23ಕ್ಕೆ ಗೌಳಿ, ಮಲೆಗೌಡ, ಲಿಂಗಾಯತ ಮೀಸಲಾತಿ ಸಂಕಲ್ಪ ಸಭೆ

ಮುಂಡಗೋಡ: ಲಿಂಗಾಯತ ಪಂಚಮಸಾಲಿ, ಮಲೆಗೌಡರು, ಗೌಳಿ ಲಿಂಗಾಯತ ಸೇರಿ ಸರ್ವ ಲಿಂಗಾಯತ ಒಳಪಂಗಡಗಳ ಮಕ್ಕಳ ಶಿಕ್ಷಣ ಹಾಗೂ ವಿದ್ಯಾರ್ಥಿಗಳ ಉದ್ಯೋಗಕ್ಕೋಸ್ಕರ ಹಿಂದುಳಿದ ವರ್ಗ ಅ ಮೀಸಲಾತಿ ಬೇಕೆಂಬ ಉದ್ದೇಶದಿಂದ ನಿರಂತರ ಹೋರಾಟ ಮಾಡುತ್ತಾ ಬರಲಾಗುತ್ತಿದೆ. ಮುಂದಿನ ದಿನಗಳಲ್ಲಿ ಈ ಹೋರಾಟವನ್ನು ಮತ್ತಷ್ಟು ತೀವ್ರಗೊಳಿಸಲಾಗುವುದು ಎಂದು ಕೂಡಲಸಂಗಮ ಪೀಠದ ಬಸವಜಯ ಮೃತ್ಯುಂಜಯ ಸ್ವಾಮೀಜಿ ಹೇಳಿದರು.ಗುರುವಾರ ಸಂಜೆ ಪಟ್ಟಣಕ್ಕೆ ಭೇಟಿ ನೀಡಿದ ಅವರು, ಮುಂಡಗೋಡ ತಾಲೂಕು ಪಂಚಮಸಾಲಿ, ಮಲೆಗೌಡ ಹಾಗೂ ಲಿಂಗಾಯತ ಒಳಪಂಗಡಗಳ ಪದಾಧಿಕಾರಿಗಳ ಪೂರ್ವಭಾವಿ ಸಭೆಯ ದಿವ್ಯ ಸಾನ್ನಿಧ್ಯ ವಹಿಸಿ ಮಾತನಾಡಿದರು.

ಈ ಸಂದರ್ಭದಲ್ಲಿ ಮಾಜಿ ಶಾಸಕರಾದ ವಿ.ಎಸ್. ಪಾಟೀಲ್, ಬಾಬುಗೌಡ ಪಾಟೀಲ್ ವದ್ದಲ ಬನವಾಸಿ, ತಾಲೂಕಾ ವೀರಶೈವ ಲಿಂಗಾಯತ ಮಹಾಘಟಕದ ಅಧ್ಯಕ್ಷ ಬಸವರಾಜ ಪಾಟೀಲ್, ಬಿ.ಎಮ್.ಕೋಟಿ, ರಾಜು ಕುಟ್ರಿ, ಫಕ್ಕೀರಪ್ಪ ಗೌಳಿ, ರಾಮಣ್ಣ ಕುನ್ನೂರ, ಕೆಂಜೋಡಿ ಗಲಬಿ, ಬಸಪ್ಪ ಗಲಬಿ, ನಿಡಗುಂದಿ ಮುಂತಾದವರಿದ್ದರು.