬಗಳ ಸುಖ-ಸಮೃದ್ಧಿಗಾಗಿ ಪ್ರಾರ್ಥಿಸಲಾಗುತ್ತದೆ. ಶೀಗಿ ಹುಣ್ಣಿಮೆ ಕೇವಲ ಧಾರ್ಮಿಕ ಆಚರಣೆಯಲ್ಲ, ಕೃಷಿ, ಕುಟುಂಬ ಮತ್ತು ಪ್ರಕೃತಿಯ ನಡುವಿನ ಅವಿನಾಭಾವ ಸಂಬಂಧವನ್ನು ಸಾರುವ ಹಬ್ಬ. ಹೀಗಾಗಿ ಈ ಹಬ್ಬವನ್ನು ನಾವು ವಿಶೇಷವಾಗಿ ಆಚರಿಸುತ್ತೇವೆ ಎಂದು ಹಿರಿಯ ರೈತರಾದ ಮಡಿವಾಳಪ್ಪ ಹೇಳುತ್ತಾರೆ.