ನಸುಕಿನಲ್ಲಿ ಭಾರೀ ಮಳೆ: ಜನಜೀವನ ಅಸ್ತವ್ಯಸ್ತ
)
ಸಾರಾಂಶ
ಬಿಸಿಲ ಹೊಡೆತಕ್ಕೆ ತತ್ತರಿಸಿದ್ದ ದಾವಣಗೆರೆ ನಗರ, ಜಿಲ್ಲೆಯ ವಿವಿಧೆಗೆ ಶುಕ್ರವಾರ ನಸುಕಿನ ವೇಳೆ ಸುರಿದ ಭಾರೀ ಮಳೆಯಿಂದಾಗಿ ಜನಜೀವನ ಅಸ್ತವ್ಯಸ್ತವಾಗಿದ್ದು, ಬೆಳೆಗಳು, ತೋಟದ ಬೆಳೆಗಳು, ಮನೆಗಳು ಹಾನಿಗೀಡಾದ ಬಗ್ಗೆ ವರದಿಯಾಗುತ್ತಿದೆ.
- ಮಾಗಾನಹಳ್ಳಿ ಸುತ್ತಮುತ್ತ ಬತ್ತದ ಬೆಳೆ ಹಾನಿ । ತಗ್ಗುಪ್ರದೇಶ, ಹೊಸ ಬಡಾವಣೆಗಳ ನಿವಾಸಿಗಳ ಮುಂದುವರಿದ ಪರದಾಟ
ಕನ್ನಡಪ್ರಭ ವಾರ್ತೆ ದಾವಣಗೆರೆ
ಬಿಸಿಲ ಹೊಡೆತಕ್ಕೆ ತತ್ತರಿಸಿದ್ದ ದಾವಣಗೆರೆ ನಗರ, ಜಿಲ್ಲೆಯ ವಿವಿಧೆಗೆ ಶುಕ್ರವಾರ ನಸುಕಿನ ವೇಳೆ ಸುರಿದ ಭಾರೀ ಮಳೆಯಿಂದಾಗಿ ಜನಜೀವನ ಅಸ್ತವ್ಯಸ್ತವಾಗಿದ್ದು, ಬೆಳೆಗಳು, ತೋಟದ ಬೆಳೆಗಳು, ಮನೆಗಳು ಹಾನಿಗೀಡಾದ ಬಗ್ಗೆ ವರದಿಯಾಗುತ್ತಿದೆ.ತಾಲೂಕಿನ ಮಾಗಾನಹಳ್ಳಿ, ಅಮೃತ ನಗರ ಭಾಗದಲ್ಲಿ ಮಳೆಯಿಂದಾಗಿ ಸುಮಾರು 60-65 ಎಕರೆ ಪ್ರದೇಶದಲ್ಲಿ ಕೊಯ್ಲಿಗೆ ಬಂದಿದ್ದ ಬತ್ತದ ಬೆಳೆ ನೆಲಕ್ಕೆ ಹತ್ತಿದ್ದು, ಕೈಗೆ ಬಂದ ತುತ್ತು ಬಾಯಿಗೆ ಬರಲಿಲ್ಲವೆಂಬ ನೋವು, ಸಂಕಟದಲ್ಲಿ ಅನ್ನದಾತರಿದ್ದಾರೆ.
ಆರು ತಿಂಗಳ ಕಾಲ ಕಷ್ಟಪಟ್ಟು, ಸಾಲ ಸೋಲ ಮಾಡಿ, ಬೆವರು ಸುರಿಸಿ ಬೆಳೆದಿದ್ದ ಬತ್ತದ ಬೆಳೆ ಕೈಗೆ ಬಂದಿದೆ, ಇನ್ನೇನು ಕಟಾವು ಮಾಡಿ, ಮಾಡಿದ ಸಾಲ ತೀರಿಸಿಕೊಂಡು, ನೆಮ್ಮದಿಯಾಗಿ ಇರೋಣ ಅಂದುಕೊಂಡಿದ್ದ ರೈತರು ಈಗ ಕಣ್ಣೀರಿನಲ್ಲಿ ಕೈತೊಳೆಯುವಂತೆ ಮಳೆ ಸಂಕಷ್ಟ ತಂದೊಡ್ಡಿದೆ. ಕಟಾವಿಗೆ ಬಂದಿದ್ದ ಬೆಳೆ ಮಳೆ ಹೊಡೆತಕ್ಕೆ ಕಾಳು ಉದುರಿಸಿ, ಎಕರೆಗೆ ಐದಾರು ಚೀಲ ಬತ್ತ ಕೈಗೆ ಬಂದರೆ ಅದೇ ಹೆಚ್ಚು ಎನ್ನುವ ಸ್ಥಿತಿ ಇದೆ. ರಾಜ್ಯ ಸರ್ಕಾರ ಬೆಳೆ ಕಳೆದುಕೊಂಡ ರೈತರಿಗೆ ಸೂಕ್ತ ಪರಿಹಾರ ನೀಡಿ, ಕೈ ಹಿಡಿಯಲಿ ಎಂದು ರೈತರು ಒತ್ತಾಯಿಸುತ್ತಾರೆ.
