ಡೆಂಘೀಜ್ವರ ನಿರ್ಲಕ್ಷಿಸದೇ ಅಗತ್ಯ ಚಿಕಿತ್ಸೆ ಪಡೆಯಿರಿ
ಸಾರಾಂಶ
ಈಡಿಸ್ ಸೊಳ್ಳೆ ಕಡಿತದಿಂದ ಕಾಣಿಸಿಕೊಳ್ಳುವಂತಹ ಡೆಂಘೀಜ್ವರವನ್ನು ತ್ವರಿತವಾಗಿ ಪತ್ತೆ ಹಚ್ಚುವ ಜೊತೆಗೆ ಶೀಘ್ರ ಚಿಕಿತ್ಸೆ ಪಡೆಯಬೇಕು. ನಿರ್ಲಕ್ಷ್ಯ ಮಾಡಿದಲ್ಲಿ ಮಾರಣಾಂತಿಕವಾಗಬಹುದು ಎಂದು ಜೆ.ಜೆ.ಎಂ. ವೈದ್ಯಕೀಯ ಮಹಾವಿದ್ಯಾಲಯದ ಸೂಕ್ಷ್ಮ ಜೀವಶಾಸ್ತ್ರ ವಿಭಾಗದ ಮುಖ್ಯಸ್ಥೆ ಡಾ. ಎಂ.ಜಿ. ಉಷಾ ದಾವಣಗೆರೆಯಲ್ಲಿ ಹೇಳಿದ್ದಾರೆ.
- ವಿವೇಕ್ ಪೋಷಕರ ಆರೋಗ್ಯ ಕಾರ್ಯಾಗಾರದಲ್ಲಿ ಡಾ.ಉಷಾ ಉಪನ್ಯಾಸ - - - ಕನ್ನಡಪ್ರಭ ವಾರ್ತೆ, ದಾವಣಗೆರೆ
ನಗರದ ಬಾಪೂಜಿ ಮಕ್ಕಳ ಆರೋಗ್ಯ ಸಂಸ್ಥೆ ಮತ್ತು ಸಂಶೋಧನಾ ಕೇಂದ್ರದಲ್ಲಿ ವಿವೇಕ್ ಪೋಷಕರ ಆರೋಗ್ಯ ಕಾರ್ಯಾಗಾರದಲ್ಲಿ "ಡೆಂಘೀಜ್ವರ- ಮರೆತರೆ ಮಾರಣಾಂತಿಕವಾಗಬಹುದು, ಮುಂಜಾಗ್ರತೆಯಿರಲಿ " ವಿಷಯ ಕುರಿತು ಅವರು ಉಪನ್ಯಾಸ ನೀಡಿದರು. ಡೆಂಘೀಜ್ವರಕ್ಕೆ ಮುಂಜಾಗ್ರತೆಯೇ ಸೂಕ್ತ ಮದ್ದು ಎಂದರು.
ಚೆನ್ನೈನಲ್ಲಿ ಕಾಣಿಸಿತ್ತು:ಡೆಂಘೀ ಪ್ರಪಂಚದಾದ್ಯಂತ 100ಕ್ಕೂ ಹೆಚ್ಚು ರಾಷ್ಟ್ರಗಳಲ್ಲಿ ಕಾಣಿಸಿಕೊಂಡಿದೆ. 1970ಕ್ಕೂ ಮೊದಲು ತೀವ್ರ ಡೆಂಘೀಜ್ವರ ಕೇವಲ 9 ದೇಶಗಳಲ್ಲಿ ಸಾಂಕ್ರಾಮಿಕ ರೋಗವಾಗಿತ್ತು. ಈಗ 100ಕ್ಕೂ ಹೆಚ್ಚು ದೇಶಗಳಲ್ಲಿ ಸ್ಥಳೀಯವಾಗಿದೆ. ಭಾರತದಲ್ಲಿ ಡೆಂಘೀ ತರಹದ ಮೊದಲ ಪ್ರಕರಣ 1780ರಲ್ಲಿ ಈಗಿನ ಚೆನ್ನೈನಲ್ಲಿ ಕಾಣಿಸಿಕೊಂಡಿತ್ತು. ಆದರೂ ವೈರಾಣು ದೃಢಪಟ್ಟ ಮೊದಲ ಸಾಂಕ್ರಾಮಿಕ ಪ್ರಕರಣ 1963 -64 ರಲ್ಲಿ ದಾಖಲಾಗಿದೆ. ಭಾರತದಲ್ಲಿ ಡೆಂಘೀಜ್ವರ ಇಂದಿಗೂ ಸಾರ್ವಜನಿಕ ಆರೋಗ್ಯ ಸಮಸ್ಯೆಯಾಗಿ ಕಾಡುತ್ತಿದೆ ಎಂದು ತಿಳಿಸಿದರು.
