ಶಾಸ್ತ್ರೀಯ ಸ್ಥಾನ ಸಿಕ್ಕರೂ ಕನ್ನಡಕ್ಕೆ ಗಂಡಾಂತರ

ಧಾರವಾಡ:

ಕನ್ನಡಕ್ಕೆ ಶಾಸ್ತ್ರೀಯ ಸ್ಥಾನಮಾನ ಸಿಕ್ಕರೂ ಕನ್ನಡ ಭಾಷೆ ಇನ್ನು ಗಂಡಾಂತರದಲ್ಲಿದೆ ಎಂದು ಸಾಹಿತಿ ಡಾ. ಸದಾಶಿವ ಮರ್ಜಿ ಹೇಳಿದರು.

ಕರ್ನಾಟಕ ವಿದ್ಯಾವರ್ಧಕ ಸಂಘದ 137ನೇ ಸಂಸ್ಥಾಪನಾ ದಿನಾಚರಣೆಯಲ್ಲಿ ಸಂಘದ ಹಿರಿಯ ಸದಸ್ಯರಿಗೆ ಸನ್ಮಾನ’ ಹಾಗೂ `ಓ ಮನಸೆ’ ನಾಟಕ ಪ್ರದರ್ಶನಕ್ಕೆ ಚಾಲನೆ ನೀಡಿ ಮಾತನಾಡಿದ ಅವರು, ಸಂಘವು ಕನ್ನಡ ನಾಡಿನ ಸಾಂಸ್ಕೃತಿಕ ಪುನರುಜ್ಜೀವನಕ್ಕೆ ಪ್ರೇರಕ ಶಕ್ತಿಯಾಗಿ ಶತಮಾನಕ್ಕೂ ಹೆಚ್ಚು ಕಾಲ ಕನ್ನಡಿಗರಲ್ಲಿ ಭಾಷಾಭಿಮಾನ, ಸ್ವಾಭಿಮಾನ ಬಿತ್ತುವ ಕಾರ್ಯ ಮಾಡುತ್ತಿದೆ ಎಂದರು.

ಹಿರಿಯ ಸಾಹಿತಿ ರಂಜಾನ್ ದರ್ಗಾ ಮಾತನಾಡಿ, ನಾಡಿನಲ್ಲಿ ಯಾವುದಾದರೊಂದು ಸಂಘ ತನ್ನ ಆಜೀವ ಸದಸ್ಯರನ್ನು ಗೌರವಿಸುತ್ತಿದ್ದರೆ ಅದು ಕವಿವ ಸಂಘ ಮಾತ್ರ. ಈ ಸಂಘವು ಸಮಸ್ತ ಕನ್ನಡಿಗರಿಗೆ ಸಾಂಸ್ಕೃತಿಕ ಮಹಾಮನೆಯಂತಿದೆ ಎಂದು ಹೇಳಿದರು.

ಸಂಘದ ಗೌರವ ಉಪಾಧ್ಯಕ್ಷ ಡಾ. ಪಾಂಡುರಂಗ ಪಾಟೀಲ ಅಧ್ಯಕ್ಷತೆ ವಹಿಸಿದ್ದರು. ಶೇ. 80ರಷ್ಟು ಮಕ್ಕಳು ಆಂಗ್ಲ ಮಾಧ್ಯಮದಲ್ಲಿ ಓದಿದರೆ ಕನ್ನಡ ಉಳಿಸಿ ಬೆಳೆಸುವವರಾರು?. ಸಂಘ ಆಂಗ್ಲ ಮಾಧ್ಯಮದಲ್ಲಿ ಅಧ್ಯಯನ ಮಾಡುವ ಮಕ್ಕಳಿಗಾಗಿ ವಿವಿಧ ಸ್ಪರ್ಧೆ ಆಯೋಜಿಸಿ ಭಾಷಾಭಿಮಾನ, ನಾಡ ಅಭಿಮಾನ ಮೂಡಿಸಬೇಕೆಂದು ಹೇಳಿದರು.

ಸಂಘದ ಪರವಾಗಿ ಹಿರಿಯ ಸದಸ್ಯರಾದ ಡಾ. ಶ್ರೀರಾಮ ಹೆರ್ಲೇಕರ, ಪ್ರಭಾಕರ ತುಪ್ಪದ, ಕರವೀರ ಗುರುನಾಥ ಸಾಂಬ್ರಾಣಿ ಅವರನ್ನು ಸನ್ಮಾನಿಸಿ ಗೌರವಿಸಲಾಯಿತು. ಡಾ. ಮಹೇಶ ಹೊರಕೇರಿ, ಪ್ರೊ. ಧನವಂತ ಹಾಜವಗೋಳ, ವೀರಣ್ಣ ಒಡ್ಡೀನ ಇದ್ದರು.