- ಕೆಎಫ್ಡಿಯಿಂದಾಗಿ 65 ವರ್ಷದ ಮಹಿಳೆ ಸಾವು
ಮಂಗನ ಕಾಯಿಲೆ (ಕೆಎಫ್ಡಿ)ಯಿಂದ ಗಂಭೀರ ಸ್ಥಿತಿಯಲ್ಲಿದ್ದ ತಾಲೂಕಿನ ಕೊರ್ಲಕೈ ಪ್ರಾಥಮಿಕ ಆರೋಗ್ಯ ಕೇಂದ್ರದ ವ್ಯಾಪ್ತಿಯ ಜಿಡ್ಡಿಯ ೬೫ ವರ್ಷದ ಮಹಿಳೆ ಸೋಮವಾರ ರಾತ್ರಿ ಮೃತಪಟ್ಟಿದ್ದಾಗಿ ತಿಳಿದು ಬಂದಿದೆ. ಇದರೊಂದಿಗೆ ಮಂಗನ ಕಾಯಿಲೆ ಈ ಬಾರಿ ಮೊದಲ ಬಲಿ ಪಡೆದುಕೊಂಡಿದೆ.
ಕಾಯಿಲೆಯಿಂದ ಬಳಲುತ್ತಿದ್ದ ಇವರನ್ನು ಉಡುಪಿಯ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ನಂತರ ಮನೆಗೆ ಕರತರಲಾಗಿತ್ತು. ಕಾಯಿಲೆ ಉಲ್ಬಣಗೊಂಡು ಮೃತಪಟ್ಟಿದ್ದಾರೆ. ಈವರೆಗೆ ತಾಲೂಕಿನಲ್ಲಿ ೪೩ ಮಂಗನ ಕಾಯಿಲೆ ಶಂಕಿತ ಪ್ರಕರಣಗಳು ದಾಖಲಾಗಿದ್ದು, ಈ ವರ್ಷ ಈ ಕಾಯಿಲೆಯಿಂದ ಮೃತಪಟ್ಟ ಮೊದಲ ಪ್ರಕರಣ ಇದಾಗಿದೆ. ಜಿಲ್ಲೆಯಲ್ಲಿ ಸಿದ್ದಾಪುರ ತಾಲೂಕಿನಲ್ಲಿ ಮಾತ್ರ ಮಂಗನ ಕಾಯಿಲೆ ಪ್ರಕರಣ ಕಂಡುಬಂದಿದ್ದು ತಾಲೂಕಿನ ಜನತೆಗೆ ಭಯ ಹುಟ್ಟಿಸಿದೆ.ತಾಲೂಕಿನಲ್ಲಿ ಈವರೆಗೆ ಮೂರು ಮಂಗಗಳು ಸತ್ತಿರುವ ಬಗ್ಗೆ ಅನಧಿಕೃತವಾಗಿ ತಿಳಿದುಬಂದಿದ್ದು, ಈ ಕುರಿತು ಸಂಬಂಧಿಸಿದ ಇಲಾಖೆಯ ಅಧಿಕಾರಿಗಳು ಮಾಹಿತಿ ನೀಡುತ್ತಿಲ್ಲ. ಅಲ್ಲದೇ ಮಂಗನ ಕಾಯಿಲೆಯಿಂದ ಮೃತಪಟ್ಟ ಕುರಿತಾದ ವಿವರಗಳನ್ನು ರಾಜ್ಯಮಟ್ಟದ ಅಧಿಕಾರಿಗಳು ಮಾತ್ರ ನೀಡುವ ಆದೇಶವಿದೆ ಎನ್ನುವ ಉತ್ತರ ಅವರಿಂದ ದೊರೆಯುತ್ತಿದೆ. ಮಂಗನ ಕಾಯಿಲೆಗೆ ನೀಡುತ್ತಿದ್ದ ಲಸಿಕೆಯನ್ನು ೨ ವರ್ಷದ ಹಿಂದೆ ನಿಲ್ಲಿಸಿದ್ದು, ಯಾವುದೇ ಪರ್ಯಾಯ ಲಸಿಕೆಯನ್ನು ಸರ್ಕಾರ ಸೂಚಿಸಿಲ್ಲ. ಇದು ಕೂಡ ಜನತೆಯ ಆತಂಕಕ್ಕೆ ಕಾರಣವಾಗಿದೆ.