ನಾಲ್ಕೈದು ದಿನಗಳ ಮುಂಚಿನವರೆಗೆ ಕಾದ ಕಾವಲಿಯಂತೆ ಝಳ ಆವರಿಸಿದ್ದ ಭೂರಮೆ ತಣಿಯುವಂತೆ ಸತತವಾಗಿ ಮಳೆಯಾಗಿ ವಾತಾವರಣ ತಂಪಾಗುವಂತಾಗಿದೆ. ಶುಕ್ರವಾರ ನಸುಕಿನಲ್ಲಿ ಶುರುವಾದ ಮಳೆಯಿಂದ ಜಿಲ್ಲಾ ಕೇಂದ್ರದ ತಗ್ಗು ಪ್ರದೇಶ, ಹೊಸ ಬಡಾವಣೆಗಳು, ಮೂಲ ಸೌಕರ್ಯಗಳಿಲ್ಲದ ಪ್ರದೇಶಗಳ ಜನರನ್ನು ಕಂಗಾಲುಗೊಳಿಸಿತ್ತು. ರಸ್ತೆ, ಚರಂಡಿ ಇಲ್ಲದಂತಹ ಖಾಸಗಿ ಬಡಾವಣೆ, ಹೊಸ ಬಡಾವಣೆಗಳಲ್ಲಿ ಕೆಸರು ಗುಂಡಿಗಳುಂಟಾಗಿದ್ದು, ಜನರು, ದ್ವಿಚಕ್ರ ವಾಹನ ಚಾಲಕರು, ಸವಾರರು ಪರದಾಡುವಂತಾಯಿತು.
ತಗ್ಗು ಪ್ರದೇಶದಲ್ಲಿನ ರಸ್ತೆಗಳು ಜಲಾವೃತವಾಗಿದ್ದರಿಂದ ಸಂಚರಿಸಲು ವಾಹನ ಸವಾರರು ಪರದಾಡಿದರು. ಶುಕ್ರವಾರ ಇಡೀ ದಿನ ದಟ್ಟಮೋಡಗಳು ಆವರಿಸಿದ್ದು, ಮತ್ತೆ ರಾತ್ರಿ ಅಥವಾ ನಸುಕಿನಲ್ಲಿ ಮಳೆಯಾಗುವ ಆತಂಕದಲ್ಲೇ ಜನ ರಾತ್ರಿ ಕಳೆಯುವಂತಾಗಿದೆ. ಅತ್ತ ನ್ಯಾಮತಿ, ಮಲೇಬೆನ್ನೂರು, ಸಂತೇಬೆನ್ನೂರು ಭಾಗದಲ್ಲೂ ಬೆಳಗ್ಗೆ 6 ಗಂಟೆಯಿಂದ ಗುಡುಗು ಸಿಡಿಲು ಸಹಿತ ವರುಣ ಆರ್ಭಟಿಸಿದ್ದಾನೆ.
(ಬಾಕ್ಸ್-1)
- - -
* ಬೆಳೆ ಹಾನಿ ಸಂಕಟ ಮಧ್ಯೆ ಮುಂಗಾರು ಕೃಷಿಯ ಖುಷಿ ಕೆಲ ದಿನಗಳಿಂದ ಸುರಿಯುತ್ತಿರುವ ಮಳೆಯು ಮುಂಗಾರು ಹಂಗಾಮಿನ ಕೃಷಿ ಚಟುವಟಿಕೆಗೆ ಜೀವ ತುಂಬಿದ್ದರೆ, ಮತ್ತೆ ಕೆಲವು ಕಡೆ ಕಟಾವಿಗೆ ಬಂದಿದ್ದ ಬತ್ತದ ಬೆಳೆ ಸಂಪೂರ್ಣ ನಾಶವಾಗಿದೆ. ಅಡಕೆ ಮರಗಳು, ತೆಂಗಿನ ಮರಗಳು ಧರೆಗುರುಳುತ್ತಿವೆ. ಬೆಳೆಗಳು, ತೋಟದ ಬೆಳೆಗಳು ಹಾನಿಗೀಡಾಗುತ್ತಿವೆ. ಅಪಾರ ಪ್ರಮಾಣದ ತೋಟದ ಬೆಳೆಗಳ ಹಾನಿಗೂ ಮಳೆ, ಗಾಳಿಯು ಕಾರಣವಾಗಿದೆ ಎನ್ನುತ್ತಾರೆ ರೈತರು. ಜಿಲ್ಲೆಯಲ್ಲಿ ರೈತರು ಮುಂಗಾರು ಹಂಗಾಮಿನ ಬಿತ್ತನೆಗೆ ಹೊಲಗಳನ್ನು ಸಜ್ಜುಗೊಳಿಸುತ್ತಿದ್ದಾರೆ. ಒಂದು ಕಡೆ ರೈತರು ಖುಷಿಯಾಗಿದ್ದರೆ, ಮತ್ತೊಂದು ಕಡೆ ಬೆಳೆ ಹಾನಿಗೊಳಗಾದ ರೈತರ ಮುಖದಲ್ಲಿ ನೋವು, ಸಂಕಷ್ಟದ ಗೆರೆ ಮೂಡಿವೆ.
- - -(-ಫೋಟೋಗಳಿವೆ)