ಗರ್ಭಿಣಿಯಿಂದ ಮಗುವಿಗೆ ರೋಗ ಪ್ರಸರಣದ ಸಾಧ್ಯತೆ ಬಗ್ಗೆ ಪುರಾವೆಗಳಿವೆ. ಗರ್ಭಿಣಿ ಸೋಂಕು ಹೊಂದಿದ್ದರೆ, ಮಗು ಅವಧಿಪೂರ್ವ ಜನನ, ಕಡಿಮೆ ಜನನ ತೂಕ ಮತ್ತು ಭ್ರೂಣದ ತೊಂದರೆಯಿಂದ ಬಳಲಬಹುದು. ರಕ್ತದಾನ, ಅಂಗಾಂಗ ದಾನ ಮೂಲಕ ರೋಗ ಹರಡಿದ ಅಪರೂಪದ ಪ್ರಕರಣಗಳು ದಾಖಲಾಗಿವೆ ಎಂದರು.
ಮುಂಜಾಗ್ರತೆ:
ಡೆಂಘೀಜ್ವರ ಪೀಡಿತರು ಹೆಚ್ಚು ವಿಶ್ರಾಂತಿ, ಯಥೇಚ್ಛವಾಗಿ ದ್ರವಹಾರ ಸೇವನೆ, ವೈದ್ಯರ ಸಲಹೆಯಂತೆ ಔಷಧ ಬಳಕೆ, ವೈದ್ಯರ ಸಲಹೆ ಇಲ್ಲದೇ ಸ್ವಯಂ ಚಿಕಿತ್ಸೆ ಮಾಡಿಕೊಳ್ಳಬಾರದು. ಸತ್ವಭರಿತ ಆಹಾರ ಸೇವನೆ. ಪರಿಸರದ ನೈರ್ಮಲ್ಯತೆ ಕಾಪಾಡಿಕೊಳ್ಳಬೇಕು. ರೋಗ ಬಂದ ಮೇಲೆ ಚಿಕಿತ್ಸೆ ನೀಡುವುದಕ್ಕಿಂತ ರೋಗ ಬಾರದಂತೆ ಮುಂಜಾಗ್ರತೆ ವಹಿಸುವುದು ಉತ್ತಮ. ಸಣ್ಣ ನಿರ್ಲಕ್ಷತೆ ಮನೆ ಮಂದಿಯೆಲ್ಲ ನರಳುವಂತೆ ಮಾಡಬಹುದು ಎಂದು ತಿಳಿಸಿದರು.
- - -
- ಡಾ. ಎಂ.ಜಿ. ಉಷಾ, ಮುಖ್ಯಸ್ಥೆ, ಸೂಕ್ಷ್ಮ ಜೀವಶಾಸ್ತ್ರ ವಿಭಾಗ
ದಾವಣಗೆರೆಯಲ್ಲಿ ಡಾ.ಉಷಾ ಅವರು "ಡೆಂಘೀಜ್ವರ- ಮರೆತರೆ ಮಾರಣಾಂತಿಕವಾಗಬಹುದು, ಮುಂಜಾಗ್ರತೆಯಿರಲಿ " ವಿಷಯ ಕುರಿತು ಉಪನ್ಯಾಸ ನೀಡಿದರು.