11 ಗಂಟೆ ಸದನ ನಡೆಸಿ ದಾಖಲೆ ಬರೆದ ಹೊರಟ್ಟಿ

ಬೆಳಗಾವಿ:

ಇತ್ತೀಚೆಗಷ್ಟೆ 45 ವರ್ಷಗಳ ಕಾಲ ಸತತ ಕರ್ನಾಟಕ ವಿಧಾನ ಪರಿಷತ್ತಿನ ಸದಸ್ಯರಾಗಿ ವಿಶ್ವದಾಖಲೆ ಬರೆದ ಸಭಾಪತಿ ಬಸವರಾಜ ಹೊರಟ್ಟಿ ಅವರು ಬೆಳಗಾವಿ ಸುವರ್ಣ ವಿಧಾನಸೌಧದಲ್ಲಿ ನಡೆದ ಚಳಿಗಾಲದ ಅಧಿವೇಶನದ ಕೊನೆಯ ದಿನವಾದ ಶುಕ್ರವಾರ ನಿರಂತರ 11.10 ಗಂಟೆ ಸದನ ನಡೆಸುವ ಮೂಲಕ ಮತ್ತೊಂದು ದಾಖಲೆ ನಿರ್ಮಿಸಿದ್ದಾರೆ.

ಅಧಿವೇಶನದ ಕೊನೆಯ ದಿನವಾದ ಶುಕ್ರವಾರ ಬೆಳಗ್ಗೆ 10.15ಕ್ಕೆ ಸದನ ಆರಂಭಿಸಿದ ಸಭಾಪತಿ ಬಸವರಾಜ ಹೊರಟ್ಟಿ, ರಾತ್ರಿ 11 ಗಂಟೆಗೆ ಸದನವನ್ನು ಅನಿರ್ದಿಷ್ಟಾವಧಿಗೆ ಮುಂದೂಡಿದರು. ಈ ಮಧ್ಯೆ ಮಧ್ಯಾಹ್ನ ಊಟಕ್ಕೆ 1 ಗಂಟೆ ಬಿಡುವು, ಒಮ್ಮೆ 10 ನಿಮಿಷ ವಿಶ್ರಾಂತಿ ಮಾಡಿದ್ದು ಬಿಟ್ಟರೆ, ಉಳಿದ ಸುದೀರ್ಘ ಅವಧಿ ಸಭಾಪತಿ ಸ್ಥಾನದಲ್ಲಿ ಕುಳಿತು ಸದನ ನಡೆಸಿದ್ದು ಹೊಸ ದಾಖಲೆಯಾಗಿದೆ.

ಹಿಂದೆ ಬೆಂಗಳೂರು ವಿಧಾನಸೌಧದಲ್ಲಿ ನಡೆದ ಅಧಿವೇಶನದಲ್ಲಿ ರಾಷ್ಟ್ರೀಯ ಶಿಕ್ಷಣ ನೀತಿ ಕುರಿತ ಚರ್ಚೆ ಮೇಲ್ಮನೆಯಲ್ಲಿ ನಡೆದಾಗ ಸತತ 7 ಗಂಟೆ ಹೊರಟ್ಟಿ ಸದನ ಸಡೆಸಿದ್ದರು. ಇದೇ ಅಧಿವೇಶನದ ಎರಡನೇ ವಾರದ ಬುಧವಾರವೂ ಕೆಲವು ವಿಧೇಯಕಗಳು ಮಂಡನೆಯಾದಾಗಲೂ ಸತತ 6.30 ಗಂಟೆ ಸದನ ನಡೆಸಿದ್ದಾರೆ. 7 ಗಂಟೆ ಕುಳಿತ ಸಿಎಂ:

ಅಧಿವೇಶನದ ಕೊನೆಯ ದಿನವಾದ ಶುಕ್ರವಾರ ಮುಖ್ಯಮಂತ್ರಿ ಸಿದ್ದರಾಮ ಅವರು ಕೂಡ 7 ಗಂಟೆ ಮೇಲ್ಮನೆಯಲ್ಲಿ ಇದ್ದು, ಸರ್ಕಾರದ ಪರವಾಗಿ ಸದನಕ್ಕೆ ಉತ್ತರಿಸಿದರು. ಹಲವು ವಿಷಯಗಳ ಚರ್ಚೆಯಲ್ಲಿ ಭಾಗವಹಿಸಿದ್ದರು. ಏಕಕಾಲಕ್ಕೆ ಸಭಾಪತಿ ಮತ್ತು ಮುಖ್ಯಮಂತ್ರಿ ಸುದೀರ್ಘ ಅವಧಿ ಮೇಲ್ಮನೆಯ ಕಲಾಪದಲ್ಲಿ ಭಾಗಿಯಾಗಿದ್ದು ಕೂಡ ಹೊಸ ದಾಖಲೆಯಾಗಿದೆ.