ರೋಣದಲ್ಲೊಬ್ಬ ಅಪರೂಪದ ಶ್ರಮಜೀವಿ ದುರ್ಗಪ್ಪಜ್ಜ
ಸಾರಾಂಶ
ಕಾಯಕವೇ ಕೈಲಾಸ ಎನ್ನುವ ಶರಣರ ವಚನ ಪಠಿಸುವುದು ಸುಲಭ. ಅದನ್ನು ಬದುಕಲ್ಲಿ ಅಳವಡಿಸಿಕೊಳ್ಳುವುದು ನಿಜಕ್ಕೂ ಸವಾಲಿನ ಕೆಲಸ. ಇಂತಹ ಸವಾಲನ್ನು ತಮ್ಮ 77ನೇ ವಯಸ್ಸಿನಲ್ಲೂ ನಗುತ್ತಲೇ ಸ್ವೀಕರಿಸಿ, ಸ್ವಾವಲಂಬನೆಯ ದಾರಿಯಲ್ಲಿ ಹೆಜ್ಜೆ ಹಾಕುತ್ತಿರುವ ಅಪರೂಪದ ಶ್ರಮಜೀವಿ ಪಟ್ಟಣದ 9ನೇ ವಾರ್ಡ್‌ನ ನಿವಾಸಿ ದುರ್ಗಪ್ಪ ಹಿರೇಮನಿ.
77 ವಯಸ್ಸಲ್ಲೂ ಸ್ವಾವಲಂಬನೆ ಬದುಕು ಸಾಗಿಸುತ್ತಿರುವ ಮಾದರಿ ವೃದ್ಧ
ಪಿ.ಎಸ್. ಪಾಟೀಲ
ಕನ್ನಡಪ್ರಭ ವಾರ್ತೆ ರೋಣಕಾಯಕವೇ ಕೈಲಾಸ ಎನ್ನುವ ಶರಣರ ವಚನ ಪಠಿಸುವುದು ಸುಲಭ. ಅದನ್ನು ಬದುಕಲ್ಲಿ ಅಳವಡಿಸಿಕೊಳ್ಳುವುದು ನಿಜಕ್ಕೂ ಸವಾಲಿನ ಕೆಲಸ. ಇಂತಹ ಸವಾಲನ್ನು ತಮ್ಮ 77ನೇ ವಯಸ್ಸಿನಲ್ಲೂ ನಗುತ್ತಲೇ ಸ್ವೀಕರಿಸಿ, ಸ್ವಾವಲಂಬನೆಯ ದಾರಿಯಲ್ಲಿ ಹೆಜ್ಜೆ ಹಾಕುತ್ತಿರುವ ಅಪರೂಪದ ಶ್ರಮಜೀವಿ ಪಟ್ಟಣದ 9ನೇ ವಾರ್ಡ್‌ನ ನಿವಾಸಿ ದುರ್ಗಪ್ಪ ಹಿರೇಮನಿ.
ಸಾಣೆ ದುರ್ಗಪ್ಪಜ್ಜ:
ಅಡುಗೆ ಮನೆಯಲ್ಲಿ ಬಳಸುವ ಚಾಕು, ಚೂರಿ, ತರಕಾರಿ ಕತ್ತರಿಸುವ ಸಾಧನ, ಅಡಿಕೆ ಕತ್ತರಿ, ಕೃಷಿಕರು ಬಳಸುವ ಪಡಚಾ, ಕೊಡಲಿ ಹಾಗೂ ತೋಟಗಾರಿಕೆಯ ಕತ್ತರಿಗಳನ್ನು ಅತ್ಯಂತ ನೈಪುಣ್ಯತೆಯಿಂದ ಚೂಪು ಮಾಡಿ ಕೊಡುತ್ತಾನೆ. ಸೈಕಲ್ ಚಕ್ರಕ್ಕೆ ಸಾಣಿ ಕಲ್ಲನ್ನು ಬೆಲ್ಟ್‌ನಿಂದ ಜೋಡಿಸಿ, ಪೆಡ್ಲ್ ತುಳಿಯುತ್ತಾ ಮೊಣಚಾದ ವಸ್ತುಗಳನ್ನು ಚುಪಾಗಿಸುವ ಕಲಾತ್ಮಕತೆ ನೋಡುಗರನ್ನು ಚಕಿತರನ್ನಾಗಿಸುತ್ತದೆ.
ಪಟ್ಟಣ ಮತ್ತು ಸಮೀಪದ ಹಳ್ಳಿಗಳಾದ ಬಾಸಲಾಪುರ, ಕೃಷ್ಣಾಪುರ, ಹಿರೇಮಣ್ಣೂರ, ಚಿಕ್ಕಮಣ್ಣೂರ, ಸಂದಿಗವಾಡ, ಅರಹುಣಸಿ, ಇಟಗಿ, ಆಬ್ಬಿಗೇರಿ, ಕೊತಬಾಳ, ಹಿರೇಹಾಳ, ಮುಗಳಿ, ಸವಡಿ ಮುಂತಾದೆಡೆ ಸೈಕಲ್ ಮೇಲೆಯೇ ಪ್ರಯಾಣಿಸುತ್ತಾರೆ.
ಇಂದಿನ ದಿನಗಳಲ್ಲಿ ಸಣ್ಣಪುಟ್ಟ ಕಷ್ಟಗಳಿಗೇ ಧೃತಿಗೆಡುವ ಅಥವಾ ಕೆಲಸವಿಲ್ಲವೆಂದು ನಿರುದ್ಯೋಗದ ನೆಪ ಹೇಳುವ ಯುವಜನತೆಗೆ ದುರ್ಗಪ್ಪನವರ ಬದುಕು ಒಂದು ತೆರೆದ ಪುಸ್ತಕ. ಇವರ ಬದುಕೇ ಮಾದರಿ. ಯಾವುದೇ ಕೆಲಸ ಸಣ್ಣದಲ್ಲ, ಪ್ರಾಮಾಣಿಕತೆಯಿಂದ ಮಾಡುವ ಪ್ರತಿಯೊಂದು ಕಾಯಕವೂ ಪೂಜನೀಯ ಎಂಬುದಕ್ಕೆ ಇವರೇ ಉದಾಹರಣೆ.ದೇಹದಲ್ಲಿ ಉಸಿರಿರುವವರೆಗೆ, ಕೈಕಾಲುಗಳು ಗಟ್ಟಿಯಾಗಿ ಇರುವವರೆಗೆ ಯಾರ ಮುಂದೆಯೂ ಕೈಚಾಚಬಾರದು, ನನ್ನ ಶ್ರಮದಿಂದಲೇ ನಾನು ಬದುಕಬೇಕು. ಮಕ್ಕಳು ಅಥವಾ ಸಮಾಜಕ್ಕೆ ಹೊರೆಯಾಗುವುದು ನನಗೆ ಇಷ್ಟವಿಲ್ಲ. ನನ್ನ ಕೈ ಕಾಲಲ್ಲಿ ಶಕ್ತಿ ಇರುವ ತನಕವೂ ಈ ಉದ್ಯೋಗ ನಿಲ್ಲಿಸುವುದಿಲ್ಲ ಎನ್ನುತ್ತಾರೆ ದುರ್ಗಪ್ಪ ಹಿರೇಮನಿ.